ကတိၤဒိ ၂၃း၂၃, ပှ့ၤတၢ်မ့ၢ် တၢ်တီ တက့ၢ်. ဒီးဆါကွံာ် အီၤတဂ့ၤ. ဒီးတၢ်ကူၣ်သ့, ဒီးတၢ်သိၣ်လိ, ဒီးတၢ်ကူၣ် တၢ်ဆး န့ၣ်တက့ၢ်.စ့ရၢၣ်လ် မ့ၢ်အဲကလံး ပိာ်ခွါဖိ လၢအသးအိၣ် ၉ နံၣ်တဂၤလီၤ. တၢ်ထံၣ်န့ၢ် အီၤလၢ ကီၢ် အဲကလံး အကဘီတဘ့ၣ် လၢ အဟးထီၣ်၀ဲ လၢ ၀့ၢ်လ့ဘၢၣ်ဖူလ် ဒီးလဲၤ၀ဲဆူ ၀့ၢ်နူယီး ၄ သီ ၀ံၤအလီၢ်ခံ လီၤ. တၢ်လဲၤစိာ် အီၤဆူ ကဘီခိၣ် အအိၣ် ဒီး ကဘီခိၣ် သံကွၢ်အီၤ, မတၤဟဲ ပာ်နုာ်နၤ လၢကဘီ အံၤအပူၤ လဲၣ်.
ယပၢ်ယၢ်လီၤ. အ၀ဲလုၢ်အီၣ်ယၤ တန့ၢ်ဘၣ်. ဟ့ၣ်ကဘီလဲ လၢယဂီၢ်စ့ၢ်ကီး တန့ၢ်ဘၣ်. ယကလဲၤ ဆူ ယမုၢ်ဂၢ် လၢ အထူးတီၤတဂၤ အအိၣ်ဒီး အ၀ဲကပျဲ ယအိၣ်ဒီး အီၤလီၤ. ဖိသၣ်အံၤ ပာ်အမဲာ် လ့ကဒ့ လီၤ. ပှၤကွၢ်အီၤဒီး ပှၤစံးလၢ အကတိၤ တၢ်တီတီလီၤ. ဘၣ်ဆၣ် ကဘီခိၣ် တခီဆိကမိၣ် ဒံး၀ဲလၢ ကဘီဖိ တဂၤဂၤ ဟဲပာ်ခူသူၣ် အီၤဒီး အဲၣ်ဒိးဟ့ၣ် တၢ်အဒိအတဲာ် လၢပှၤကဘီဖိ ပာ်ခူသူၣ် ပှၤဒ်အံၤ ဆူလီၢ်ခံ သုတဘူၣ်လၢၤ တဂ့ၤ န့ၣ်လီၤ.
ကဘီခိၣ်အံၤ သံကွၢ် စ့ရၢၣ်လ် ခဲအံၤခဲအံၤ လၢမတၤ ဟဲပာ်ခူသူၣ် အီၤလၢ ကဘီပူၤ အံၤလဲၣ်. ဒီးမတၤ ဒုးအီၣ်အီၤ တၢ်အီၣ်လဲၣ် န့ၣ်လီၤ. ကဘီခိၣ် မၤတပျုာ်တပျီၢ် အီၤဆါဆါ ကလဲာ် နာ်သက့ ဖိသၣ်အံၤ အတၢ်စံးဆၢ မ့ၢ်တၢ်ဒ် လီၢ်လီၢ်လီၤ. တဲဒၣ်၀ဲ သါတသ့ၣ်ညါ ပှၤကဘီဖိ နီတဂၤဘၣ်. ဒီးတဒုးအီၣ်အီၤ တၢ်အီၣ် နီ တဂၤဘၣ်. တဘျီအံၤ ကဘီခိၣ် ကတိၤပျံၤအီၤ အဆူၣ်ကတၢၢ် ဒ်သိး ကဘီဖိ ပာ်ခူသူၣ် ပှၤဆူခံ သုတဘူၣ် လၢၤ နီတဘျီ တဂ့ၤန့ၣ်လီၤ.
ကဘီခိၣ် ဖီၣ်စ့ရၢၣ်လ် အဆ့ကၤ အဖီလာ်ဒီး မူၤတရူာ် ဖိသၣ်န့ၣ် လၢ ကဘီအဒါ အဖီခိၣ်, ဟ့ၣ်၀ဲ တၢ်ဆၢကတီၢ်ထဲ အမံးနံး ၁၀ လၢအကတဲ တၢ်တီတီ အဂီၢ် န့ၣ်လီၤ. နကအိၣ်မူ ဘၣ်ထဲ အမံးနံး ၁၀ လီၤ. ပှ့ၤက့ၤ နသးသမူ ဒီးတဲတၢ် တီတီတက့ၢ်. ဖိသၣ် အမဲာ်ထံလီၤဆှု၀ဲ ဒီး ပှၤကဘီဖိ လၢအအိၣ် ၀းတရံး အီၤ တဖၣ် အကိာ်ယူၢ် လီၤတကံး၀ဲ လီၤ. အိၣ်တ့ၢ် ထဲ ခံမံးနံး လီၤ. ဖိသၣ်အံၤ သံကွၢ်၀ဲ ယဘါထုကဖၣ် တၢ်သ့ဧါ. ယစံးဆၢန တၢ်သံကွၢ် ကိးဘျီဒဲး မ့ၢ်၀ဲ တၢ်လၢ အတီ၀ဲ ကိးဘျီဒဲးလီၤ. ကဘီခိၣ်အံၤ ဖျးလီၤအခိၣ်, ဖျါလီၤ၀ါ၀ဲ ဒ်ပှၤကလၤဟး အသိး ဒီးကနိး၀ဲ ဒီဂၤညါလီၤ. ဖိသၣ် တီၤလီၤ လ့ၢ်ခီၣ်၀ဲ, ထိးဖှိၣ် အစုညါသး ဒီး ကွၢ်ထီၣ် တၢ်ဆူမူခိၣ် လီၤ. ပှၤဟီၣ်သီၣ် လၢကဘီဖိ အကျါဒီး လၢပှၤကမျၢၢ်ဒိး ကဘီ တဖၣ်အကျါလီၤ. လီၤသး ကညီၤ ဒီးလီၤတကဲးသူၣ် တကဲးသးလီၤ.
ကဘီခိၣ် ဟၢဃာ် စ့ရၢၣ်လ် လၢအသးနါပှၢ်ဒီး တဲ၀ဲ, ခဲအံၤယနာ် နတၢ်တဲ လံ. ယသးခုဒိၣ်မး လၢ နကတူၢ်သံ နသးတခီ ဒီး နတတဲ တၢ်လၢ အတတီ ဘၣ်န့ၣ်လီၤ. ယွၤဆိၣ်ဂ့ၤ ဘၣ်နၤဒီး မ်အဟ့ၣ်နၤ တၢ်အိၣ်မူ လၢအမုာ် လၢနတၢ်အိၣ် မူဒီး နမုၢ်ဂၢ် တက့ၢ်.
ဖိသၣ် စ့ရၢၣ်လ် ပှ့ၤတၢ်မ့ၢ်တၢ်တီ ဒီးပှ့ၤ၀ဲလၢ အသးသမူ လီၤ. ကဘီခိၣ် နာ်အတၢ် ကတိၤဒီး တမၤသံ အီၤဘၣ်. အသးသမူ အိၣ်၀ဲဒီး အတၢ်ကတိၤ အတၢ်မ့ၢ် တၢ်တီ အိၣ်မူ၀ဲလီၤ.
