၁ သ့း ၅း၂၂, ဟးဆှဲးတၢ်အၢလၢ ကိးတၢ်အက့ၢ်အဂီၤဒဲး တက့ၢ်. တၢ်အၢအက့ၢ်အဂီၤ အိၣ်ဝဲအကလုာ်ကလုာ် အိၣ်ဒီးအဆံးဒီးအဒိၣ်လီၤ. စီၤပီလူး ကွဲးတဲဘၣ် ပှၤသ့းစၤလနံ ဖိလၢ ၁ သ့းစၤလနံ ၅း၂၂, လၢအဝဲသ့ၣ် ကဘၣ်ဟးဆှဲးဝဲ တၢ်အၢကိးအက့ၢ် အဂီၤလီၤ. ပဝဲတနီၤနီၤ ပတဆိကမိၣ်လၢ တၢ်အၢအက့ၢ်အဂီၤလၢ အဆံးတဖၣ်မ့ၢ်တၢ်လၢ ပဘၣ်ဟးဆှဲးအီၤဘၣ်. ပိာ်ခွါ အမံၤ မဲလဘ့ လဲၤအိးထီၣ်လံာ်ပရၢ အတလါဒီး ထုးထီၣ်ဖးဝဲ တၢ်ပရၢ မဲးကစံတဘ့ၣ်လီၤ. အသကိးမုၣ် ကၠ့ ထံၣ်န့ၢ်အီၤဒီးဒူအလိၤလၢ အထုးထီၣ်ဖး တၢ်ပရၢလၢ အတမ့ၢ်အတၢ်ဘၣ် န့ၣ်လီၤ. မဲလဘ့ တဲဆၢဝဲ, မဲးကစံအဝဲအံၤ မ့ၢ်ဝဲ မၢၤအဲလဘၢး အတၢ်လီၤ. ဖဲ သါလဲၤ လၢအဟံၣ်တဘျီလၢ်လၢ် ဒုးဖးသါ လၢအတၢ်ပရၢ တဖၣ်လီၤ. သါဖးမဲးကစံ အဝဲအံၤ တမ့ၢ်လၢ မၢၤအဲလဘၢး ကဒူ တၢ်ဘၣ်. ပှၤအဂၤတဖၣ် အမဲးကစံ ယတဟံးဖးနီတဘျီဘၣ်. ကၠ့တဲအီၤ နမၤတၢ်အံၤ ဝ့ၢ်အပဒိၣ်မ့ၢ်ထံၣ် န့ၢ်နၤဒီး တ့ၢ်လီၤနၤလၢ ဃိာ်ပူၤပၢဝဲလီၤ. အဂ့ၢ်မ့ၢ်ဝဲ တၢ်ပရၢ လၢ အကစၢ်တန့ၢ် ဘၣ်ဒံးဝဲဒီး အိၣ်ဒံးဝဲလၢ လံာ်တၢးတလါပူၤန့ၣ်, မ့ၢ်တၢ်လၢ အဘၣ်ဃးဒံးဒီး ပဒိၣ်ဒီး ပဒိၣ်အိးထီၣ် ကွီၢ်လၢ နဖီခိၣ်သ့ဝဲလီၤ. ပၢနုာ်နၤလၢ ဃိာ်ပူၤသ့ဝဲလီၤ. မဲလဘ့ တဲကဒီးဝဲ, တၢ်ကလဲၤအသး ထဲန့ၣ်တုၤန့ၣ် န့ၣ် ယတသ့ၣ်ညါနီတဘျီဘၣ်. ပိာ်မုၣ် တဲကဒီးအီၤ, မဲလဘ့ဧၢ, မ့ၢ်နဆိကမိၣ် ဒၣ်နဲတသ့ဘၣ်ဧါ. မ့ၢ်တၢ်ဂ့ၤ တမ့ၢ်ဘၣ်န့ၣ်, ပှၤကဘၣ် တဲနၤလၢ တၢ်လၢအတဂ့ၤ မၤကိးမံၤဒဲး ကိးဘျီဒဲးဧါ. မဲလဘ့ သ့ၣ်ညါက့ၤဝဲလၢ တၢ်လၢအမၤဝဲအံၤ တမ့ၢ်တၢ်လၢ အြကၢး ဝဲဘၣ်ဒီး တဲကတၢၢ်က့ၤဝဲ, ယမိၢ်ယပၢ် နာ်န့ၢ်ယၤ, ပှၤဂၤတဖၣ်နာ်န့ၢ်ယၤ, ဒီးယကကျဲးစၢး မၤဒ်သိး ယသုတလီၤတဲာ်လၢ ပှၤဂၤ တဖၣ် အတၢ်နာ်န့ၢ်ယၤ အဖီလာ်တဂ့ၤန့ၣ်လီၤ. ကၠ့ နံၤကမှံထီၣ်ဝဲဒီး တဲအီၤ နမ့ၢ်မၤဒ်န့ၣ်ဒီး ယကနာ်န့ၢ်နၤ ထီဘိလီၤ.
တၢ်ဆိၣ်တၢ်ထု, တၢ်သီၣ်ဝံသဲကလၤ, တၢ်ဒုၣ်ဒွဲၣ်ပှၤဂၤ, တၢ်အ့လံးလီၤထုးလီၤကး, တၢ်ဟံးန့ၣ်ဆူၣ် တၢ်တမံၤမံၤ လၢပှၤတဂၤဂၤအအိၣ်, တၢ်ဆိကမိၣ်ဆံး ပှၤဂၤ, ဒီးတၢ်အလုၢ်အလၢ် ဒ်အံၤအဂၤတဖၣ် အိၣ်အါမးလ ၢအမ့ၢ်ဒၣ် တၢ်အၢအက့ၢ်အဂီၤလၢ အဆံးဒီး ပတဟးဆှဲး အီၤဘၣ်ဒီး ပမၤအီၤန့ၣ်လီၤ. စီၤပီလူးစံးဝဲ ဟးဆှဲးအီၤကိးအက့ၢ်အဂီၤဒဲး တက့ၢ်.
