စံၣ်၇း၁, တၢ်အမံၤဂ့ၤသၣ်ဂ့ၤန့ၣ် ဂ့ၤန့ၢ် သိနၢမူလၢ အလုၢ်ဒိၣ်ပှ့ၤဒိၣ် တက့ၢ်လီၤ.မ့ၢ်၀ဲ တၢ်ကခူၣ်လီၤ သးပှၢ်လၢ အမံၤဟူသၣ်ဖျါ တဂၤလၢ ၀့ၢ်ဖးဒိၣ် တဖျၢၣ်အပူၤ လီၤ. ပှၤဒီ၀့ၢ် ပာ်ကဲအီၤ ဒီး ဟဲ၀ဲ လၢအကမၤ လၤကပီၤ အနီၢ်ခိ အအိၣ်လီၤတဲာ် အဂီၢ်လီၤ. မ့ၢ်လၢ တၢ်လီၢ်တြတီၢ် ဘၣ်အဃိ ပှၤဘါယွၤ လၢ တၢ်လီၤပျီ ဖးလဲၢ်တက၀ီၤလီၤ. တချုးလၢ တၢ် ဘူၣ်တၢ်ဘါ စးထီၣ်ဒံး ဘၣ်န့ၣ်, ပှၤသံတဂၤအံၤ အဖိခွါ ကတိၤ သကိးတၢ်ဒီး တၢ်အိၣ်ဖှိၣ် သရၣ်တတီၤဖိ လီၤ. ဖိတဂၤအံၤ တဲတၢ်အိၣ်ဖှိၣ် သရၣ်လၢ အပၢ်အဂ့ၢ် စံး၀ဲ, ကွၢ်အစု တက့ၢ်. အဖံးဘ့ၣ် တီၣ်၀ဲလၢ အမၤတၢ်မၤ အကိၢ်အဂီၤ အဃိလီၤ. အ၀ဲအိၣ်ဒီး အစံၣ်ဖးလဲၢ် လွံၢ်က၀ီၤ ဒီးတုၤ အဟဲအိၣ်က့ၤလၢ ၀့ၢ်ပူၤန့ၣ် ဘၣ်ဟဲကွၢ် အတၢ်မၤလၢ အစံၣ် တဖၣ်အပူၤ တဘျီတဘျီ လီၤ. ဖဲန့ၣ် အခါ ယပၢ်မ့ၢ် ပှၤပၢၤလီၢ်ဆ့ၣ်နီၤ ဒီး ပှၤပၢၤစ့လၢစ့ တၢးတဖျၢၣ် ဧိၤလၢ ၀့ၢ်အံၤလီၤ. ယအဲၣ်ဒိး ထူးထီၣ်တီၤထီၣ် ချ့ချ့ အဃိ ယအိၣ်ဒီး တၢ်ကူၣ်ဖးဒိၣ်လၢ ယခိၣ်နူာ်ပူၤလၢ ပကမၤန့ၢ် စ့လၢ ပဂီၢ်ဒီး ပှၤကရၢဖိတဖၣ်လၢ အဘၣ်ဃးဒီး စ့တၢး ဖးဒိၣ်အံၤ အဂီၢ်လၢ တၢ်ဆၢကတီၢ်စှၤ နံၣ်အတီၢ်ပူၤလီၤ. ယတဲဘၣ် ယပၢ်လၢ ယတၢ်ကူၣ်အံၤ ဒီး ယပၢ် ဂံၤဂုၤ အခိၣ်လီၤ.
အ၀ဲတဲယၤ,ဖိခွါဧၢ, နဘၣ်ကွၢ်ဆိကမိၣ် တၢ်၀း၀းလီၤ. နတၢ်ကူၣ်ထီၣ်အံၤ နကဘၣ်သူ ပှၤကရၢဖိ လၢ အဘၣ်ဃး ဒီး စ့တၢးအံၤ အစ့လီၤ. တၢ်လၢနတထံၣ်စိ တဖၣ် မ့ၢ်မၤအသး ဒီး ကကဲထီၣ် တၢ်ကီလၢ နဂီၢ်လီၤ. မၤ တဂ့ၤ. ယဲတခီ ယဆိကမိၣ်လၢ ယပၢ်အသးပှၢ်လံ. တၢ်မၤန့ၢ်စ့ ချ့ချ့ အကျဲ တသ့ၣ်ညါ ၀ဲဘၣ်. ယတတဲ အီၤလၢၤဘၣ်ဒီး ယမၤတၢ်လၢ ယတိာ်ပာ်၀ဲ န့ၣ်လီၤ. လီၢ်ခံဒီး တၢ်လဲၤအသး ကဒံကဒါ ဒီးစ့တၢး အကမၢ်ထီၣ် ၀ဲဒီလၣ် ယဲၢ်ကလး လီၤ. ယကူၣ်တဘၣ်လၢၤ ဘၣ်. ယဃ့လိၢ်စ့လၢ စ့တၢးလၢ ၀့ၢ်အဂၤ တန့ၢ်နီတပူၤ ဘၣ်. ယပၢ်သ့ၣ်ညါလၢ တၢ်လဲၤကမၣ် အသးလံ. ဘၣ်တဟါ အ၀ဲဟဲဆူ ယအိၣ်, ဘၣ်ဆၣ် ယဲတခီ ယမၤသံကွံာ် မ့ၣ်အူ ဒီး ယက့ၤနုာ်ဆူ ဒၢးပူၤလီၤ.
အ၀ဲဖီၣ်ထီၣ် ယစုဒီး ပဟးလၢဒၢး လီၤပျီတကဆူး ဒီး ပတိၤတၢ်လီၤ. အ၀ဲသံကွၢ် တၢ်ဖံးတၢ်မၤ အဂ့ၢ်ဒီး ယတဲအီၤ တၢ်ကီတၢ်ခဲ အိၣ်ထီၣ်လံ. ယလိး ယကမၢ် ယဲၢ်ကလး တန့ၢ်ဘၣ် အဃိ ခဲမုၢ်ဆ့ၣ် ယကဟးထီၣ် လၢ၀့ၢ် ပူၤဒီး လဲၤဆူ ကလံၤစိး မုၢ်နုာ် လီၤ. အ၀ဲတဲယၤ, ဖိခွါဧၢ, နမ့ၢ် လဲၤဒီး မ့ၢ်နမၤ တၢ်ဒဲးဘး ဖးဒိၣ်လီၤ. ပှၤမၤ သကိး တၢ်ဒီးနၤ တဖၣ် နကဘၣ် ကျဲၤလၢ နကဟ့ၣ်က့ၤ အစ့ပှဲၤပှဲၤ ကိးဂၤဒဲး လီၤ. ယတဲဘၣ်အီၤ, ယဟ့ၣ် တန့ၢ်ဘၣ်. အ၀ဲမၢ ယအိၣ်ခိးအီၤ လီၤ. မုၢ်ဆ့ၣ်ထီၣ်တနံၤ အ၀ဲလဲၤပာ်လီၤ အစံာ် ၄ လီၢ်၀ံၤ, ဟဲက့ၤဟ့ၣ်ယၤ စ့ ဒီး ယလိးက့ၤ ယကမၢ်တုၤ ပှၤကိးဂၤ ဒဲးန့ၢ်ဘၣ် က့ၤအစ့ လီၤ. မ့မ့ၢ် အ၀ဲတခီ အစ့တအိၣ် လၢၤဘၣ်ဒီး ဟံးက့ၤ အစံာ် တန့ၢ်လၢၤဘၣ် အဃိ ဘၣ်ကဲ၀ဲ စ့တၢးအံၤ အပှၤပၢၤဒၢး လီၤ. ဘၣ်မၤ တၢ်နးနးဖှီၣ်ဖှီၣ် တုၤလၢ အသံ တစုလီၤ.
သရၣ်ဧၢ, ယဆိကမိၣ် လၢညါလၢ ပှၤကညီ တဂၤမ့တမ့ၢ် လၢအစ့အိၣ်ဘၣ် ဒီး မ့ၢ်တၢ် တသ့နီတမံၤ ဘၣ်. ယတၢ် ဆိကမိၣ် အံၤ ကမၣ်ဒိၣ်မး လီၤ. ယပၢ်အစ့ တအိၣ်လၢၤဘၣ် သနာ်က့, ပှၤပာ်ကဲအီၤဒီး ပှၤနာ်အီၤလီၤ. တဂီၤအံၤ ပှၤဒီ၀့ၢ်ညါ ဟဲဟ့ၣ်အီၤ တၢ်ယူးယီၣ်လီၤ. သရၣ်ဧၢ, တဲဘၣ် ပှၤသးစၢ်လၢ နထံၣ်အီၤ တဖၣ်လၢ တၢ်အမံၤ ဂ့ၤသၣ်ဂ့ၤ အလုၢ်အပှ့ၤ ဒိၣ်န့ၢ်ထူဒီး စ့တက့ၢ်လီၤ.
