ကတိၤဒိ ၃း၁, ယဖိခွါဧၢ, သးပ့ၤနီၣ် ယသိၣ်က့ၤသီက့ၤ တၢ်တဂ့ၤ. မ်နသး တိၢ်န့ၢ် ယတၢ်မၤလိာ် တက့ၢ်.မုၢ်အိၣ်ဘှံးနံၤတဂီၤ န့ၣ်ပှၤကၠိဖိ မၤလိပီၢ်ရီ အတၢ်မၤတဖု လဲၤအိၣ်ဖှိၣ် ၀ဲလၢ တၢ်လိာ်ကွဲ အလီၢ် ဒီး အီသကိးသံး, အီမိာ်၀ါ ဒီး လိာ်ကွဲဖဲ ဒီး အိၣ်သကိး မၤသးဖှံ အသးလီၤ. ပှၤတကရၢ အံၤ အမိၢ်အပၢ် မ့ၢ် ခရံာ်ဖိ ခဲလၢာ်လီၤ. ဖဲန့ၣ် အခါ အ၀ဲသ့ၣ် နၢ်ဟူ ဒၢလွဲသီၣ်ထီၣ်လၢ တၢ်ဘါ အဂီၢ်လီၤ. ကၠိဖိ အကျါတဂၤ တဲ၀ဲ ယကလဲၤဘါ တၢ်တဂီၢ်အံၤ လီၤ. အတံၤသကိး တဖၣ်ြတီအီၤ ဘၣ်ဆၣ် ြတီ၀ဲ တန့ၢ်ဘၣ်. အ၀ဲသ့ၣ်တဲအီၤ, ပြတီနၤ မ့ၢ်တန့ၢ် ဘၣ်ဒီး ပ၀ဲခဲလၢာ် ပကလဲၤမိၤ လီၤနၤလၢ ထံကျါဒီး ပကဘျၢနၤ လၢထံလီၤ. တဲဆၢ၀ဲ, သုမ့ၢ် မၤဆူၣ်ယၤန့ၣ် ယမၤသု တနၢၤဘၣ်. သုမ့ၢ်ဆီၣ်လီၤ အုးယၤလၢ ထံဒီး ယကသံလီၤ. တချုးသု မၤဒံးဘၣ် ပျဲယက တဲသု လၢယဂ့ၢ် တက့ၢ်. တုၤယတဲ၀ံၤဒီး ကွၢ်ဖဲသုအဲၣ်ဒိးမၤ ယၤန့ၣ် သုမၤသ့ လီၤ.
ယအိၣ်ယံၤဒီး ယဟံၣ်လၢ အမံၤလာ် လၢအကယၤလီၤ. ယမိၢ်ဘၣ်မံနီၤ လၢအလီၢ်မံ ခိၣ်ထီဘိ, ဟူးတန့ၢ် ဟးတသ့ဘၣ်. ယမ့ၢ်ပှၤအဆံး ကတၢၢ်လၢ ယဒီပုၢ်၀ဲၢ် အကျါလီၤ. ကမၤလိဘၣ် တၢ်အဂီၢ် ယပၢ်မၤ စၢၤ ယၤ တန့ၢ်ဘၣ်. ဘၣ်ဆၣ် ပသရၣ်လၢ အသိၣ်လိပှၤ အံၤ မ့ၢ်ယပၢ် အတံၤ သကိး တံၢ်နီၢ် တဂၤဒီး အ၀ဲတ ဃ့ ယၤတၢ်မၤလိ အလဲဘၣ်. ယပၢ်အဲၣ်ဒိး ၀ဲလၢ ယကမၤ လိပီၢ်ရီ အတၢ်မၤ, ဘၣ်ဆၣ် ယမိၢ်တခီ တအဲၣ်၀ဲဘၣ်. ဘၣ်ဆၣ် ပာ်ဆူၣ် အသးသပှၢ်ပှၢ် ဒ်သိး အကဟ့ၣ် ယၤအခွဲး လၢယကမၤလိဘၣ် ပီၢ်ရီ အတၢ်မၤ လိန့ၣ်လီၤ. လၢခံကတၢၢ် လၢတၢ်ထုကဖၣ် သပှၢ်ပှၢ်အပူၤ, အ၀ဲပျဲ ယၤလီၤ. ယကတီၤယသးလၢ ယကဟးထီၣ် ကွံာ် လၢယဟံၣ် ဒီးထီၣ် မၤလိတၢ် န့ၣ်လီၤ.
ယမိၢ်တတဲယၤ ဘၣ်ဃး တၢ်ကဟးထီၣ်ကွံာ် လၢဟံၣ်ပူၤ အဂ့ၢ်နီတမံၤ ဘၣ်. တုၤလၢ ယကဟး ထီၣ် တဂီၤ, ယအီၣ်ဂီၤ အတၢ်အီၣ် ၀ံၤအ၀ဲ ကိးဃီၤ ယၤဆူ အအိၣ် ဒီး ယတဲအီၤလၢ ယကတီၤ ယသး၀ံၤလံ. အ၀ဲမၢ ယချံးခီၣ် တီၤလီၤ, ပာ်ထီၣ်အစု လၢယခိၣ်ဒီး, ဘါထုကဖၣ် လၢယဂီၢ်လီၤ. လၢယတၢ်မၤလိ အပူၤ ယသ့ၣ် နီၣ်ထီၣ်က့ၤ တၢ်ဆၢကတီၢ် လၢယလီၤဖး ဒီး အီၤဒီး တၢ်လၢ အမၤအသး ဒီး ယၤဖဲ အဃ့ တၢ်ဆိၣ်ဂ့ၤ လၢယဂီၢ် အခါ မၤမုာ် ယသးဒိၣ်မး လီၤ. အတၢ်ထုကဖၣ် အဖျၢၣ် လၢယဂီၢ် တဖၣ် ယကသ့ၣ်နီၣ် အီၤတုၤ ယသံလီၤ. အ၀ဲမၤလိာ် ယၤ, ယဖိခွါလုၢ်ဒိၣ်ပှ့ၤဒိၣ်ဧၢ, နတသ့ၣ်ညါ တၢ်သူၣ်အူသးကဲၤလၢ မိၢ်တဂၤ အသး ပူၤလၢ အကဘၣ်လီၤဖး ၀ဲဒီး အဖိသဒါ အကတၢၢ်တဘျီ န့ၣ်ဘၣ်. တနံၤအံၤ, နကထံၣ်ဘၣ် နမိၢ်အမဲာ် အကတၢၢ် တဘျီ, ဒီးမ့ၢ် ပှၤလၢအအဲၣ်နၤ အဒိၣ်ကတၢၢ် န့ၣ်လီၤ. ပှၤဂၤလၢ ကအဲၣ်နၤ ဒိၣ်န့ၢ်ဒံး နမိၢ်အဲၣ်နၤ အံၤ လၢဟီၣ်ခိၣ်ချၢ တအိၣ်နီတဂၤ ဘၣ်. တၢ်လီၢ် လၢနကလဲၤခဲအံၤ န့ၣ် မိၢ်တအိၣ်လၢ နဂီၢ်နီတဂၤ လၢအကဟ့ၣ်နၤ တၢ်ဟ့ၣ်ကူၣ် ဟ့ၣ်ဖးဘၣ်. ဃ့တၢ်ဟ့ၣ်ကူၣ် ဒီးတၢ်မၤစၢၤလၢ ယွၤတက့ၢ်. အိၣ်ဘှံးနံၤ ဂီၤခီ ၁၀ နၣ်ရံၣ် တုၤလၢ ၁၁ နၣ်ရံၣ် ကိးနွံဒဲး န့ၣ် ယကဘါထုကဖၣ် တၢ်လၢ နဂီၢ်လီၤ. ဖဲနနၢ်ဟူ ဒၢလွဲ တဖၣ်သီၣ် ထီၣ်၀ဲ န့ၣ် ပျၢ်နတၢ်ဆိကမိၣ် တဖၣ်ဒီး ဟဲက့ၤနုာ်ဆူ ဒၢးအပူၤတက့ၢ်. ဖဲန့ၣ်အဆၢကတီၢ် န့ၣ် နမိၢ်လၢ အဘူး ကသံ တဂၤအံၤ ကဃ့ဘါထုကဖၣ် တၢ်လၢနဂီၢ် လီၤ.
ပှဲၤဒီးမဲာ်ထံလၢအမဲာ်ပူၤ, ကၠီးကွၢ် ဃီၤတၢ်ဆူ အတံၤသကိး လၢအအိၣ်ဘှ့ၣ် ၀ဲတဖၣ် အအိၣ်လီၤ. အ၀ဲသ့ၣ်ပျဲလီၤကွံာ်အစု တဖၣ်လၢ အဖီၣ်က၀ီၤ ဃာ်အီၤ တဂၤဘၣ်တဂၤ န့ၣ်လီၤ. ကၠီး ဟးထီၣ် ကွံာ် ၀ဲဒီး လဲၤဆူ တၢ်ဘါအလီၢ်ဒီး အသကိး တဖၣ် ပိာ်ထီၣ် အခံခဲလၢာ် လီၤ.
