စံၣ်တဲၤတဲ ၉း၁၀, ကယဲၢ်တၢ်လၢ နစုထံၣ်န့ၢ်လၢ နကမၤတမံၤလၢ်လၢ်န့ၣ် မၤအီၤလၢ နဂံၢ်နဘါခဲလၢာ်တက့ၢ်. ဒီပုၢ်ဝဲၢ်မုၣ်ခံဂၤ, ကၠိအဲန် ဒီးသံၣ်ရံစၣ်, အဲၣ်ဒိးလဲၤသကိး လၢကၠိဖိတဖၣ်လၢ ကကွၢ်ကီဘၣ် ဆၣ်ဖိကီၢ်ဖိ တဖၣ်လၢ တၢ်ပာ်ဆၣ်ဖိကီၢ်ဖိ အကရၢၢ် န့ၣ်လီၤ. လိၣ်ဘၣ်ဝဲ တိၢ်တဂၤ ၂၅ ကး စုာ်စုာ်လၢ အကဟ့ၣ် သိလ့ၣ် လဲအဂီၢ်လီၤ. စ့လၢ အမိၢ်ဟ့ၣ်အီၤတနွံအဂီၢ် တနွံအဂီၢ်န့ၣ် သူဝဲလၢာ်လံ. အဝဲသ့ၣ် ဃ့ကညး အမိၢ်လၢ အကဟ့ၣ်အီၤ တၢ်မၤလၢ ကမၤန့ၢ်ဘၣ် သိလ့ၣ်လဲ အဂီၢ်န့ၣ်လီၤ.
ဒ်အညီနုၢ်အသိး သံၣ်ရံစၣ် မ့ၢ်ပှၤလၢ အခွဲပျီတၢ်တမုာ်ဘၣ်လီၤ. မ့မ့ၢ်ကၠိအဲန် တခီ ထွါပျီထူးပျီ ကွံာ်တၢ်ကမှံၤ ကမှီၣ် တမုာ်ဘၣ်. အမိၢ်သ့ၣ်ညါ ပာ်ဝဲအဃိ ဟ့ၣ်လီၤအဝဲသ့ၣ်လၢ တၢ်မၤဒ်အံၤလီၤ. “သံၣ်ရံစၣ်ဧၢ, ခွဲပျီနဲဒၢး လၢပတူၢ်လိာ်ပှၤတမှံၤ တက့ၢ်. ဒီးနဲ ကၠိအဲန်ဧၢ, ထွါကဆှီ, ထူးစီကွံာ်ဖၣ်ကမူၣ် ကပီၤလုၤတဖၣ် လၢဒၢးဖိ လၢပအိၣ်လၢ အပူၤဒီး ပအီၣ်တၢ်အီ တၢ်အဒၢးဖိတက့ၢ်. တၢ်မၤခံခါအံၤ ယပာ်လၢ အမ့ၢ် တၢ်မၤ ထဲသိးသိးဒီး လၢာ်တၢ်ဆၢကတီၢ် ဒ်သိးသိးလီၤ. အမိၢ်ဒုးမၤ အဝဲသ့ၣ် တၢ်မၤလၢ အမၤဝဲ တမုာ်ဘၣ်န့ၣ်လီၤ.
သံၣ်ရံစၣ် ခွဲပျီဒၢးလၢ တၢ်အိၣ်သကိးတမှံၤ န့ၣ်လီၤ. စံးဝဲလၢ တလါဖးဒိၣ် လၢ တၢ်ပာ်တၢ်လိာ်ကွဲ တဖၣ်န့ၣ် ဃၢလၢ အဂီၢ်အဃိ တသုးကွံာ်ဝဲဒီး ခွဲကဆှီအီၤ ဘၣ်. မ့မ့ၢ်အမိၢ်ခွဲတၢ်န့ၣ် သုးကွံာ်တလါအံၤထီဘိ ဒီးခွဲ ဝဲတလါအလီၢ် ပျီပျီ လီၤ. ကၠိအဲန်တခီ ထွါကွံာ်တပျုာ်ကွံာ် တၢ်ကမှံၤ လၢဒၢးဖိခံဒၢး လၢအမိၢ်မၢ အီၤန့ၣ်လီၤ. အဝဲတထုးလီၤကွံာ် တၢ်ကံးညာ် လၢအကးဘၢတနၢ် (ဖံၣ်အဲနိၣ်) အခိၣ်န့ၣ်ဘၣ်. အမိၢ်မ့ၢ်မၤ ကဆှီတၢ်န့ၣ် ထုးကွံာ်ဝဲ တၢ်ကံးညာ်ဒီး တပျုာ်ပျီကွံာ် ဝဲဒီး ကထူးကဆှီထီၣ် တနၢ်လီၤ. ဆိကမိၣ်ဝဲလၢ အမၤတၢ်မၤ ဂ့ၤဂ့ၤ ဝံၤလံအဃိ က့ၤဆူအမိၢ်အအိၣ်လီၤ. အမိၢ်တတဲတၢ်ဘၣ်ဃး အတၢ်မၤအလဲ နီတမံၤဘၣ်.
တုၤတၢ်ခံးလီၤဒီး သံကွၢ်အမိၢ်, မ့ၢ်နတဟ့ၣ်ပှၤတိၢ် ၂၅ စဲးန့ၣ်ဘၣ်ဧါ. ထဲန့ၣ်ဒီး အမိၢ်ကိးဃီၤ သံၣ်ရံစၣ် လၢကလဲၤကွၢ်ဒၢးလၢ အဘၣ်ခွဲပျီဝဲ န့ၣ်လီၤ. သုးကစီၤကွံာ်တလါဖးဒိၣ် ဒီးလၢအလီၢ်န့ၣ် အိၣ်ထဲတၢ်တဃီၣ် တဃၣ်တဖၣ်လီၤ. လၢအကျါထံၣ်န့ၢ်စ့ၢ်ကီးတိၢ် ၂၅ ကးလၢအမိၢ်ပာ်န့ၢ်အီၤန့ၣ်လီၤ. အမိၢ်ကိးဃီၤကဒီး ကၠိအဲန် ဒီးအိးကွံာ် တနၢ်အကျၢၢ်ဘၢဒီး ထံၣ်ဘၣ် တၢ်ကမှံၤ တဖၣ်ဒီးတိၢ် ၂၅ ကးလၢ အမ့ၢ်တၢ်မၤအလဲ န့ၣ်လီၤ. အမိၢ်တဲဘၣ်အဝဲသ့ၣ် လၢအဝဲသ့ၣ်တမၤအတၢ်မၤလၢ အဂံၢ်အဘါခဲလၢာ်ဘၣ်အဃိ, တထံၣ်န့ၢ် စ့လၢအလိၣ်ဘၣ်ဝဲ န့ၣ်ဘၣ်. တဲဝဲ ,ဖိမုၣ်သ့ၣ်ဧၢ, သုတန့ၢ်လဲၤကွၢ်ကီဘၣ် ဆၣ်ဖိကီၢ်ဖိလၢၤဘၣ်. ပမ့တမၤ ပတၢ်မၤဂ့ၤဂ့ၤဘၣ်ဒီး, ပတန့ၢ်ဘၣ် တၢ်ဘူးတၢ်လဲဘၣ်.
