၁ ကရံၣ် ၁၀း၁၃ တမ့ၢ်ဘၣ်သုဘၣ် တၢ်လ့ပစီလၢ အတဘၣ်ဒံး ဘၣ် ပှၤကညီဘၣ်. ဒီး ယွၤမၤ၀ဲ အကလုၢ် တီသတး ဒီး, တၢ်လ့ပစီလၢ အဆူၣ်ကဲၣ်ဆိး, လၢသုဒိး တကဲဘၣ်န့ၣ်, တဒုးဒိး ဘၣ်သုဘၣ်. မ့မ့ၢ် တၢ်လ့ ပစီ အပူၤ, ကမၤထီၣ်ကျဲ ဒ်သိး သုကပူၤ ဖျဲးလၢအီၤလီၤ. ယွၤတဒုး ဒိးဘၣ်ပှၤ တၢ်လ့ပစီ လၢပတူၢ် တကဲဘၣ် န့ၣ်ဘၣ်. ဘၣ်ဆၣ် ပဘၣ် ပာ် ပသးသဟီၣ် လၢကစၢ် အဖီခိၣ်လီၤ. အ၀ဲကဒုး နဲၣ်ပှၤကျဲလၢ ပမၤနၢၤ တၢ်လ့ပစီ သ့န့ၣ်လီၤ.
မၤသၣ်မ့ၢ် ပိာ်မုၣ်ဖိ ၁၃ နံၣ်တဂၤလၢ အဘၣ်တၢ်ပာ် လီၤအီၤလၢ အကဘၣ် ကဲပိာ်မုၣ် တဂၤလၢ ကၠီး၀း ရှ့ၣ်ထၢၣ် အစိၤဒီး ကဘၣ်ကူကၤ၀ဲ တၢ်ကူတၢ်ကၤ လၢစိၤအ၀ဲန့ၣ် လီၤ. ပူအ၀ဲအံၤ ကဘၣ် တၢ်ဒုးနဲၣ် အီၤလၢ ကၠိအပျဲၢ်စီၢ်ခိၣ် လီၤ. မၤသၣ် ကဘၣ်ဃုန့ၢ် တၢ်ကူတၢ်ကၤ လၢအကစၢ် ဒၣ်၀ဲ ဒ်သိး ဒုးနဲၣ် တၢ်ကသ့ အဂီၢ်လီၤ. တၢ်တဲနၢ်ပၢၢ် အီၤလၢ ဆ့ဒ်အံၤ တဖၣ် တၢ်ငါ န့ၢ်အီၤသ့ ဒီး အလဲမ့ၢ်၀ဲ တဒီလၣ် လီၤ. မၤသၣ် အဲၣ်ဒိး ဒုးနဲၣ် တၢ်အဃိ ကဘၣ်ဃုန့ၢ် စ့တဒီလၣ် လၢကငါဆ့ လၢပျၢၤ အံၤအဂီၢ် န့ၣ်လီၤ.
ဘၣ်တနံၤ အ၀ဲလဲၤအိၣ်သကိး ပိာ်မုၣ် သးပှၢ်တဂၤ လၢအအိၣ်၀ဲ လၢကျဲဘးခီ တကပၤ လၢ အကွၢ် ဆၢၣ်မဲာ် ဒီးမၤသၣ် အဟံၣ် န့ၣ်လီၤ. ဖဲအလဲၤ နုာ်၀ဲလၢ ဟံၣ်အကရၢၢ်ပူၤ န့ၣ်, ထံၣ်၀ဲ တၢ်ကံးညာ် ၀ါတခီ အိၣ်၀ဲလၢ ဖီအတပှီာ် ခိၣ်လီၤ. ဟံးန့ၢ် ကွၢ်၀ဲဒီး သ့ၣ်ညါ ၀ဲလၢ အမ့ၢ်ပ၀ၣ် ဖိတဘ့ၣ်ဒီး လၢအနၢၣ် တနၢၣ် န့ၣ် စ့စးခိ တဒီလၣ်အိၣ် စၢဃာ် အသးဒီး လံာ်မဲာ်ဖျၢၣ် ဘံၣ်ကၠံၣ် (B.G) အိၣ်ဆးအသး လီၤ. ဆိကမိၣ် ၀ဲလၢ အသး ယဃ့လၢယွၤ ကမၤစၢၤယၤ လၢ ယကမၤန့ၢ် စ့တဒီ လၣ်ဒီး မ့ၢ်တၢ်အံၤ လီၤ. ပ၀ၣ်ဖိ တဘ့ၣ် အံၤဂ့ၤဒံး၀ဲ လီၤ. အသး ဒ့ဒီဒီး လဲၤဃ့ၢ်၀ဲဆူ ပိာ်မုၣ်ပှၢ် န့ၣ်အအိၣ် ဒီးသံကွၢ် အီၤလီၤ. မုၣ်ပှၢ် အံၤတဲ ဘၣ်အီၤလၢ ပ၀ၣ်ဖိ မ့ၢ်သါ တၢ်လီၤ. ဘံၣ်ကၠံၣ် န့ၣ်မ့ၢ်သါ ဆးထီၣ် သါ မံၤ ဘဲးစံၣ်ြကဲ (Bessie Grant) န့ၣ်လီၤ. အသးခု တုၤဒၣ်လဲာ် အမဲာ်ထံ ထီၣ်ဘၣ် အသးလီၤ. မုၣ်ပှၢ်အံၤအသးခု လၢအန့ၢ် ဘၣ်က့ၤ အပ၀ၣ် ဖိဒီး အစ့လၢ အလူၤဃုတ့ၢ် ၀ဲတဘျုး နံၤဒီး ဃု၀ဲ တဘၣ်ဘၣ်. မ့မ့ၢ် မၤသၣ် တခီ အသးခု၀ဲလၢ အမၤနၢၤ တၢ်လ့ပစီ လၢကဟုၣ် တၢ်န့ၣ်လီၤ.
မၤသၣ် ခွဲသိၣ်ခွဲ ပျီဒၢးဒီး မၤစၢၤ သးပှၢ်မုၣ်အံၤ န့ၣ်လီၤ. မုၣ်ပှၢ်အံၤ ထုးလီၤသံးတၣ် အလီၢ် လံၤတဖျၢၣ် ဒီးဟ့ၣ်လီၤ မၤသၣ်ဒီး စံး၀ဲ မ့ၢ် နတၢ်လီၤ. ဟံးန့ၢ် တၢ်လၢ နလိၣ်ဘၣ် တက့ၢ်. မၤသၣ်ကွၢ်၀ဲဒီး လၢတၢ်ဂၤ တဖၣ်အကျါ ထံၣ်န့ၢ် ဆ့လၢ အလိၣ်ဘၣ်၀ဲ န့ၣ်လီၤ. မုၣ်ပှၢ်တဲအီၤ, လၢပူၤကွံာ် တဘျုးနံၣ်န့ၣ်, သါ ကၤဆ့ တဘ့ၣ် အံၤလၢ တၢ်ဒုးနဲၣ် တၢ်ဃဲၤတခါ အံၤအပူၤ လီၤ. လီၤဂာ် ဒ်သါ ပာ် ကတီၤဃာ် ဆ့အံၤလၢ မၤသၣ် အဂီၢ်လီၤ. မၤသၣ်ကၤထီၣ် ဆ့ကၤ လၢပျၢၤတဘ့ၣ်န့ၣ်ဒီး ဒုးနဲၣ် တၢ်လၢပျဲၢ်စီၢ်ခိၣ် တဟါ န့ၣ် ဘၣ်ဘျီး ဘၣ်ဒါ ဂ့ၤဒိၣ်မး အဃိ, ပှၤကွၢ်ကီ တၢ်ဖိ တဖၣ် ပြတၢၤ ၀ဲဂ့ၤမး လီၤ. အသးခု၀ဲ ဒိၣ်တက့ၢ်လၢ အမၤနၢၤ တၢ်လ့ပစီ လၢအကဟုၣ်န့ၢ် တၢ်လၢ အထံၣ်၀ဲ ဒီးမၤန့ၢ် ဆ့လၢ အလိၣ် ဘၣ်ခီဖျိ ကျဲအဂၤတဘိ လၢ အတမ့ၢ် တၢ်ကဘျံး ကဘျၣ် အကျဲဘၣ် န့ၣ်လီၤ.
