ရိမ့ၤ ၁၄း၇, အဂ့ၢ်ဒ်အံၤ ပတမူ ဘၣ်လၢ ပဂီၢ်ဒၣ် ၀ဲ နီတဂၤဘၣ်. ဒီးပတသံ ဘၣ်လၢ ပဂီၢ်ဒၣ်ပ၀ဲ နီတဂၤဘၣ်.ပှၤနီၣ်ကဘီယူၤဖိ ၄ ဂၤ ဘၣ်တၢ်ခးလီၤ တဲာ်အီၤ လၢတၢ်ဒုး ဖးဒိၣ် ခံဘျီတဘျီ လီၤ. အ၀ဲသ့ၣ် ဂုာ်ကျဲးစၢး မၤထူၣ်ဖျဲး အသးလၢ ဒုၣ်ဒါ အစုပူၤလီၤ. အ၀ဲသ့ၣ် ဒိးထီၣ်၀ဲ ချံလၢ တၢ်မၤအီၤလၢ ရီဘၢၣ် တဘ့ၣ် လီၤ. အ၀ဲသ့ၣ်အကျါ တဂၤလၢ အမံၤ ဖလွး (Floyd)န့ၣ်, မၤပြတီၣ်၀ဲ အခိၣ်ဒုးတစဲး ဒ်သိး မုၢ်သု တမၤဆါ အ၀ဲ သ့ၣ် ကဲၣ်ဆိးတဂ့ၤ န့ၣ်လီၤ. အ၀ဲသ့ၣ် ဘၣ်ဆိၣ်ဂ့ၤ မ့ၢ်လၢ အအိၣ်ဒီး တၢ်အီၣ် ဒီး ထံအဃိန့ၣ်လီၤ. အ၀ဲသ့ၣ် အိၣ် စ့ၢ်ကီးဒီး လံာ်စီဆှံ တဘ့ၣ် လီၤ. ကဘၣ်၀ၢ်အချံ ဆူလဲၣ် တသ့ၣ်ညါ၀ဲဘၣ်. အခီၣ်ထံး တနံၤ ဖလွး သး၀ံၣ် တၢ် တဘျုးယုၢ်, ခံနံၤတနံၤ မဲးခ်ဒီနၢၣ် ဟ့ၣ်ကူၣ်၀ဲလၢ အက ထုးထီၣ်ဖး လံာ်စီဆှံ ဘၣ်ဃး ဒီးစီၤပီလူး အတၢ်လဲၤ လၢ ထံကျါဒီး ဘၣ်န့ၢ် ကလံၤမုၢ်ဒီး အကဘီလီၤဘျၢၣ် အဂ့ၢ်လီၤ. သၢနံၤတနံၤ ဒဲနး ဟ့ၣ်ကူၣ်၀ဲ လၢ အကဘါထုကဖၣ် တၢ်လီၤ. လွံၢ်နံၤတနံၤ ကီးဖျါထီၣ်၀ဲ တဖျၢၣ်ဒီး ၀ၢ်ဃီၤ၀ဲဆူ ခိခိၣ် န့ၣ်လီၤ. အ၀ဲသ့ၣ် အိၣ်ဘှံး ၀ဲလၢ ထံကၢၢ်နံၤ, ဖလွး သး၀ံၣ်တၢ် ဒီး တၢ်ကလုၢ် သီၣ်ထီၣ်၀ဲ တခါဒ်အံၤ, “ခရံာ်အပှၤသ့ၣ်ဧၢ, ဟဲဆူ ယအိၣ် အံၤ, ယကဆှၢသုဆူ ခရံာ်အပှၤ အါအါဂီၢ်ဂီၢ် အကျါလီၤ.”
အ၀ဲသ့ၣ် လဲၤတုၤ၀ဲလၢ တၢ်လီၢ်ပျီ တခါ, အိၣ်၀ဲဒီး မံးရှၢၣ်နရံၤ အကၠိတဖျၢၣ် လီၤ. တၢၣ် အိၣ်၀ဲ တတၢၣ်လၢ တၢ်ကဆှၢဒီး ဖီၣ်န့ၢ် တၢ်ကစီၣ်အဂီၢ်လီၤ. အ၀ဲသ့ၣ် ဆှၢ၀ဲ တၢ်ကစီၣ်ဆူ အသုးမုၢ် အ၀ဲၤဒၢးလီၤ. မံးရှၢၣ် နရံၤဒီး အမါတူၢ်လိာ် အ၀ဲသ့ၣ် ဂ့ၤဂ့ၤကလဲာ် ဒီးပှၤနီၣ် ကဘီယူၤဖိ လွံၢ်ဂၤ လၢာ်သံကွၢ် အ၀ဲသ့ၣ် လၢ အဟဲ အိၣ်၀ဲ ဖဲန့ၣ် အဂ့ၢ်လီၤ. ဒီးအ၀ဲသ့ၣ် တဲဆၢ၀ဲ, ယဖုမ့ၢ် ၀ဲ မံးရှၢၣ်နရံၤ အဆိကတၢၢ် အကျါတဂၤ ဖဲ ကီး တဖၣ် အံၤန့ၣ်လီၤ. ပှၤကီးဖိတဖၣ် မၤသံယဖုလၢ အပူၤကွံာ် တဘျုးနံၣ်လံ န့ၣ်လီၤ. ယပၢ်ယမိၢ်ဒီး ယၤ ပဟဲ ကဒီးလၢ လီၢ်ခံလီၤ. ယပၢ်ဘၣ်န့ၢ် တၢ်ညၣ်ဂိၢ်ဒီး သံ၀ဲလီၤ. ယမၤလိ ဖျိခီလ့ၣ် ၀ံၤ ဒီးယဟဲဖဲ အံၤကဒီး လီၤ. တၢ်လၢ အကမၤမံ ပသး ဒိၣ်န့ၢ် တၢ်ထံၣ်ဘၣ် တၢ်သးခုကစီၣ် လဲလိာ်ပှၤသ့ၣ် တဖၣ်အံၤန့ၣ် တအိၣ်ဘၣ်. ပှၤကီးဖိ လၢအခိၣ်တကံဒံ တဖၣ် မ့ၢ်၀ဲ ခရံာ်ဖိ လၢအဂ့ၤကတၢၢ် တဖၣ်လီၤ. အ၀ဲသ့ၣ် မၤပူၤဖျဲး ပှၤကဘီ ယူၤ ဖိ အသးသမူ ပှဲၤဂၤန့ၣ် ပှၤလၢ အသ့ၣ်ညါ မ့ၢ်ဒၣ်ထဲ ယွၤတဂၤဧိၤ လီၤ. သုတမ့ၢ် ပှၤအခီၣ်ထံး တဖၣ်လၢ ပှၤကီး ဖိ တရၢအံၤ မၤထူၣ်ဖျဲး ၀ဲဘၣ်. မံးရှၢၣ်နရံၤ တဲတၢ်အံၤ ၀ံၤဒီး ပှၤကဘီ ယူၤဖိလွံၢ်ဂၤလၢာ် ဖျးလီၤအခိၣ်ဒီး ပာ်ဖျါ ထီၣ်အတၢ်စံးဘျုး ဒီးအတၢ်သးခုလီၤ. ပှၤကီးဖိ တဖၣ်မ့ၢ်၀ဲ ပှၤမံၤစကုာ်ဖိ လၢအအီၣ် ပှၤကညီလၢပျၢၤ တဖၣ် အညၣ်လီၤ. အ၀ဲသ့ၣ် မၤသံဒီး အီၣ်မံးရှၢၣ်နရံၤ တဂၤအံၤ အဖု အစၢၤအသွဲၣ် တဖၣ်လီၤ. အဃိ, ပှၤကဘီယူၤ ဖိလွံၢ်ဂၤအံၤ ဘၣ်တၢ်မၤ ပူၤဖျဲးအီၤလၢ ပှၤအီၣ်ပှၤကညီလၢပျၢၤ တဖၣ် အစၢၤအသွဲၣ် လီၤ.
