စံး ၂၅း၁၂, ပှၤလၢအပျံၤယွၤတဂၤန့ၣ် မ့ၢ်မတၤလဲၣ်. ကနဲၣ်လိအီၤလၢ ကျဲတဘိလၢ အကဃုထၢ ဝဲလီၤ. ဖဲပသးသဘံၣ်ဘုၣ်ဝဲဒီး ပတသ့ၣ်ညါ က့ၤလၢ ပကဘၣ်လဲၤဆူလဲၣ်ဆူလဲၣ်, ပကဘၣ်မၤဒ်လဲၣ်ဒ်လဲၣ်န့ၣ်, ပဘၣ်ကွၢ်ထီၣ်တၢ်ဆူ ယွၤအအိၣ်လၢ အကနဲၣ်က့ၤပှၤကျဲ, ဒီးပကဘၣ်မၤဒ်လဲၣ် ဒ်လဲၣ်န့ၣ်လီၤ.
မံးရှၢၣ်နရံၣ်လၢ အမၤတၢ်လၢ ပှၤဂီၤဖံးဖိအကျါ (Red Indians) တဂၤ တၢ်မၤပူၤဖျဲးအီၤ လီၤလိၢ်လီၤလး မးန့ၣ်လီၤ. ဘၣ်တဂီၤဖဲ တၢ်ဂိၢ်ဒိၣ်ကတၢၢ်အခါ, အဝဲဒီး အပျဲၢ်ပှၤဂီၤဖံး ဖိတဂၤ ဟးထီၣ်ဝဲလၢ အကလဲၤဆူ မံးရှၢၣ် တၢ်မၤအလီၢ် န့ၣ်လီၤ. အဝဲသ့ၣ် ဒိးမူခိၣ်ဖီ အလ့ၣ်ခံဆိ ကိးဝဲ စလဲး (Sleds) လၢအဘၣ် တၢ်တွံၢ်အီၤလၢ ထံၣ်လွံၢ်ဒု စုာ်စုာ် န့ၣ်လီၤ. ဘၣ်လဲၤတၢ်အမံးလး ၆၀ ဒီးဘၣ်လဲၤခီဖျိ နိၣ်ဖးဒိၣ် ကိးဝဲလၢ ဝ့န့ၣ်ဖဲး လၢကီၢ်ခဲနဒၣ်အပူၤ န့ၣ်လီၤ. ဆိကမိၣ်ဝဲလၢ တၢ်ခံးလီၤအကတီၢ် န့ၣ်ကတုၤဝဲလီၤ. လဲၤတၢ်တဘျုးနၣ်ရံၣ်လံ. မူခိၣ်ဖီ ကလံၤမုၢ်လီၤချုးန့ၢ် အဝဲသ့ၣ်ဒီး ကွၢ်တၢ်တဖျါလၢၤဘၣ်. နိၣ်ဖးဒိၣ်အံၤ အထံလီၤ တကၤဝဲ ဒီနိၣ်, ဒီးတၢ်ဂိၢ်ဒိၣ်ဒိၣ်ကလဲာ် လီၤ. သရၣ်အံၤ အမံၤမ့ၢ်ဝဲ အဲးကၢၣ် တၢၣ်ယီ (Egerton Young) လီၤ. အဝဲကွၢ်တၢ်တဖျါ လၢၤနီတပူၤဘၣ်. တသ့ၣ်ညါ က့ၤလၢၤမုၢ်နုာ်မုၢ်ထီၣ် ကလံၤထံးကလံၤစိး ဘၣ်. ဖဲမုၢ်ထူၣ် န့ၣ်ဒုးအိၣ်ကတီၢ် အလ့ၣ်, ဘှၣ်လီၤ တၢ်အီၣ်လၢ အဟဲစိာ်ဝဲဒီး အီၣ်တၢ်အီၣ် တဖၣ်လၢ အလီၤတကၤ ဝဲစ့ၢ်ကီးန့ၣ်လီၤ. ထွံၣ် ၈ ဒု အံၤအခိၣ် မ့ၢ်ဝဲ ကၠဲးခ်, ဒီးမ့ၢ် ထွံၣ်အဒိၣ်ကတၢၢ်တဒုလီၤ. ဒုးအီၣ်စ့ၢ်ကီး အထွံၣ်အဆၣ်လၢအီၣ်လၢအီ, ဒီးဒ် အညီနုၢ်အသိး ကၠဲးခ် ဟဲအိၣ်ဘူးဒီးအကစၢ်လီၤ. အီၣ်တၢ်ဝံၤ သရၣ်အံၤ ဒီးအသကိး တဲဘၣ်ကစၢ် ယွၤလၢ တၢ်ကီတၢ်ခဲဘၣ်အီၤ အဂ့ၢ်ဒီး ဃ့ဝဲလၢ ယွၤကနဲၣ်အီၤကျဲန့ၣ်လီၤ. သရၣ်အံၤ ကတိၤတၢ်ဒီး အထွံၣ် ဒ်အကတိၤတၢ်ဒီး ပှၤကညီအသိး စံးဝဲ, ကၠဲးခ်ဧၢ, ပဟးဖျိးကျဲလံ. ပက့ၤဆူ ပမံးရှၢၣ် အလီၢ်ကတုၤ တတုၤ ပတဲတသ့ဘၣ်. ပအးလီၤ ပသးလၢနစုပူၤလီၤ. ဆှၢပှၤဆူ တၢ်ပူၤဖျဲးအလီၢ် တက့ၢ်. လီၤဂာ်လၢထွံၣ်ဖးဒိၣ် တဒုအံၤ နၢ်ပၢၢ်သရၣ် အတၢ်ကတိၤ, ဒီးလဲၤတၢ် ဂၢၢ်တပၢၢ် တုၤအခီဖျိ နိၣ်ဖးဒိၣ် အကၢၢ်ခိၣ် ဒီးဖဲတၢ်ခံးလီၤ န့ၣ် တုၤဝဲလၢ အတၢ်လဲၤအကတၢၢ် န့ၣ်လီၤ. ယွၤဒုးနဲၣ် အကျဲခီဖျိ ထွံၣ်တဒုအံၤလီၤ.
