ကတိၤဒိ ၁၇း၂၂, သးလၢ အခုမၤဂ့ၤ ပနီၢ်ခိလီၤ. မ့မ့ၢ် သူၣ်ကၢ်သးလီၤ န့ၣ် ဒုးဃ့ထီကွံာ် ပဃံပကွဲ လီၤ.
ခၠါလ့ၣ် လဲန်ဒၢၣ် မ့ၢ် ပှၤလၢအမၤစၢၤ ပှၤဂၤဒီး မၤသူၣ်ဖှံသးညီ ပှၤလၢ အသးတဖှံတဖၣ် အသးလီၤ. ဘၣ်ဆၣ် ပှၤအိၣ်၀ဲ တဂၤလၢ အတနံၤတအ့ ဘၣ်ဒီး ဖဲ အကျဲးစၢး မၤနံၤ၀ဲန့ၣ် ပှၤအံၤ တကနၣ် ဃုာ် အီၤဘၣ်. ပှၤအံၤ ဆးစဲးလၢ ပှၤဆး တၢ်ဖိ အကရၢ မ့ၢ်ပှၤယူဒၤ ဖိလၢ အဟဲလၢ ကီၢ်ရၢရှၣ် တခီလီၤ. အဘျီ တခီၣ်, လၢတၢ်ဘါ တဘျီအပူၤ ခၠါလ့ၣ် ပာ်ဖျါထီၣ် ၀ဲလၢ စဘးခီး, ပှၤယူဒၤဖိ တဂၤအံၤ မ့ၢ်ပှၤတဂၤ လၢ အတပာ်ဖျါ အတၢ်သးအိၣ် ဆၢက့ၤ ပှၤလၢ အအဲၣ်ဒိး ရ့အီၤဘၣ် န့ၣ်လီၤ.
တၢ်အိၣ်ဖှိၣ် သရၣ် တဲဘၣ်ခၠါလ့ၣ် ဒ်အံၤ, “စဘးခီး မၤလိအသးလၢ အကနံၤ ၀ဲကသ့ယၢၣ်. ဘၣ်ဆၣ် နဘၣ်ဃုသ့ၣ်ညါ ဆိအ၀ဲ အတၢ်သးအုး အဂ့ၢ်လီၤ.” တဘျီအံၤ ခၠါလ့ၣ် သံကွၢ် သံဒိး၀ဲ အဂ့ၢ်ဒီး သ့ၣ်ညါ ဘၣ်၀ဲလၢ အမ့ၢ်ပှၤယူဒၤဖိ လၢအဟးထီၣ်ကွံာ် လၢရၢရှၣ် အကီၢ်ဖဲ အဒူၣ်ဖိထၢဖိ ဘၣ်တၢ်မၤသံ အီၤလၢ ပှၤခရံာ် ဖိတဖၣ်လီၤ. ပူၤဖျဲး၀ဲ ထဲ အကစၢ်တဂၤဒီး အဖိမုၣ် ခံဂၤလီၤ. ဟဲအိၣ်လၢ အမဲရံၤကၤဒီး အတၢ်မၤန့ၢ် လၢအက ဆးဘၣ်တၢ်ဒီး ဖဲအမၤတၢ်အခါ, ပှၤလၢ အကကွၢ်အဖိမုၣ် ခံဂၤန့ၣ် တအိၣ်ဘၣ်. အသးတဖှံဘၣ် ဒီး နံၤ၀ဲ တကဲ တသ့ဘၣ်.
ခၠါလ့ၣ် ပာ် လီၤအသးလၢ အကဃုကျဲ လၢအကမၤနံၤ မၤအ့ စဘးခီး ဒီး ဃုအသကိး လၢ အကမၤ စၢၤအီၤ လီၤ. အဆိ အ၀ဲလဲၤအိၣ်သကိး စဘးခီး အကစၢ်လီၤ. တနၢ်ပၢၢ် လိာ်အကျိာ် သနာ်က့ စဘး ခီး တဘျီအံၤ သ့ၣ်ညါဘၣ်၀ဲလၢ အ၀ဲ အသးအိၣ်အီၤ န့ၣ်လီၤ. ခၠါလ့ၣ် အတံၤသကိး တဂၤသ့ၣ်ညါ အါထီၣ် ဘၣ်၀ဲ လၢ စဘးခီး အဖိခွါ တဂၤစ့ၢ်ကီး လီၤမၢ်ကွံာ်၀ဲဖဲ တၢ်မၤသံ ပှၤယူဒၤဖိ ဒီဖုညါ အခါန့ၣ်လီၤ. တၢ်သး အုး အိၣ်လၢအပူၤ ဒီးဃုသ့ၣ်ညါ ဒံးအဖိခွါ အဂ့ၢ်လီၤ. ခၠါလ့ၣ် ဒီးအသကိး တဖၣ် ဟ့ၣ်လိၢ် စဘးခီး လၢ အကဒုးအိၣ်ထီၣ် အကစၢ်ဒၣ်၀ဲ အတၢ်ဆး တၢ် အလီၢ်တခါ န့ၣ်လီၤ. ဃုန့ၢ်၀ဲ အဖိခံဂၤ အလီၢ်လၢ အကအိၣ်ဘၣ် စီၤစုၤ ဒီးအပၢ် ဖဲအစးထီၣ် အတၢ်မၤဒၣ်၀ဲ န့ၣ်လီၤ. ဟဲဟ့ၣ်စ့ၢ်ကီး အီၤ လံာ်လၢ အဖး၀ဲဘၣ် တဖၣ်န့ၣ်လီၤ. ပှၤဟဲစိာ် န့ၢ်စ့ၢ်ကီး အီၤဖီဒီး တၢ်အီၣ်တဖၣ် န့ၣ်လီၤ. အတၢ်သးအုး စှၤလီၤ၀ဲ တစဲးလီၤ.
ခၠါလ့ၣ် ဒီးပှၤလၢ အမၤစၢၤအီၤ တဖၣ် ဘၣ်ဃးဒီး ကရၢတကရၢ ကိး၀ဲလၢ “မုၢ်တၢ်ကပီၤ အကွီၤ” ဒီးကရၢ ဖိအကျါတဂၤ ထံၣ်ဘၣ်၀ဲ ဖိသၣ် မၤလိတၢ်လၢ ကၠိပူၤတဂၤ လၢအက့ၢ်အဂီၤ လီၤဂာ်၀ဲဒီး စဘးခီး န့ၣ်လီၤ. သံကွၢ်၀ဲ အဂ့ၢ်ဒီး ဖျါလၢ အမ့ၢ် စဘးခီး အဖိခွါ လၢအပၢ်တသ့ၣ်ညါ က့ၤအဂ့ၢ်ဘၣ် န့ၣ်လီၤ. ဘၣ်တဟါ မုၢ်တၢ်ကပီၤ ကရၢဖိတဖၣ် ဟဲဆှၢပိာ်ခွါဖိအံၤဆူ စဘးခီး အအိၣ်လီၤ. အပၢ်ကွၢ် အီၤတစိၢ် ဖိဒီး သ့ၣ်ညါ၀ဲလၢ အမ့ၢ် အဖိလီၤ. ဖိခွါစ့ၢ်ကီး သ့ၣ်ညါက့ၤအပၢ် လီၤ. မုၢ်တၢ်ကပီၤ အကွီၤ ကရၢဖိတဖၣ်ဒီး ခၠါလ့ၣ် အသးခုဒိၣ် မးလၢ အမၤစၢၤ ဘၣ် စဘးခီး လၢ ကအိၣ်ဘၣ်က့ၤ ဒီး အဖိ ၃ ဂၤ တပူၤဃီ ဒီး အိၣ်ဒီး တၢ်သးခု တၢ်နံၤ တၢ်အ့ လီၤ. စဘးခီးသ့ၣ်ညါ ၀ဲလၢ ခရံာ်ဖိ နီၢ်နီၢ် ဃုမၤစၢၤ ပှၤဂၤလီၤ.
