၂ တံၤမသ့း ၄း၇ တၢ်ဒုးလၢ အဂ့ၤန့ၣ် ယဒုးလံ, တၢ်ဃ့ၢ်န့ၣ် ယဃ့ၢ်လံ, ယပၢၤဃာ် တၢ်နာ်န့ၣ်လံ.မၣ်လံန် (Marlene) လၢအသးအိၣ် ၁၁ နံၣ် တဂၤန့ၣ်, ဆ့ၣ်နီၤဒ့လိ အသး တနၢ်ပှီၢ်စု (ဖံၣ်အဲနိၣ်) တၢ်ဒ့လိ အသီလၢ အသရၣ်မုၣ် ဟ့ၣ်လီၤအီၤ န့ၣ်လီၤ. မ့ၢ်လၢ တၢ်သး၀ံၣ်န့ၣ် ကီ တစဲးအဃိ အ၀ဲ ကအုကစွါ၀ဲလၢ အကီ ဘၣ်အီၤ န့ၣ်လီၤ. ဘၣ်ဆၣ် တုၤမ့ၢ် အဒ့၀ဲ ၅ ၀ီ ၆ ၀ီ ၀ံၤဒီး တကီဘၣ်အီၤလၢၤ ဘၣ်. လီၢ်ခံတစဲး ဒီး အမုၢ်ဂၢ် ဟ့စဲၣ် (Hazel) လၢအဆ့ၣ် နီၤ ကနၣ်န့ၣ် တၢ်တဲအီၤ, မၣ်လံန် ဧၢ, တၢ်သး၀ံၣ်လၢ နဒ့လိ ခဲအံၤ မ့ၢ်တၢ်သး၀ံၣ် လၢယအဲၣ်ဒိၣ် မး လီၤ. နဒ့ ဒၣ်ထဲ စှၤ၀ီ သနာ်က့ နဒ့အီၤ ဘၣ်အဃိ နမၤနဲ ဂ့ၤမးလီၤ. ဘၣ်မနုၤ နတဲလၢ အကီဒိၣ်မး ခဲအံၤခဲအံၤ န့ၣ်လဲၣ်. မၣ်လံန် တဲဆၢ၀ဲလၢ ဖဲယဒ့လိ တၢ်သး၀ံၣ် အသီတဘျီလၢ်လၢ်န့ၣ်, ယသးဟးဂီၤ ဒိၣ်မးလီၤ. လီၤဂာ် လၢအကီ ဒိၣ်မး လၢယဂီၢ်ဒီး ယအဲၣ်ဒိး ပာ် တ့ၢ်ကွံာ် တၢ်ဒ့လိ ယသးန့ၣ်လီၤ. အမုၢ်ဂၢ်န့ၣ် တဲကဒီး၀ဲ နတဲတၢ်န့ၣ် ပနၢ်ပၢၢ် သ့ကစီဒီ လီၤ. ဘၣ်ဆၣ် ယကဟ့ၣ်ကူၣ် နၤလၢ နကတဲဒ်အံၤ တခီလီၤ. ယသ့ၣ်ညါ လၢ ယမၤကန့ၢ်လီၤ. ယမၤကန့ၢ်လီၤ. ယဒ့ကဘၣ် လီၤ, ယဒ့ကဘၣ်လီၤ. တၢ်နာ်လိၣ်၀ဲ ဒိၣ်မးလၢ တၢ်မၤနၢၤ အဂီၢ်လီၤ. လၢနတၢ်ဒ့လိ နသးအံၤ ကျဲးစၢး အိၣ်ဒီး တၢ်နာ် န့ၢ်လီၤနသး ဒီး နာ်န့ၢ် ယွၤစ့ၢ်ကီးတက့ၢ်.
အမိၢ်ဟဲ၀ဲဆူ မၣ်လံန် အအိၣ်, တဲအီၤလၢ အကဖီတၢ် ဒီးယၢၤထီၣ် တၢ်တမံၤ ဘၣ်တမံၤ လၢ အကဘၣ်ဖီ၀ဲ န့ၣ်လီၤ. အမိၢ်တခီ ကဘၣ်ထူးဘျ့ တၢ်ကူတၢ်ကၤ လၢထးကိၢ်လီၤ. အဖိတဲဆၢအီၤ, နမ့ၢ်တအိၣ်ဒီး ယၤလၢ ဖၣ်ကပူၤ ဘၣ်ဒီး တၢ်လၢ နမၢယဖီန့ၣ် ယဖီတသ့ဘၣ်. ယဘၣ်ယိၣ်လၢ ကအူသံဘၣ်ဖုး လီၤ. အမုၢ်ဂၢ် ကွၢ်ဃီၤ အီၤဒီး စံးအီၤ, မၤတၢ်လၢ ယဟ့ၣ်ကူၣ်နၤတဖၣ် တက့ၢ်. မၣ်လံန် တဲအမိၢ်, “မိၢ်ဧၢ,နမ့ၢ်ဟ့ၣ် ယၤနလံာ် ဘၣ်ဃးတၢ်ဖီ ကိၣ်ဒီး တၢ်အီၣ် တဖၣ်န့ၣ် ယဆိ ကမိၣ်လၢ ယဖီတၢ်၀ံၣ် တၢ်ဘဲတဖၣ် ကသ့၀ဲ လီၤ.”
အမုၢ်ဂၢ် ကျၢၢ်ကျာ် အခိၣ်ဒီးတဲအီၤ, နတဲဒ်န့ၣ် ဂ့ၤဒိၣ်မးလီၤ. သါ၀ဲ သါ မၤန့ၢ် တၢ်မၤလိလၢ သါ မုၢ်ဂၢ် အဲလံးစဘဲး အိၣ် လီၤ. တဲသါ, ဟ့စၢၣ်ဧၢ, ယတသးဒ့ဒီ နီတဘျီဘၣ်လၢ နသိၣ်လိ တၢ်ကသ့ န့ၣ်ဘၣ်. နအိၣ်ဒီး တၢ်လၢ အလိၣ်၀ဲ တဖၣ် ခဲ လၢာ် လီၤ. ယနာ်န့ၢ် လီၤယသး, ယသိၣ်လိ တၢ်အိၣ် ၂၅ နံၣ်လံ. တၢ်နာ် န့ၢ်လီၤပသး မ့ၢ်၀ဲ တၢ်မၤနၢၤ တ၀ာ်လံ. မၣ်လံန် ဖီတၢ်လၢ အမိၢ်မၢအီၤ တဖၣ် သ့၀ဲ ခဲလၢာ် ဂ့ၤဂ့ၤဒီးး စံးဘျုး အမုၢ်ဂၢ် လီၤ.
