ယိၤဘး ၁၇း၉, ပှၤအတီအလိၤ ကဟံးဃာ် အကျဲ, ဒီးပှၤလၢ အစုကဆှီ န့ၣ် အဂံၢ်အဘါ ဒံးယံာ်ကဒံး ဆူၣ်ထီၣ် လီၤ.
ဖိသၣ် ကၠၢရ့ၣ် ဖိလၢ အသးအိၣ် အနံၣ် ၁၀ တဂၤန့ၣ်, အမိၢ်ထံၣ်လၢ အသ့အစုဒီး ဆးပၠၣ် ကိးနၣ် ရံၣ် ဒဲးလီၤ. လၢအပူၤကွံာ် အမိၢ်မၢ အသ့အစု လၢ တချုး အီၣ်မ့ၤန့ၣ် တအဲၣ်ဒိး မၤ၀ဲဘၣ်. အမိၢ်သံကွၢ်အီၤ, ဘၣ်မနုၤ နဘၣ်သ့နစု ခဲအံၤ ခဲအံၤလဲၣ်. ကၠၢရ့ၣ်တဲဆၢ၀ဲ, လၢကၠိပူၤန့ၣ် ဒ့းဖ် မၤနၢၤယၤ ထီဘိ လီၤ. အ၀ဲ အသး ပှၢ်န့ၢ်ယၤလီၤ. နကွၢ် လၢလံာ်စီဆှံ ပူၤလၢအစံး, “ပှၤလၢအစု ကဆှီန့ၣ် အဂံၢ်အဘါဆူၣ်ထီၣ် လီၤ.” ယဂံၢ် ယဘါ မ့ၢ်ဆူၣ်ထီၣ် ယကမၤဃၣ် ဒ့းဖ် လီၤ. အမိၢ်တဲနၢ်ပၢၢ်အီၤ, နသ့နစု လၢဆးပၠၣ် ဒီးထံန့ၣ် နစုကကဆီှ ထီၣ်လီၤ. ဘၣ်ဆၣ် နစု ဘၣ်အၢ ဒံးသ့၀ဲ ဒၣ်လီၤ. နမ့ၢ်ဟံးတၢ်တမံၤ ဂ့ၤတမံၤဂ့ၤ လၢအတမ့ၢ် နတၢ်ဘၣ်န့ၣ် နစုကဘၣ်အၢ ဒၣ်တၢ်လီၤ. ဒ်သိး ကၠၢရ့ၣ် နၢ်ပၢၢ်၀ဲ ကညီအဂီၢ် အမိၢ် တဲအီၤ တၢ်ဃဲၤဖိ တခါအံၤ လီၤ.
လၢပှၢ်ပူၤ, ဘၣ်ဖဲ တၢ်ဒုးသုး ဖးဒိၣ် အခါ, ကသံၣ်သရၣ် မၤစၢၤ တၢ်တဂၤ ကွၢ်ဃီၤ တၢ်ဆူ တၢ်ဆါ ဟံၣ်ဒီး ထံၣ်ဘၣ်၀ဲလၢ အသကိး တဂၤ တူၢ်ဘၣ် တၢ်ဆူးတၢ်ဆါလၢ အသွံၣ်ယွၤကွံာ် အါမးအဃိ လီၤ. ကသံၣ် သရၣ်လၢ အဖှဲးပှၤ တဲ၀ဲ ဒၣ်လၢ အကဒၢနုာ်န့ၢ်အီၤ ပှၤသွံၣ်အဂီၢ် န့ၣ် ပှၤသွံၣ်လၢ အဘၣ်လိာ် ဒီးအ၀ဲ အသွံၣ် န့ၣ် ပှၤဃုတဘၣ် ဘၣ်. ဖဲန့ၣ်အခါ, ကသံၣ်သရၣ် အံၤနၢ်ဟူ ပှၤကအု သီၣ် တယံၤတဘူး တဂၤလီၤ. လဲၤကွၢ် ဃု၀ဲ ဒီးထံၣ်၀ဲ ပှၤသုးဖိ လၢအဘၣ်ဒိ တဂၤဒီး ကွၢ်၀ဲ အတၢ်ကူတၢ်သိး လၢအယာ်ဘုၣ် ယာ်ဖျ့ န့ၣ်မ့ၢ်၀ဲ ဒုၣ်ဒါ သုးဖိ အတၢ်ကူတၢ်သိး လီၤ. အ၀ဲ ယုာ်အသး တတီၤလီၤ. အ၀ဲကိးထီၣ် တၢ်မၤစၢၤလၢ ပှၤကလဲၤယိး ဃီၤ ဒုၣ်ဒါ ဘၣ်ဒိအံၤ လၢအသုးဒၣ်၀ဲ အဒဲက၀ီၤ အပူၤ န့ၣ်လီၤ.
အ၀ဲ မၤအတၢ် ဒီတနံၤညါအဃိ လီၤဘှံးလီၤတီၤ လီၤ. အ၀ဲလဲၤဃီၤ ၀ဲဆူ ကသံၣ်သရၣ် ဖးဒိၣ် လၢအကွဲး တၢ်အအိၣ် လၢတၢ်သးဃၢ အပူၤဒီး တဲ၀ဲ, လၢအပူၤကွံာ် တဘျုးနၣ်ရံၣ် နဒုးသ့ၣ်ညါယၤလၢ ယသကိး လၢအလိၣ်ဘၣ် တၢ်သွံၣ် တဂၤန့ၣ် နဃုသွံၣ်လၢ အဘၣ်လိာ် ဒီးအ၀ဲအသွံၣ် တအိၣ်ဘၣ်လီၤ. မ့မ့ၢ် ဒ်န့ၣ် အ၀ဲကသံလံ သၢၣ်. ကသံၣ်သရၣ် ဖးဒိၣ် စံးဆၢအီၤ, နတံၤသကိး န့ၣ် ကအိၣ်မုာ်ထီၣ် က့ၤလၢ အဆိလီၤ. မ့ၢ်နသ့ၣ်ညါ စ့ၢ်ကီးလၢ ဒုၣ်ဒါသုးဖိ အဘၣ်ဒိ လၢနဟဲက့ၤ စိာ်အီၤတဂၤန့ၣ် မၤန့ၢ်က့ၤ နတံၤသကိး တဂၤန့ၣ် အသးသမူ ဧါ. အ၀ဲအိၣ်ဒီး အသွံၣ်လၢ ပလိၣ်ဘၣ် အီၤဒိၣ်ဒိၣ် ကလဲာ်လၢ ပကဒၢနုာ် န့ၢ် နတံၤသကိး တဂၤန့ၣ် အဂီၢ်လီၤ. ခဲအံၤ, အ၀ဲသ့ၣ် ခံဂၤလၢာ် ကအိၣ်ဆူၣ်ထီၣ်က့ၤလီၤ.
ကသံၣ်သရၣ် မၤစၢၤတၢ်တဂၤအံၤ, အစုမ့ၢ်ဘၣ်အၢ လၢတၢ်သွံၣ် သနာ်က့, လၢယွၤအမဲာ်န့ၣ် အစုကဆှီ ၀ဲလီၤ. ကျဲးစၢး မၤကဆှီှ နစုလၢ တၢ်အဲၣ်အတၢ်မၤ စၢၤ လၢနတံၤသကိး အဂီၢ် ဒီး နဒုၣ်နဒါ အဂီၢ် တက့ၢ်. နဂံၢ် ကဆူၣ်ထီၣ်၀ဲ တနံၤဘၣ်တနံၤ လီၤ.
