စံး ၁၀၄း၃၄, မ်ယတၢ်ဆိကမိၣ်န့ၣ် ဘၣ်အသးတက့ၢ်. ဒီးယသးခုလၢ ယွၤအပူၤလီၤ. မိၢ်တဂၤလၢ အမံၤမ့ၢ်ဝဲ မၢၤဟိလဒၢၣ် (Mrs. Holder) ညီနုၢ်မ့ၢ်ဝဲမိၢ်တဂၤဒီး မါတဂၤလၢ အသးခုထီဘိလၢ ယွၤအပူၤလီၤ. ဘၣ်ဆၣ် မုၢ်အိၣ်ဝဲတဂီၤလၢ အသး အ့န့ဝဲလီၤ. တၢ်အၢထီၣ်အီၤဒီး ကဒူးကဒ့ၣ်တၢ်လီၤ. အဖိခွါ ကၠၢရ့ၣ်လၢ အအိၣ်ထဲယဲၢ်နံၤ န့ၣ်လိာ်ကွဲ လၢဟံၣ်ကပၤဒုးလဲၤအချံဖိ အသီတဘ့ၣ်လၢ ထံကျိပူၤဖဲ အဝဲတခီ မၤဟံၣ်အတၢ်မၤဒီး ဖီထီၣ်ကိၣ်လၢ ဖၣ်ကပူၤန့ၣ်လီၤ. ကၠၢရ့ၣ် တခီမၤဒ် လဲၣ်လီၤတဲာ်နုာ်ဝဲလၢ တၢ်ကျိၤပူၤ လၢအအိၣ်ဝဲဒီး ကပံာ်န့ၣ်လီၤ. မိၢ်နၢ်ဟူ အဖိဟီၣ်သီၣ်ဒီး လဲၤလီၤထုးထီၣ်အီၤလၢ ကပံာ်ကျါ ဝံၤဒုးလုၢ်အီၤထံ, ထွါကဆှီအီၤ, ဒီးဒုးကူဒုးကၤအီၤလၢ တၢ်ကူတၢ်ကၤအသီ န့ၣ်လီၤ. သ့ၣ်နီၣ်ထီၣ်က့ၤ အကိၣ်လၢ အပာ်တ့ၢ်ဝဲလၢ မ့ၣ်အူအ့ၣ်ခိၣ်န့ၣ် လဲၤကွၢ်ဝဲဒီး ထံၣ်ဝဲလၢ အကိၢ်ဃၢၣ်ဝဲလီၤ. လၢဟံၣ်မဲာ်ညါ ကျဲစၢၤ န့ၣ်ဒၢလွဲဖိသီၣ်, ဒီးထံၣ်ဘၣ်ပှၤတဂၤလၢ အဟဲမၤသီၣ်အဒၢလွဲဖိန့ၣ်လီၤ. ပှၤအံၤ ဃ့ကညးအီၤလၢ အဒုးအီၣ်အီၤတၢ်အီၣ်န့ၣ်လီၤ. အဝဲတဲဘၣ်အီၤ တနံၤအံၤ, ယဟ့ၣ်နၤတၢ်တသ့နီတမံၤဘၣ်.
ဖဲအဟဲထီၣ်လၢ ဟံၣ်မဲာ်ညါ လၢအကဃုသ့ၣ်ညါဒၢလွဲဖိသီၣ်ဝဲ အဂ့ၢ်မ့ၢ်ဒ်လဲၣ်န့ၣ်, အသးအ့န့ ပာ်လံ. ဟးဝဲ ချ့တစဲး ဒီးအခီၣ်ဘၣ်တိၢ်လၢ လၢၢ်တဖျၢၣ် လၢအဖိခွါ ကၠၢရ့ၣ် ဒုးကဲထီၣ်ဝဲလၢ အတၢ်လိာ်ကွဲန့ၣ်လီၤ. အခီၣ်ဆါ, ဒီးလၢၢ်အံၤ တလ့ၢ်အသးအဃိ ကျဲစၢၤခီၣ်ထံး ကၢၢ်ကွံာ် တက့လီၤ. အသးဆဲးအဲး ဒိၣ်ထီၣ်ဒီး ဆ့ၣ်နီၤဆိကမိၣ်တၢ်အခါ သ့ၣ်နီၣ်က့ၤဝဲ ပှၤဟဲဃ့အီၣ်တၢ်တဂၤ အမဲာ်တမုာ်ဘၣ်အဃိ, အသးသိၣ်ဃီၣ်အီၤလၢ အတၢ်မၤ တြကၢးတဘၣ်အံၤ န့ၣ်လီၤ. မ့ၢ်ဟ့ၣ်အီၣ်ဝဲအကိၣ် အတအူ ဃီၣ်တနီၤ မ့ၢ်ဂ့ၤ, တၢ်နုၢ်ထံ တခွးမ့ၢ်ဂ့ၤ, တၢ်အီၣ်တမံၤမံၤမ့ၢ်ဂ့ၤသ့လီၤ. ဘၣ်ဆၣ်မ့ၢ်လၢ အသးအ့န့အဃိ, တမၤဝဲနီတမံၤဘၣ်. အခိၣ်တလိၣ် တၢ်နံၤကမှံ ဖိဒၣ်လဲာ် တပာ်ဖျါဝဲဘၣ်. သ့ၣ်နီၣ်ထီၣ်တနံၤအံၤ အတၢ်ကလုၢ်ထူ လၢပကဘၣ် သးခုထီဘိလၢ ယွၤအပူၤန့ၣ်တက့ၢ်. အဝဲဟံးန့ၢ်လၢၢ် တဖျၢၣ်, ဒီးပာ်ဝဲလၢ အကျဲစၢၤြတဲၤ ခီၣ်ထံးလၢအမၤ ဂၢၢ်ြတဲၤ န့ၣ်လီၤ. ကွဲးလီၤဝဲ, “နံၤကမှံတက့ၢ်.” ဒီးလၢလၢၢ်အကပၤ န့ၣ်ဖူဂီၤဖူလါဝဲ န့ၣ်လီၤ. လၢၢ်မ့ၢ်ဝဲ တၢ်ပနီၣ်လၢ အဂီၢ်လၢ အကဘၣ်မၤနၢၤကွံာ် တၢ်သးအ့န့န့ၣ်လီၤ.
