လူၤကၣ် ၁၂းဂ, ကယဲၢ်ပှၤလၢ အအၢၣ်လီၤ အီလီၤယၤ လၢပှၤကညီ အမဲာ်ညါ တဂၤဂၤန့ၣ်, ပှၤကညီ အဖိခွါ အံၤ ကအၢၣ်လီၤ အီလီၤ လၢ ယွၤအကလူး တဖၣ် အမဲာ်ညါ လီၤ.မ့ၢ်တၢ်လၤ ကပီၤလၢ ပဂီၢ်ဆံး ဒိၣ်လဲၣ်. ပမ့မ့ၢ်ခရံာ် အပျဲၢ် လၢအတီတဖၣ် ဒီးအ၀ဲ တဲကလူး တဖၣ် ဘၣ်ဃး ဒီးပဂ့ၢ် န့ၣ်လီၤ. မၤလိာ် အကလူးတဖၣ် လၢနဂ့ၢ်နကျိၤ, လၢအကအံး က့ၤကွၢ်က့ၤနၤ လၢနကျဲ ခဲလၢာ် အပူၤလီၤ. ကစိာ်ထီၣ် နၤလၢနစု အလိၤဒ်သိး နခီၣ်အသု တဘၣ်ဒိ ဘၣ်ထံးဒီး လၢၢ်တဂ့ၤ လီၤ. နကယီၢ် လီၤခ့ယုၢ် ဒီးဂုၢ်သီ, နကယီၢ်တံၢ် ခ့ယုၢ်ဖိ ဒီးပယိၤ န့ၣ်လီၤ. (စံး ၉၁း၁၁ တုၤ ၁၃)
လၢကီၢ်ဖိ အိၣ်ရံကၢၢ် အပူၤ, တဘျီဖဲ ပိာ်မုၣ် ရှၢရံးဖ် (ပဒိၣ်) တဂၤ ဟး၀့ၤ၀ီၤ လၢအတၢ်မၤ အပူၤ, ထံၣ်၀ဲပိာ်ခွါ ဖိအနံၣ် ၁၀ တဂၤ စိာ်၀ဲ ဂုၢ်အမူဒံး တဘိ, ဒီးမ့ၢ် ဂုၢ်လၢ အစုာ် အၢတကလုာ်ဒီး မ့ၢ်အ့ၣ်ဘၣ် ပှၤတဂၤဂၤ ဒီး ပှၤသံလီၤ. ပိာ်ခွါဖိ ဒီးအသကိး တဖၣ် တသ့ၣ်ညါ ၀ဲလၢ အမ့ၢ်ဂုၢ် အအၢဘၣ်. ဒ်သိး ပိာ်ခွါဖိ သုတပျံၤ သုတဖုးတဂ့ၤဒီး တဲအီၤ, နစိာ်ဂုၢ် အမူတဘိ နတပျံၤ တၢ်ဘၣ်ဧါ. ပိာ်ခွါ ဖိစံးဆၢ၀ဲ, ယတပျံၤ ဘၣ်. ယပၢ် သိၣ်လိ ယၤလၢ ယကဖီၣ်ဂုၢ် ဒီး ယကဟံး ဃာ်အခိၣ်လၢ အလီၢ်ခံ ဒ်သိး အဖျးယၤ သုတသ့ တဂ့ၤ လီၤ. ယကက့ၤစိာ် ဂုၢ်အံၤဆူ ယပၢ်အအိၣ် ဒ်သိး ကတဲဘၣ် ယၤလၢ ဂုၢ်အံၤ မ့ၢ်ဂုၢ် အဖါတံၢ် ဧါ, မ့တမ့ၢ် ဂုၢ်စီၤပၤ ဧါ န့ၣ်လီၤ.
ပိာ်မုၣ် အံၤ တဲ၀ဲလၢ အကလုၢ် ကဖီလီအပူၤ, နဟံးဃာ် တၢ်န့ၣ် တမ့ၢ်ဂုၢ် အဖါတံၢ်ဘၣ်. တမ့ၢ် စ့ၢ်ကီး ဂုၢ်စီၤပၤ တဘိဘၣ်. နစိာ်ဂုၢ် လၢအစုာ်အၢ ဒီးမ့ၢ်အ့ၣ်ဘၣ် ပှၤဒီး ပှၤသံသ့ ၀ဲ တဘိလီၤ. ဘၣ်ဆၣ် တဘၣ်သး ကနိးဒီး ကဒံကဒါ တဂ့ၤ. ယကတဲသုလၢ သုကဘၣ်မၤ ဒ်လဲၣ်ဒ်သိး သုကပူၤဖျဲး အဂီၢ်လီၤ. ပိာ်ခွါဖိ ဖုး၀ဲဘၣ်ဆၣ် တကဒံကဒါဘၣ်. ကွံာ်နဂုၢ်န့ၣ် ယံၤယံၤ ဖဲနကွံာ်သ့, ဒီး ပာ်နသး ဂၢၢ် ဂၢၢ် တက့ၢ်. ပိာ်ခွါကွံာ် ၀ဲဖဲ အကွံာ်၀ဲတုၤဒီး ဂုၢ်အခိၣ် ဘၣ်၀ဲဒီး လၢၢ်န့ၣ်လီၤ. ရှၢရံး ဟံးထီၣ်အကျိ ဒီးခးဂုၢ် န့ၣ်လီၤ. ပိာ်ခွါဖိ တဲအီၤလၢ အသးခု ၀ဲလၢ အဟဲမၤစၢၤ အီၤန့ၣ်လီၤ. ပိာ်မုၣ် (ပဒိၣ်) အံၤအသးခု ၀ဲ စ့ၢ်ကီးလီၤ. အ၀ဲဒိးထီၣ် အသိလ့ၣ်ဒီး လဲၤတၢ်လီၤ.
ကလူးလၢ အကဟုကယာ် ဖိသၣ်တဖၣ် ထံၣ်ဘၣ် ယွၤလၢ မူခိၣ် အမဲာ်ထီဘိ လီၤ. စံး၀ဲဒ်သိး သုသု တမၤ တရီတပါ ပှၤလၢအဆံး တဖၣ်အံၤ အကျါ နီတဂၤ တဂ့ၤဒီး ပလီၢ်သုသး တက့ၢ်. အဂ့ၢ်ဒ်အံၤ, ယစံးဘၣ် တဲဘၣ်သုလၢ အ၀ဲသ့ၣ် အကလူး လၢမူခိၣ်တဖၣ် န့ၣ် ကွၢ်ဘၣ်ယပၢ် အိၣ်လၢ မူခိၣ် အမဲာ်တထံၣ်ဃီ လီၤ. (မးသဲ ၁၈း၁၀) ပဘၣ်မၤ ဘၣ် ခရံာ်အသး ဒ်သိး အကမၢ အကလူးတဖၣ် ကကဟုကယာ် ပှၤန့ၣ်လီၤ.
