မးသဲ ၁၆း၂၄, ပှၤမ့ၢ်မိၢ်ပိာ် အသးလၢယခံ တဂၤဂၤန့ၣ်, မ်အညိကွံာ် အသးဒၣ်၀ဲ, ဒီးဟံးန့ၢ် အထူၣ်စုညါ, ဒီး ပိာ်ယခံ တက့ၢ်.ခရံာ်စံး၀ဲ, ပမ့ၢ်အဲၣ်ဒိး ပိာ်အခံန့ၣ်, ပကဘၣ်ပာ် ကွံာ် တၢ်အဲၣ်လီၤသး, ပဘၣ်ဟံးန့ၢ် ပထူၣ်စုညါ ဒီး ပိာ်အခံ လီၤ. ထူၣ်စုညါမ့ၢ်၀ဲ တၢ်တူၢ်ဘၣ် ခီၣ်ဘၣ်, တၢ်နးတၢ်ဖှီၣ်, တၢ်၀ံတၢ်ဃၢ လၢအဂီၢ်, ဒီး ပိာ်ထီၣ် အခံန့ၣ်လီၤ. ခရံာ်တဲ ကဒီးလၢ အဂၤတတီၤ လၢပမ့ၢ် မၤစၢၤ ပှၤလၢအလိၣ် တၢ်မၤစၢၤ, ပှၤလၢ ပဃၢၤဒီး မ့ၢ်ပမၤ လၤကပီၤ ခရံာ်လီၤ. ပမ့ၢ်မၤလၤကပီၤ ခရံာ်ဒီး မ့ၢ်တၢ်သကဲာ် ပ၀းလၢ အဂ့ၤလီၤ. တၢ်သကဲာ်ပ၀း အဂ့ၤဒ်အံၤ တကလုာ် ပပှ့ၤအီၤန့ၣ်, ပပှ့ၤအီၤလၢ ကျိၣ်လၢစ့ တန့ၢ်ဘၣ်. မ့မ့ၢ် ပမၤန့ၢ်အီၤသ့ထဲ လၢ တၢ်ညိကွံာ် ပသးလၢ ခရံာ်အဂီၢ်, လၢပှၤလၢ ပဃၢၤအဂီၢ် ဒီးလၢ ပကစၢ်အဂီၢ် ဒၣ်၀ဲလၢ ခံကတၢၢ်န့ၣ်လီၤ.
စၢန်ဒၣ်, မ့ၢ်ကီၤလၤသူ တဂၤလၢ အအိၣ်လၢ ကီၤလၤသူ ကီၢ် အကလံၤစိး လီၤ. အ၀ဲအသး ခုဒိၣ်မး လၢအထံၣ် န့ၢ် တၢ်အုၣ်က့ၤခီၣ်က့ၤလၢ ခရံာ်အအိၣ်ဒီး ဟ့ၣ်လီၤအဂံၢ်အဘါ ခဲလၢာ်ခီဖျိ အတဲဘၣ် ပှၤဂၤလၢ တၢ်စူၢ်တၢ်နာ် လၢအထံၣ်န့ၢ်၀ဲန့ၣ်လီၤ. မုၢ်အိၣ်၀ဲတနံၤလၢ အ၀ဲဘၣ်လဲၤတၢ် ခီဂာ် ကစၢၢ်ဖးဒိၣ်တဖျၢၣ်န့ၣ် လီၤ. လၢအတၢ်လဲၤ ကျဲန့ၣ်, မူခိၣ်ဖီကလံၤမုၢ်လီၤ, ၀ဲဒီး တၢ်ဂိၢ်တၢ်ခုၣ်ဒိၣ်ဒိၣ် ကလဲာ်လီၤ. အ၀ဲဘၣ်လဲၤ သကိးဃုာ်တၢ်ဒီး ပှၤလၢ အကလဲၤဆူ ကီၢ်တံဘ့ၣ် တဂၤန့ၣ်လီၤ. တၢ်ဂိၢ်တၢ်ခုၣ် တုၤဒၣ်လဲာ် အ၀ဲသ့ၣ် ခံဂၤလၢာ် အသးဟးဂီၤလၢ လဲၤတၢ် တတုၤဘၣ်ဖုး လီၤ. အဝဲသ့ၣ် ထံၣ်ဘၣ်၀ဲ ပှၤအဂၤတဂၤ လၢအလဲၤ တၢ်လၢ အမဲာ်ညါ, အခီၣ်တလံာ်ဒီး လီၤတလ့ၢ်ဆူ ကျဲအြတီၤလာ် လီၤ. စၢန်ဒၣ် ကွဲ အသကိး တဂၤန့ၣ်လၢ ကလဲၤလီၤ မၤစၢၤအီၤ ဒီးဆှၢအီၤဆူ သ၀ီ လၢအဘူးတဖျၢၣ် န့ၣ်လီၤ. ဘၣ်ဆၣ်ဒီး ကွဲ၀ဲတန့ၢ် ဘၣ်. ပှၤန့ၣ် တဲ၀ဲလၢ အမၤပူၤ ဖျဲးလီၤ အသးဒၣ်၀ဲ မ့န့ၢ် န့ၣ်အါတ့ၢ်မး လံလီၤ. ပမ့ၢ် မၤစၢၤ ကကဲထီၣ် က့ၤ တၢ်ကီလၢ ပဂီၢ် တခီ လီၤ. လၢတၢ်န့ၣ်အဃိ, အ၀ဲသ့ၣ် လီၤဖးလိာ် အသးလီၤ.
စဲန်ဒၣ် လဲၤလီၤ ထဲတဂၤဧိၤ, ဟံးထီၣ် ပှၤလီၤတဲာ် တဂၤန့ၣ်, ဒီးပုထီၣ် အီၤဆူ ကျဲခိၣ်လီၤ. အ၀ဲဘၣ်ဟဲ က့ၤထီၣ် ကဒါက့ၤ တၢ်ဘံပၤန့ၣ် ကီကီခဲခဲ လီၤ. မ့ၢ်လၢ မူခိၣ်ဖီ ကးဘၢဟီၣ်ခိၣ် ဒီး တၢ်ဘျ့အဃိ, အစုတပျာ် ခီၣ်တပျာ် ဒီးပှၤလၢ အဟဲက့ၤ ယိး၀ဲ တဂၤစ့ၢ်ကီး ဃၢဒိၣ်မး န့ၣ်လီၤ. တၢ်ဘှံးအသး ဒိၣ်ဒိၣ်ကလဲာ်, သါသဖှိ၀ဲ, ကအုကစွါ၀ဲလီၤ. ဘၣ်ဆၣ် ထီၣ်၀ဲ ထီၣ်ဘးဆူ ကျဲခိၣ်ဒီး လဲၤကဒီး တၢ်လီၤ. အ၀ဲထံၣ် အသကိး လၢအဟးဖးဒီး အီၤ တဂၤ ဆ့ၣ်နီၤအိၣ်ဒီး ကိးအီၤန့ၣ် ကိး၀ဲတဟူလၢၤဘၣ်. တုၤအ၀ဲလဲၤ ဆူအအိၣ် ဒီးထံၣ်၀ဲလၢ အသံလံ န့ၣ်လီၤ. လီၤတကၤ လၢတၢ်ဂိၢ်ဒိၣ်အဃိ လီၤ. မ့မ့ၢ် စၢန်ဒၣ်ဒီး ပှၤလၢအအိၣ်လၢ အချၢ တဂၤ အမိၢ်ပှၢ် အသ၀ံ ဒိလိာ်အသး ဒီးလၢၤ၀ဲန့ၣ်လီၤ. အိၣ်မူဘၣ်၀ဲ ခံဂၤ လၢာ်လီၤ. စၢန်ဒၣ် ညိကွံာ် အသးလၢ ပှၤလၢအကသံ တ့ၢ်မး တဂၤ အဂီၢ်ဒီး ဘၣ်ဘျုးဘၣ်ဖှိၣ် ၀ဲ ခံဂၤလၢာ် လီၤ.
