မးသဲ ၅း၁၆, သုတၢ်ကပီၤန့ၣ် ဒုးကပီၤထီၣ် အီၤလၢ ပှၤကညီအမဲာ်ညါ ဒ်သိး အကထံၣ်ဘၣ် သုမၤတၢ်ဂ့ၤ ဒီး စံးထီၣ်ပြတၢၤ သုပၢ်အိၣ်လၢ မူခိၣ်န့ၣ်တက့ၢ်. ဖဲတၢ်လီၢ်လၢ လၢၢ်မုၢ်လ့ထီအိၣ်ဝဲလၢ ပီၣ်လဲၣ်ကၢၢ်ခိၣ် ဒီး ကဘီလဲၤတၢ်လၢ မုၢ်နၤတဖၣ် ဘၣ်ဒိဘၣ်ထံးအဃိ, ပဒိၣ်ဘှီထီၣ်ဟံၣ်ဖိလၢ အအိၣ်ဒီး အပျီာ် လၢတၢ်ကပာ်မ့ၣ်အူဒၢ တဖၣ်အဂီၢ်လီၤ. တုၤမုၢ်ဟါလီၤလံန့ၣ်, ပှၤလၢ ပဒိၣ်ငါအီၤလၢ ကဘၣ်ခိးမ့ၣ်အူကပီၤအဟံၣ် (Light house) န့ၣ် ဒွဲၣ်ကပီၤထီၣ်မ့ၣ်အူဒၢတဖၣ် ဒ်သိး တၢ်ကပီၤ ကဒုးသ့ၣ်ညါ ပှၤလဲၤတၢ်လၢ မုၢ်နၤတဖၣ် လၢတၢ်လီၤပျံၤအိၣ်ဝဲ ဖဲမ့ၣ်အူဒၢ နဲၣ်ဖျါထီၣ် တၢ်ကပီၤန့ၣ်လီၤ.
မ့ရ့ၣ် အိၣ်ဒီးအပၢ်ထဲခံဂၤဧိၤ လၢမ့ၣ်အူ ကပီၤအဟံၣ်ဒ်အံၤ တဖျၢၣ်အပူၤဒီး အပၢ်ဒွဲၣ်ကပီၤ ထီၣ်မ့ၣ်အူဒၢ တဖၣ်ကိးမုၢ်ဟါလီၤ. အပၢ်ဘၣ်လဲၤဟံးန့ၢ် တၢ်အီၣ်လၢ သဝီပူၤတနွံတဘျီ ဖဲပီၣ်လဲၣ်အထံလီၤ အဆၢကတီၢ်လီၤ. ဘၣ်တဟါ ဖိသၣ်ပိာ်မုၣ် ၇ နံၣ်အံၤ ဘၣ်အိၣ်ဝဲထဲတဂၤဧိၤလီၤ. အပၢ်လဲၤဆူ ခိလၢ ကမၤန့ၢ် တၢ်အီၣ်အဂီၢ်လီၤ. တၢ်ခံးလီၤလံ, အပၢ်တဟဲက့ၤပၢၢ်ထီၣ် ဘၣ်. မ့ရ့ၣ် ပာ်ဆူၣ်အသးဒီး ကျဲးစၢး ဒွဲၣ်ထီၣ်မ့ၣ်အူ လီၤ. မၤဝဲ တညီဘၣ်, မ့ၢ်လၢ အနီၢ်ဖုၣ်ဒီး အစုတတုၤလၢ ကဒွဲၣ်ထီၣ်ဝဲဘၣ်. အပၢ်တခီ ဟဲက့ၤတတုၤဘၣ်. ပှၤအၢဖိတဖု ဖီၣ်ဃာ်အီၤဒီး တပျဲက့ၤအီၤဘၣ်. အဝဲသ့ၣ် အတၢ်ကူၣ်မ့ၢ်ဝဲ လၢ ပၢ်တဂၤအံၤ က့ၤမ့ၢ် တတုၤဘၣ်ဒီး ပှၤဒွဲၣ်ထီၣ်မ့ၣ်အူ ဒၢတသ့နီတဂၤဘၣ်. တၢ်ကခံးဒီး ကဘီဖိတဖၣ် တထံၣ်လၢၢ်မုၢ်လ့တီ အလီၢ်ဘၣ်. ကဘျီကဘျၢၣ်လ့ဘ့ၣ် ပှၢ်တဖၣ်ဒီး ကလီၤဘျၢ, မ့တမ့ၢ် ကကတာ်ထီ ဝဲလၢ လ့ကၢၢ်ခိၣ်န့ၣ်လီၤ. ထဲန့ၣ်တဘျီ အဝဲသ့ၣ် ကလဲၤလီၤဂုာ်န့ၢ် တၢ်ပဒၢး တဖၣ်န့ၣ်လီၤ. အဝဲသ့ၣ် တသ့ၣ်ညါ လၢပိာ်မုၣ်ဖိ လၢအအိၣ်တ့ၢ် တဂၤဧိၤအံၤ မ့ၢ်မး ပှၤသးဆးတဂၤ န့ၣ်ဘၣ်. အပၢ်ဃ့ကညးပှၤအၢဖိ တဖၣ်သပှၢ်ပှၢ်လၢ အကပျၢ်အီၤ, ဘၣ်ဆၣ် တပျၢ်အီၤဘၣ်. တၢ်ခံးလီၤတယံာ်ဘၣ်ဒီး မ့ၣ်အူဒၢတဖၣ် ကပီၤထီၣ်ဝဲလီၤ.
မ့ရ့ၣ်ဖိမၤဝဲဒ်လဲၣ်. အဝဲသုးဘူးဃီၤစီၢ်နီၤခိၣ်တဖျၢၣ်လၢမ့ၣ်အူ ဒၢအဖီလာ် လီၤ. ဒ်သိးကတီၣ်ထီၣ်လီၢ်ဆ့ၣ်နီၤ ဖိတဖျၢၣ်လၢ စီၢ်နီၤခိၣ်အလိၤန့ၣ် ဘၣ်မၤဝဲ လၢာ်ဂံၢ်လၢာ်ဘါ န့ၣ်လီၤ. ထီၣ်ဆၢထၢၣ်ကွၢ်ဝဲလၢ အဖီခိၣ် သနာ်က့ အစုတထီၣ်ဘးဘၣ်. သ့ၣ်နီၣ်ထီၣ်ဝဲလံာ်စီဆှံ ဖးဒိၣ်လၢ အမိၢ် လၢအမ့ၢ်ပှၤအဲၣ်ယွၤတဂၤ သံဒီး ပာ်တ့ၢ်ဝဲန့ၣ်လီၤ. စိာ်ဘၣ်လံာ်ဖးဒိၣ်အံၤ ကီကီခဲခဲဒီး တီၣ်ထီၣ် ဝဲလၢ စီၢ်နီၤခိၣ်န့ၣ်လီၤ. ပာ်ထီၣ်လီၢ်ဆ့ၣ်နီၤ ဖိလၢ လံာ်ဖးဒိၣ် အဖီခိၣ် ဒီးထီၣ်ဆၢထၢၣ်ကွၢ်ဝဲ လီၤ. အစုတုၤဒၣ်ယူၢ်ယူၢ် လၢကဒွဲၣ် ကပီၤထီၣ် မ့ၣ်အူ ဒၢတဖၣ် လၢအပၢ်အလီၢ်န့ၣ်လီၤ. (ခဲအံၤမ့ၢ် အူထူၣ်တဖၣ်မ့ၢ်ဝဲလီမ့ၣ်အူလီၤ.) ပၢ်တဂၤအံၤ တုၤအထံၣ်ဃီၤမ့ၣ်အူ ဒၢအတၢ်ကပီၤဒီး အသးခုသးမုာ်ဒိၣ်မးလၢ အဖိမုၣ်မၤတၢ်လၢ အလီၢ်သ့ဝဲ အဃိန့ၣ်လီၤ.
ပဘၣ်ဒွဲၣ်ထီၣ်ပမ့ၣ်အူဒၢအတၢ်ကပီၤ လၢအမ့ၢ် တၢ်တီတၢ်လိၤဒီး မ့ၢ်မးပမၤလၤကပီၤယွၤ န့ၣ်လီၤ.
