ကလၤ ၆း၉, ပမၤတၢ်ဂ့ၤန့ၣ် မ်ပသု တလီၤဘှံးလီၤတီၤ တဂ့ၤ. အဂ့ၢ်ဒ်အံၤ, ပမ့ၢ် တလီၤဘှံးဘၣ်ဒီး, တုၤအမုၢ် အလါဘၣ်ဒီး, ပကကူးတၢ်န့ၣ်လီၤ.ပစးထီၣ်မၤတၢ် တမံၤမံၤန့ၣ် မ့ၢ်တၢ်တူၢ်ဒိၣ်ကီၤဒိၣ် အပနီၣ်လီၤ. ပမ့ၢ်မၤအီၤ တုၤအ၀ံၤဒီး မ့ၢ်၀ဲ တၢ်ဂ့ၤန့ၢ် ဒိၣ်န့ၢ် တၢ်အပနီၣ်ဧိၤ န့ၣ်လီၤ. ဧ့ၤြဘံၤ ၁၀း၂၃ တဲပှၤလၢ “ခရံာ်တအဲၣ်ဒိးလၢ ပကမၤတၢ် တမံၤမံၤ ထဲတကူာ်လာ် ဖးဖီ ဘၣ်. စံး၀ဲပှၤလၢ အဟံးထီၣ် ထဲၣ်ဘိဒီး ကွၢ်က့ၤ တၢ်ဆူ အလီၢ်ခံန့ၣ်, တြကၢးဘၣ်ဒီး ယွၤ အဘီအမုၢ် နီတဂၤ ဘၣ်.
ပကမၤန့ၢ် တၢ်လၢပအဲၣ်ဒိး, ပကမၤနၢၤတၢ်လၢ ပဘၣ်ဂုာ်သြတီၤ အီၤအဂီၢ် န့ၣ်လိၣ်၀ဲ တၢ်သးစွံကဒံ လီၤ. ကိၤလၤကိး၀ဲ Persistence လီၤ. ပှၤလာ်ခီ ကိး၀ဲ တၢ်ပာ်ပသး ဘုစကု လီၤ. အဒိတခါ, လၢကီၢ်ဖိ စိၣ်မါလံလဲ, ကးပလံၣ်ကီၢ်န့ၣ်, တဘျီ မံးရှၢၣ်နရံၤ တဂၤ အဲၣ်ဒိးဒိးန့ၢ်၀ဲ ဆၣ်ဖိကီၢ်ဖိ အမံၤတဖၣ် အဂီၤ လီၤဆီဒၣ်တၢ် ခ့ယုၢ် အဂီၤန့ၣ်လီၤ. ခ့ယုၢ် ဒီမိၢ်ဖါ ဖးဒိၣ်ခံဒု အိၣ်၀ဲလၢ သ့ၣ်တၤဆှုၣ် တခိၣ်အဖီလာ် လီၤ. ကးပလံၣ် အဒူ ၁၁ ဂၤစ့ၢ်ကီး အဲၣ်ဒိး ပာ်ဖျါထီၣ် အတၢ်သးဒူဒီး မၤလီၤမၢ်ကွံာ် တၢ်ဒူတၢ်ဃိၤ တဒုအံၤ လၢပှၤထံဖိကီၢ်ဖိ အဂီၢ် လီၤ. သရၣ်ဒိတၢ်ဂီၤ တဂၤ အထွံၣ်အိၣ်၀ဲ တဒု ကိး၀ဲအမံၤလၢ ဖံးဖ် ဒီး ထံွံၣ်အံၤစ့ၢ်ကီး အဲၣ်ဒိးမၤတၢ်လၢ တၢ်ဒူတၢ် ဃိၤ အကျါလီၤ. ဖဲပှၤဒူပှၤဃိၤ ၁၁ ဂၤအံၤ သုးဘူးဃီၤ အသးလၢ အကတဖှိ မၤဒၢၣ်ခ့ယုၢ် အိၣ်ဒီးအဘီ သ့ၣ်တဖၣ် လၢအခိၣ် ထိၣ်ဃီၤပာ် အသးလၢ တၢ်မဲာ်ညါ န့ၣ် ခ့ယုၢ်ခံဒုန့ၣ် ဟဲထီၣ်၀ဲ စ့ၢ်ကီးလီၤ. အမိၢ်တဒု စံၣ်ဖျဲး ကွံာ်၀ဲလီၤ. အဖါတဒု တခွ့ဃီၤ၀ဲဆူ တၤဆှုၣ်တပှီာ် တဖၣ်လၢ အအိၣ်လၢ ထံကျိဖိ တဘိလၢ အထံ လီၤသံးလံ န့ၣ်လီၤ. ခ့ယုၢ်အံၤ တအိၣ်ဖျါ၀ဲဘၣ်. ဒီးလဲၤ၀ဲဆူ လဲၣ်တကပၤ ပှၤဒူ ၁၁ ဂၤ တထံၣ်၀ဲဘၣ်. မ့မ့ၢ် ထံွၣ် ဖံးဖ် တဒု တဖှိနုာ်၀ဲလၢ တၤဆှုၣ် တပှီာ်ပူၤဒီး လီၤမၢ်၀ဲစ့ၢ်ကီး လီၤ. တစိၢ်ဖိဒီး ခ့ယုၢ် ကညီၤသီၣ်၀ဲလီၤပျံၤ လီၤဖုးဒီး ထွံၣ် ဖိစ့ၢ်ကီး မီၤက့မီၤကါ တၢ်သီၣ်၀ဲလီၤ.
ပှၤအဒူတဖုအံၤ လဲၤလီၤ အိၣ်ဖှိၣ် ၀ဲလၢထံ ကျိအကျိ ပူၤလၢ ထံတအိၣ်ဘၣ် န့ၣ်လီၤ. တစိၢ်ဖိ ဒီးတဲသကိး ၀ဲ ခ့ယုၢ်အ့ၣ်သံလံ ပှၤဒူအကျါ တဂၤန့ၣ်လီၤ. ပှၤဒိတၢ်ဂီၤ တဂၤလဲၤ၀ဲ ကယီကယီ ဆူထံကျိ ပူၤဒီး ထံၣ်၀ဲ ခ့ယုၢ်သံ ဒီးကးပလံၣ် မံနီၤ၀ဲဖဲ အကပၤန့ၣ်လီၤ. ပှၤမံနီၤ တဂၤအံၤ ဂဲၤဆၢထၢၣ် ၀ဲဒီး ဒုးနဲၣ်အစု လၢအအိၣ်ဒီး တၢ်သွံၣ်န့ၣ်လီၤ. အသကိးတဖၣ် ကမၢကမၣ် ၀ဲဖဲ အဆိကမိၣ်၀ဲလၢ အသံလံ န့ၣ်လီၤ. အ၀ဲပူၤဖျဲး၀ဲ ဒ်လဲၣ်. တၢ်မၤ အသးဒ်အံၤလီၤ. ထွံၣ်တဒု အံၤ အ့ၣ်ခ့ယုၢ် အမဲၢ်ချုး လၢညါဒီး အ့ၣ်တံၢ်ဃာ်၀ဲ ကျၢၤကျၢၤ, အ့ၣ်ဆ့ဆိ ၀ဲတဘျီတဘျီဒီး တပျဲ၀ဲဘၣ်. ခ့ယုၢ်မ့ၢ်သါ ကဃၣ်ကဒါ အသးလၢ အကအ့ၣ် အီၤအဂီၢ် န့ၣ် အ၀ဲဃၣ် စ့ၢ်ကီး အသး လီၤ. ခ့ယုၢ် အမဲၢ်တခီ တပျဲ၀ဲဘၣ်. ဖဲခ့ယုၢ် ဂုာ်လိာ်လၢ အကအ့ၣ် ထွံၣ်အဂီၢ်န့ၣ် ပှၤဒူတဂၤအံၤ ဟဲဘူး ဃီၤဒီး ဆဲးခ့ယုၢ် အသးလၢ အဘီန့ၣ်လီၤ. ဖဲပှၤဒူတဂၤအံၤ သါကသုးကွံာ် ခ့ယုၢ်အစိၣ်န့ၣ် ထွံၣ်တခီ တပျဲအီၤ ဘၣ်. ဆိကမိၣ်လၢ အအ့ၣ်ခ့ယုၢ် န့ၢ်လံဒီး မ့ၢ်အတၢ်အဃိ တအဲၣ်ဒိး ပှၤဂၤဟံးန့ၢ် အတၢ်ဘၣ်. လၢတၢ်န့ၣ်အဃိ အ၀ဲအ့ၣ် ကးပလံၣ် အစုတုၤအသွံၣ်လီၤ အါအါ ကလဲာ်န့ၣ်လီၤ. ထွံၣ်အံၤ အိၣ်ဒီး တၢ်သးစွံကဒံ န့ၣ်လီၤ.
