စံး ၃၄း၇, ယွၤအကလူးသူၣ်ဒဲ ၀းတရံးပှၤလၢ အပျံၤအီၤဒီး မၤပူၤမၤဖျဲးအီၤလီၤ.ပတၢ်ကလုၢ်ထူလၢ တနံၤအံၤ အဂီၢ်မ့ၢ် လံာ်စီဆှံ တဆၢလၢ ပဘၣ်သဂၢၢ် အီၤအအါ ကတၢၢ် အကျါလၢ ယွၤဒုးနဲၣ် ဖျါထီၣ်အီၤလၢ ပှၤန့ၣ်လီၤ. တူၢ်ဒိၣ်မုၣ်တဂၤ လၢအအိၣ်လၢ ကီၢ်နီ၀့ၣ် ဒီးအမံၤမ့ၢ် မ့ရံၣ် အီလစၢၣ် လီၤ. အ၀ဲပာ်လီၤအသးလၢ အကလဲၤဆူ ကီၢ်အမဲရကၤ လၢအကဒိးတ့ဒိးဖျီ အသးဒီး အတၢ်အဲၣ်တီ လီၤ. ကလဲၤဒိး၀ဲ ကဘီလၢ တၢ်ကိးလၢ ထၣ်ထဲးနံးခ်, လၢအမ့ၢ် ကဘီအဒိၣ်ကတၢၢ် လၢစိၤအ၀ဲန့ၣ် လီၤ. ကဘီအံၤ ပှၤအဲကလံးဖိလၢ အဘှီအီၤ တဖၣ်စံး၀ဲ လၢလီၤဘျၢၣ် ၀ဲတသ့ဘၣ် န့ၣ်လီၤ. ကဘီအံၤ အတၢ်လဲၤ အဆိကတၢၢ် ကမ့ၢ်၀ဲဖဲ လါအ့ြဖ့ၣ်, ၁၉၁၂ နံၣ်န့ၣ်လီၤ. တၢ်ဆၢကတီၢ် ကတုၤဃီၤဒီး တူၢ်ဒိၣ်မုၣ်အံၤ ဟးထီၣ်လၢအကီၢ် လဲၤ၀ဲ ဆူကီၢ်အဲကလံး န့ၣ်လီၤ. အ၀ဲဆါထီၣ်သတူၢ်ကလာ်, ဘၣ်န့ၢ်တၢ်လိၤကိၢ်, ကိာ်ယူၢ်ဆါအဃိ, ဘၣ်အိၣ်၀ဲ လၢဟိၣ်ထဲလ် တဖျၢၣ်ဒီး လဲၤတၢ်တသ့ ဘၣ်ဒီး အသးဟးဂီၤ ဒိၣ်မးလီၤ. ကဘီဖးဒိၣ် အံၤလဲၤဘၣ် ထံး၀ဲဒီး ထံလီၤတကၤ ဖးဒိၣ်တလိၣ်ဖဲ အလဲၤတၢ်လၢ ကျဲအခါ အဃိ လီၤဘျၢၣ်ကွံာ်၀ဲလီၤ. ပှၤဒိးကဘီ ခဲလၢာ် အဂၤ ၂၂၀၀ န့ၣ်လီၤအုး သံ၀ဲ အဂၤ ၁၅၀၀ ဘျဲၣ်န့ၣ်လီၤ. လီၢ်ခံတနွံဃၣ်ဃၣ် မ့ရံၣ် အီလစၢၣ် ဒိးထီၣ်ကဘီ အဂၤ တဘ့ၣ် ဒီးလၢကျဲ တီၤန့ၣ် ပှၤကဘီဖိ ဒုးနဲၣ်အီၤ လၢထံလီၤတကၤ ဖးဒိၣ် လၢထၣ်ထဲနံးခ် လီၤဘျၢၣ်၀ဲ အဃိ န့ၣ်လီၤ. အ၀ဲစံး၀ဲ, မ့ၢ်ယွၤ အတၢ်ကျဲၤလၢ အဂီၢ် လၢအတဒိးဘၣ် ကဘီန့ၣ် အဃိလီၤ.
မံးရှၢၣ်နရံၣ် သရၣ်မုၣ် အဲလစံၣ် ရီစၢၣ် ကဘၣ်လဲၤ၀ဲဆူ ကးလးကးတါ လၢမံးရှၢၣ် တၢ်မၤအဂီၢ် ဒီးမၢ၀ဲ တၢ်အိၣ်ဖှိၣ် သရၣ်လၢ ၀့ၢ်မၣ်ြဒး တဂၤ ကကျဲၤန့ၣ်အီၤတၢ်လီၢ် လၢလ့ၣ်မ့ၣ်အူ လၢအကလဲၤ ၀ဲဆူ ကးလးကး တါ န့ၣ်လီၤ. တၢ်အိၣ်ဖှိၣ်သရၣ်အံၤ မၤလဲးမး လၢမးမးရီစၢၣ် အဂီၢ် တန့ၢ်ဘၣ်. လ့ၣ်မ့ၣ်အူ တဆိလၢ မးမး အံၤ တိာ်ပာ် ၀ဲလၢ အကဒိး၀ဲ န့ၣ်, ဘျၢၣ်လိာ်အသးဒီး လ့ၣ်မ့ၣ်အူ လၢအတီၣ် တၢ်ပဒၢး တဆိအဃိ, ပှၤသံအါဂၤဒီး ဘၣ်ဒိဘၣ်ထံး၀ဲ အါဂၤန့ၣ်လီၤ. မးမးအံၤ သ့ၣ်ညါက့ၤ၀ဲလၢ ယွၤကတဲာ်ကတီၤ တၢ်ဂ့ၤ လၢအဂီၢ် လၢအတဒိး ဘၣ်လ့ၣ်မ့ၣ်အူ တဆိန့ၣ်လီၤ. ယွၤအကလူး အိၣ်၀ဲ ထီဘိလၢ အကသူၣ်ဒဲ ၀းတရံး ပှၤအဂီၢ်လီၤ. လိၣ်လၢ ပ၀ဲဒၣ် တခီ ပကဟ့ၣ် အခွဲး လၢအကသူၣ်ဒဲ ၀းတရံးပှၤ န့ၣ်လီၤ.
