ကတိၤဒိ ၂၀း၂၂, ယကဟ့ၣ်ကၣ် တၢ်အၢန့ၣ် စံးတဂ့ၤ. အိၣ်ခိးယွၤတက့ၢ် ဒီးအ၀ဲဒၣ် ကမၤစၢၤနၤလီၤ. ဖဲးြထံးခ် မဲးချဲရဲၣ်, မ့ၢ်ပိာ်ခွါ လၢအပ့ၢ်အချ့ဒီး ကၠိဖိ အါတက့ၢ် ပာ် ကဲအီၤလီၤ. နွံတီၤကၠိဖိ လၢအမၤလိ လံာ်ဒီး အီၤ တဖၣ် ဟ့ၣ်အီၤ တၢ်ယူးယီၣ်လၢ အမ့ၢ် ပှၤအဖၠဲးကတၢၢ် လၢတီၤပူၤ န့ၣ်လီၤ. အတၢ်အိၣ်ဖျဲၣ် ဆၢက့ၤအလီၢ် ဘၣ်၀ဲဒီး အမိၢ် ဖီန့ၢ်အီၤ ကိၣ်အ၀ံၣ်အဘဲလၢ ကမၤတၢ်သး ဖှံအဂီၢ် လီၤ. ဖဲ အမိၢ်ဖီတၢ် အခါ ဖဲးြထံးခ် ဒီးအဒီပုၢ်၀ဲၢ်မုၣ် ရံၣ်ကၠံနၣ် ဟဲနုာ်ဆူ အအိၣ်လီၤ. အမိၢ်ထံၣ်၀ဲလၢ အမဲာ်လီၤသပှၢ်၀ဲဒီး တသူၣ်ခုသးခု ဘၣ်. အမိၢ်သံကွၢ်အီၤ, ဘၣ်ဒံးလဲၣ် ယဖိခွါ ဧၢ, ရံၣ်ကၠံနၣ် တဲဘၣ်အမိၢ်လၢ ဖဲးြထံးခ် အ့ၣ်လိာ်အသး ဒီး ကၠိဖိတဂၤလၢ အမံၤမ့ၢ်၀ဲ မးခ် ဟဲလိၣ်ရဲ လီၤ. အမိၢ်သံကွၢ် အီၤ, နမၤဒ်န့ၣ် ဘၣ်မနုၤလဲၣ်. အ၀ဲ အနီၢ်ဆံးန့ၢ် နၤတစဲးလီၤ. ရံၣ်ကၠံနၣ် ကတိၤတၢ်လၢ ဖဲးြထံးခ် အဂီၢ်လီၤ. ယဲ ယတပာ် တၢ်ကမၣ်လၢ အလိၤဘၣ်. မးခ် ဟဲစးထီၣ်အီၤလၢညါ ထုးလီၤရၤ ၀ဲအလံာ်တဖၣ် လၢအစိာ်၀ဲလၢ အစု, ကိးဆါ အမံၤဒီး ကွံာ်အီၤလၢ လၢၢ်လီၤ. နတြကၢးဒူ အလိၤဘၣ်. အ၀ဲ ကဘၣ်ဟံးဃာ် အလၤကပီၤလီၤ.
အမိၢ်တဲ အ၀ဲသ့ၣ် လၢပှၤအါ ဂၤ အတၢ်ပာ် အသးမ့ၢ် တၢ်ဒ်န့ၣ်လီၤ. ဘၣ်ဆၣ် အ၀ဲန့ၣ် တြကၢး ဘၣ်ဒီး ပှၤခရံာ်ဖိဘၣ်. ဖဲးြထံးခ် တဲအမိၢ်, ယဟ့ၣ်အီၤ တၢ်စံၣ်ညီၣ် ဆါဆါ, ယထိ နံးနူး အီၤတုၤ အဂဲၤထၢၣ် ၀ဲတန့ၢ်ဘၣ်ဒီး တမ့ၢ်လၢ အကမၤဘူး ယၤလၢၤဘၣ်. အမိၢ် တဲအီၤ, ဖိခွါဧၢ, နမၤဒ်န့ၣ် တြကၢးဘၣ်. ပှၤလၢ ကသိၣ်က့ၤသီက့ၤ မးခ်ဒ်သိး ကမ့ၢ် ပှၤအဂ့ၤ တအိၣ်နီတဂၤဘၣ်. အ၀ဲမ့ၢ် ပှၤအဖှီၣ်ဒီး ဘၣ်အိၣ်ဒီး အပၢ် လၢအမူၤ သံးထီဘိ ဒီး ဆိၣ်တၢ်ဆူၣ် မးတဂၤလီၤ. ယသးအုး လၢနမၤဒ်န့ၣ် လီၤ. ဖဲးြထံးခ် အိၣ်ဘှ့ၣ်ဒီး တတဲ တၢ်နီတမံၤ ဘၣ်.
အမိၢ်တဲအီၤ, တနံၤအံၤ မ့ၢ်နတၢ်အိၣ်ဖျဲၣ် ဆၢက့ၤ အနံၤလီၤ. အဃိ ပကအီၣ်သကိးဟါ အတၢ်အီၣ် ဒီး ပကကွဲ စ့ၣ်ကီး ဒီန်ဟဲးဖရဲၣ် (Don Heffren) ဒီးအမိၢ်လီၤ. ဖဲးြထံးခ် ဂံၤဂုၤ အခိၣ်တဲ၀ဲ, ပတကွဲ အ၀ဲသ့ၣ် တဟါ အံၤဘၣ်. ဒီန် ဟဲးဖရဲၣ် အိၣ်ဒီး တၢ်ကိးမံၤ ဒဲးလၢ အကမၤ သးဖှံအသး လီၤ. ယအဲၣ်ဒိးကွဲ မးခ် ဟဲလိၣ်ရဲ ဒီးအပုၢ် ပိာ်ခွါ တခီ, ဒီး ယကလဲၤ ကွဲလၢ ယကစၢ်လီၤ.
မးခ် ဟဲဒီး အပုၢ်လီၤ. အီၣ်တၢ်အခါ ဖဲးြထံးခ် ကတိၤကသွံ တၢ်ဒီး အမိၢ် လၢအ ကဟ့ၣ် ဒုးအီၣ် အ၀ဲသ့ၣ်လၢ ကိၣ်အလိၣ် ဒိၣ်ဒိၣ်တဖၣ် လီၤ. အ၀ဲသ့ၣ် အီၣ်တၢ် ဆၢဆူၣ် ဆၢပနၤ ဒီး တုၤအက့ၤန့ၣ်, အမိၢ်ဟ့ၣ်လီၤထွဲ တၢ်ဘိၣ် တဘိၣ်လၢ အအိၣ်ပှဲၤဒီး အံသၣ်ဆၢ ကိၢ်လိၣ် တဖၣ်န့ၣ်လီၤ.
တနွံပှဲၤထီၣ် ဒီးဖဲးြထံးခ် တဲ၀ဲလၢ တၢ်ဘၣ်ဂံာ်ဂူာ် တအိၣ်လၢၤဘၣ်. ခဲအံၤ မးခ် မ့ၢ်၀ဲ သါ တံၤသကိး လၢအပိာ်သါ ခံထီဘိ လီၤ.
