ယံး ၁၀း၂၃, ယွၤဧၢ, ယသ့ၣ်ညါလၢ ပှၤကညီ တပၢဘၣ် အကျဲဘၣ်, ဒီး ပှၤလၢ အလဲၤတၢ်န့ၣ် စံၣ်ညီၣ်အထွဲ တၢ်တသ့ ဘၣ်၀ဲဘၣ်.ပမ့ၢ်ထွဲထီၣ် ပခီၣ်တနံၤဆူ ယွၤအအိၣ်န့ၣ် အ၀ဲကနဲၣ်နသးသမူ လၢကျဲတဖၣ် လၢအကဒုးလၤ ဒုးကပီၤ အီၤန့ၣ်လီၤ. ပိာ်ခွါဖိ နွံနံၣ် တဂၤလၢ အကျဲးစၢး၀ဲလၢ အကမ့ၢ်ခရံာ်ဖိ တဂၤ, ဒီးတၢ်သူတၢ်ပှိၤ ဟံးစု နဲၣ်ကျဲ အီၤလၢ အကဘၣ်မၤ တၢ်ဒ်လဲၣ် ဖဲတၢ်ကီတၢ်ခဲ အဆၢကတီၢ် န့ၣ်လီၤ. မ့ၣ်အူအီၣ် ပှၤစ၀ံး ဖိအသ၀ီ လၢအဆံးတဖျၢၣ် ဒီးလၢ တစိၢ်ဖိအပူၤ ဟံၣ်သ့ၣ်တဖၣ် လီၤကဘိၣ်ကွံာ် ၀ဲန့ၣ်လီၤ. ပှၤထူစံာ်ဖိ တဖၣ် တဆ့ အစု လၢတၢ်သးဟးဂီၤ အပူၤလၢ အဟံၣ်အဃီတဖၣ် ဒီးအဆၣ်ဖိ ကီၢ်ဖိ အါတက့ၢ် လီၤမၢ်ကွံာ်၀ဲ န့ၣ်လီၤ. ပှၤအိၣ် ၀ဲတဂၤလၢ အသးအုး အသးဟးဂီၤ ဒိၣ်န့ၢ်၀ဲ ပှၤအဂၤတဖၣ်လီၤ. အဟံၣ်လီၤမၢ်, အဆၣ်ဖိကီၢ်ဖိ တဖၣ် လီၤမၢ် ဒီး ဒိၣ်န့ၢ်အန့ၣ် အဖိခွါဖိ ၇ နံၣ် တဂၤ တထံၣ်၀ဲ နီတပူၤဘၣ်. ဟီၣ်၀ဲဒီး ဟီၣ်၀ဲ ဒီး တဒိးတၢ်မၤမုာ် အသး နီတမံၤဘၣ်. လၢမုၢ်နၤ ဒီနၤညါ ကွၢ်ဃု၀ံၤ ကွၢ်ဃုက့ၤ အဖိခွါန့ၣ်လီၤ. မ့ၢ်အကထံၣ်ဘၣ်ဒံး အဖိအဃံ အကွဲတဖၣ် သ့ၣ်သ့ၣ်ဧါ န့ၣ်လီၤ.
ဖဲ မုၢ်ဘူးက၀ါန့ၣ် နၢ်ဟူဘၣ်၀ဲ တၢ်အသီၣ်လၢ အညီနုၢ်နၢ်ဟူ ဘၣ်၀ဲန့ၣ်လီၤ. ကွၢ်ထီၣ်၀ဲဒီး ထံၣ်ဘၣ် ၀ဲလၢ အကျီၢ်မိၢ်လၢ အအဲၣ်၀ဲဒိၣ်မး တဒု ဟဲက့ၤ လၢအကျီၢ် ဒီဖုအမဲာ်ညါ ဒီး ပှၤလၢ အဟဲက့ၤ လၢခံ ကတၢၢ် န့ၣ် မ့ၢ်အဖိခွါ ဖိ ၇ နံၣ် တဂၤလီၤ. အမဲာ်ဖျါ သူၣ်ဖှံ သးညီ ဒီး တဘၣ်ဒိ ဘၣ်ထံးနီတမံၤ ဘၣ်န့ၣ်လီၤ. အ၀ဲကိးထီၣ်, “ယဖိခွါဧၢ, ယဖိခွါဧၢ, မ့ၢ်နမူ နီၢ်နီၢ်ကစီဒီဧါ.”
အဖိခွါစံး, “တုၤ ယထံၣ် မ့ၣ်အူအီၣ်တၢ် တဘျီဃီ, လီၤဂာ်ဒ် တၢ်တဲဘၣ်ယၤလၢ ယကဘၣ် နီၣ်ကွံာ် ကျီၢ်တဖၣ်အံၤဆူ တၢ်အီၣ်ဆၣ် အလီၢ် ယံၤဒီး မ့ၣ်အူ တသ့ဖဲ အသ့ န့ၣ်လီၤ. ပၢ်ဧၢ, ယကဟဲက့ၤ တဲဘၣ် နၤ တသ့ဘၣ်.” အပၢ်စံးအီၤ, “ယဖိခွါဧၢ, နမ့ၢ်ဟံရိၣ် (ပှၤဒူပှၤဃိၤ) တဂၤလီၤ.” အ၀ဲစံး, “တမ့ၢ်ဘၣ် ပါပၢ်ဧၢ, ဟံရိၣ် မ့ၢ်ပှၤလၢ အမၤတၢ်လၢ အဒူတမံၤမံၤ လီၤ. မ့မ့ၢ်ယဲ တခီ မ့ၢ်ဒၣ် ယဟီကွံာ် ဆၣ်ဖိကီၢ်ဖိ တဖၣ်အံၤ မ့ၢ်လၢ တၢ်ဘၣ်ယိၣ် အလီၢ်အိၣ်၀ဲ လၢအ၀ဲသ့ၣ် အဂီၢ်အဃိ န့ၣ်လီၤ. လီၤဂာ်ဒ် ယွၤတဲဘၣ်ယၤ ကသွံဒံလၢ ယကဘၣ်မၤ တၢ်လၢ အဘၣ်တမံၤန့ၣ်လီၤ.”
ဟံရိၣ်, န့ၣ် မ့ၢ်ပှၤတဂၤလၢ အမၤတၢ်လၢ အဘၣ်ဒီး လၢအဆၢကတီၢ် လၢအဘၣ်၀ဲ တအိၣ်ဒီး တၢ်ဆိကမိၣ် ထီၣ်တၢ်မုာ်တၢ်ခုၣ်ဒီး တၢ်ဘၣ်ဘျုး လၢအဂီၢ်ဒၣ်၀ဲ ဘၣ်. အ၀ဲပာ်န့ၢ် ပှၤဂၤတဖၣ် အလီၢ်လၢ ညါလီၤ. အပၢ်တဲနၢ်ပၢၢ်အီၤ ဒ်န့ၣ်လီၤ. စီၤဒၤ၀ံး ကဲထီၣ် ဟံရိၣ်တဂၤဖဲ အဒုး စီၤကၤလယး န့ၣ်လီၤ. မ့ၢ်တၢ်မၤ လၢ အဘၣ်၀ဲဒီး လၢအဆၢကတီၢ် ဘၣ်၀ဲန့ၣ်လီၤ. အ၀ဲ ဒုးတၢ်လၢ တၢ်ပာ်ဒိၣ် ယွၤအမံၤ ဒီး အလၤအကပီၤ အဂီၢ် ဒီး တမ့ၢ်ဘၣ် လၢ အကမၤန့ၢ် တၢ်မံၤဟူ သၣ်ဖျါဒီး တၢ်မၤန့ၢ် တၢ်ထူးတၢ်တီၤ အဂီၢ်ဘၣ်.
ပှၤတဂၤ ဂ့ၤတဂၤဂ့ၤ န့ၢ်ဘၣ် ဟံရိၣ် အမံၤသ့၀ဲ ဖဲအမၤတၢ်လၢ အဘၣ်၀ဲဒီး ဘၣ်ဆၢဘၣ် ကတီၢ် ၀ဲ တအိၣ်ဒီး တၢ်အဲၣ်လီၤ သး အသူးအသ့ၣ် တဖၣ်ဘၣ် န့ၣ်လီၤ.
