ဧ့ၤ ၁၁း၂၄, ၂၅ လၢတၢ်နာ် စီၤမိၤရှ့ ဒိၣ်ထီၣ်ဒီး တအၢၣ်လီၤအီလီၤ ဘၣ်လၢ ပှၤကကိးအီၤလၢ စီၤပၤဖၤရိၤ အဖိမုၣ်န့ၣ် အဖိခွါဘၣ်. ဘၣ်နးဘၣ်ဖှီၣ် ဃုာ်ဒီး ယွၤအပှၤဂီၢ်မုၢ်န့ၣ် ဘၣ်အသးဒိၣ်န့ၢ် အမုာ်လၤတၢ်လၢ တၢ်ဒဲးဘး အတၢ်မုာ်တၢ်လၤ အပူၤတစိၢ်တလီၢ်န့ၣ်လီၤ. တနံၤအံၤ အတၢ်မၤလိပာ်ဖျါဝဲလၢ စီၤမိၤရှ့ ဃုထၢဝဲ လၢအကဘၣ်နးဘၣ်ဖှီၣ် ဃုာ်ဒီး ယွၤအပှၤဂီၢ်မုၢ်ဒီး တအဲၣ်ဒိးလၢ ပှၤကကိးအီၤလၢ ဖၤရိၤအဖိမုၣ်န့ၣ် အဖိခွါဘၣ်. လၢတၢ်မနုၤအဃိလဲၣ်န့ၣ် ဖျါဝဲလၢ အဆၢဖိ ၂၆, ၂၇ လၢအပိာ်ထီၣ်အခံန့ၣ်လီၤ. အဝဲပျံၤ ခရံာ်အတၢ်ဒုၣ်ဒွဲၣ်အီၤ ဒိၣ်န့ၢ် အကန့ၢ်ဘၣ်သါ ကယဲၢ်မ့ၢ် တၢ်လုၢ်ဒိၣ်ပှ့ၤဒိၣ် လၢကီၢ်အဲၤကူပတူး အနီပူၤတက့ၢ်န့ၣ်လီၤ. အတၢ်နာ်အိၣ်ကျၢၤမုဆှု လၢယွၤအပူၤ န့ၣ်လီၤ. ထံၣ်ဘၣ်ယွၤလၢ အမဲာ်ညါထီဘိ, တပျံၤဘၣ်ဖၤရိၤအ တၢ်သးဒိၣ်ထီၣ်အီၤဘၣ်ဒီး ဟးထီၣ်ကွံာ်လၢ ကီၢ်အဲၤကူပတူးလီၤ.
ပိာ်ခွါဖိဟီ၀ၢး (Howard) လၢအသးအိၣ် ၈ နံၣ်တဂၤန့ၣ်, ဘၣ်တဟါ တၢ်လီၤဘၣ်အီၤလၢ အကဘၣ်သးဝံၣ် တၢ်လၢ ရ့ဒယိၣ် (၀ံးထယူး) အပူၤလီၤ. စးထီၣ်လၢ အအိၣ်ယဲၢ်နံၣ်န့ၣ်, သးဝံၣ် ဘၣ်တၢ်ဘူၣ်တၢ်ဘါ အတၢ်သးဝံၣ်လၢ ပှၤအါဂၤအမဲာ်ညါလီၤ. ဟါအံၤ မ့ၢ်ဝဲ အခီၣ်ထံးကတၢၢ်တဘျီလၢ ဟီ၀ၢး သးဝံၣ်ဘၣ်တၢ်လၢ ရ့ဒယိၣ် (၀ံးထယူး) အပူၤန့ၣ်လီၤ. တၢ်သးဝံၣ် အခီၣ်ထံးကတၢၢ် တယုၢ်အတၢ်ကတိၤမ့ၢ်ဝဲ, တမ့ၢ်ယၤဘၣ် မ့ၢ်ဝဲခရံာ်လၢ အကဘၣ် တၢ်မၤလၤကပီၤအီၤ, အဲၣ်အီၤဒီး ဘၣ်တၢ်ပာ်ထီၣ်ထီ အီၤန့ၣ်လီၤ. တၢ်သးဝံၣ် လၢအသီၣ်ထီၣ်လၢရ့ဒယိၣ် (၀ံးထယူး) အပူၤအံၤ ပှၤနၢ်ဟူအီၤအါမးလီၤ. တုၤတၢ်ရၤလီၤ တၢ်သးဝံၣ်လၢ ကလံၤကျါ အတၢ်ရဲၣ်တၢ်ကျဲၤကတၢၢ်ဝဲဒီး ပှၤတဂၤဖီၣ်ထီၣ် ဟီ၀ၢး အစုဒီးဆှၢထီၣ်အီၤဆူ တၢ်ချၢန့ၣ်လီၤ. ဖဲန့ၣ် စရ့တဂၤ ဟ့ၣ်လီၤဟီ၀ၢးလၢ စးခိဖိတက့လၢ အစံးဝဲ, တၢ်မၤအခိၣ် (မဲန့ကၠၢၣ်) လၢဟီလ့ဝူး တဂၤ အဲၣ်ဒိးထံၣ်အီၤ န့ၣ်လီၤ. ပိာ်ခွါအံၤ သံကွၢ်လီၤအသးလၢ မ့ၢ်အမၤကမၣ်တၢ် တမံၤမံၤ အဃိ တၢ်မၤအခိၣ် (မဲန့ကၠၢၣ်) အဲၣ်ဒိးထံၣ်အီၤန့ၣ်ဧါ. စရ့တဲနၢ်ပၢၢ်အီၤလၢ တၢ်မၤအခိၣ် အဲၣ်ဒိးဟ့ၣ်အီၤ တၢ်မၤလၢ အကမၤဘျုးအီၤ, ဒီးကမၤထူးထီၣ်တီၤထီၣ်အီၤ, ဒီးကဒုးမံၤဟူသၣ်ဖျါထီၣ်အီၤ န့ၣ်လီၤ. ဟီ၀ၢး မ့ၢ်ဂ့ၤ, အမိၢ်အပၢ်မ့ၢ်ဂ့ၤ တတူၢ်လိာ် တၢ်မၤအံၤဘၣ်. ကတူၢ်လိာ်ထဲ တၢ်မၤလၢ အဘၣ်ဃးဒီး ခရံာ်န့ၣ်လီၤ. ဟီ၀ၢး အဲၣ်ဒိးတူၢ်လိာ်ထဲ မူခိၣ် အတၢ်ထူးတၢ်တီၤလီၤ.
