စံး ၂၈း၇, ယွၤမ့ၢ်ယဂံၢ်ယဘါဒီး ယကတီၤတဘ့ၣ်လီၤ. ယသးသန့ၤ ယသးလၢအီၤဒီး ယဒိးတၢ်မၤစၢၤယၤ … ယသူၣ်ဖှံသးညီဒိၣ်မး, ဒီး ယကစံးထီၣ်ပြတၢၤအီၤ လၢယတၢ်သးဝံၣ်လီၤ. ဖဲကီၢ်အမဲရကၤ ကလံၤစိး တချုးလၢ ပှၤလဲၤတၢ်လၢ သိလ့ၣ် ဒံးဘၣ်န့ၣ်, ပှၤဘၣ်လဲၤတၢ်လၢ ကျီၢ်လ့ၣ် လီၤ. ပှၤဝါဖံးဖိလၢ မုၢ်ဟဲထီၣ် တဖၣ် လဲၤသကိး ဝဲဆူ မုၢ်နုာ်တကပၤ အါမးလၢ အကဃုန့ၢ် တၢ်လီၢ်တၢ်ကျဲ လၢအဂ့ၤလၢ အကအိၣ်ကဆိးဝဲ လၢအပူၤအဂီၢ်လီၤ. ဒူၣ်ဖိထၢဖိ တဒူၣ် လၢအမ့ၢ်ဝဲ ဒီမိ၀ၤခံဂၤ ဒီးအဖိသၢဂၤ လဲၤဝဲလၢ မုၢ်ထီၣ်ဆူ ခဲလံဖီနယၣ် လဲၤတၢ်လၢ ကျီၢ်လ့ၣ်လီၤ. အဖိမုၣ်ခံဂၤဒီး ဖိခွါတဂၤလၢ အသးအိၣ် ၉ နံၣ်, ၇ နံၣ်ဒီး ၂ နံၣ်စုာ်စုာ်လီၤ.
ကျီၢ်လ့ၣ်လၢ အအိၣ်ဒီး အခိၣ်ဒုးအံၤ ဘၣ်တၢ်ယူထုးအီၤလၢ ကျီၢ်ဖိခံဒု, လဲၤတၢ်ဃၢဃၢ ဘၣ်ဆၣ် လဲၤတၢ်တနံၤဘၣ်တနံၤ လီၤ. ဘၣ်တနံၤ အဖိမုၣ်သဒါ ၂ နံၣ်တဂၤ ဆါထီၣ်ဝဲ သတူၢ်ကလာ်လီၤ. အမိၢ်အပၢ် ကျဲးစၢး ကွၢ်ဖိသၣ်လၢာ်သး ဘၣ်ဆၣ် ဖိမုၣ်လၢ အမံၤ မံၣ်နၢဘၣ် တဂၤ လီၤဝါဒီး အဂံၢ်စၢ်လီၤ ဒီးတသါ လၢၤဘၣ်. အပၢ်လဲၤခူၣ် တၢ်ပူၤလၢ အကခူၣ်လီၤအီၤ အဂီၢ်လီၤ. အမိၢ်စ့ၢ်ကီး ဆါထီၣ်ဝဲ နးနး ကလဲာ်ဒီး အပၢ်နၢ်ပၢၢ်ဝဲလၢ ကဘၣ်ခူၣ်လီၤ အဖိအမါ ခံဂၤအံၤ လၢတၢ်လီၢ်န့ၣ်လီၤ. လၢတၢ်လီၢ်ခံန့ၣ် ကျီၢ်လ့ၣ် ဟဲစ့ၢ်ကီး ဝဲတဆိ ဒီးလ့ၣ် အကစၢ်ပာ်လီၤ အသးလၢ အကဆီလီၤ အဒဲဖိလၢ အဟဲစိာ် ဃုာ်ဝဲလၢ အကမံဝဲလၢ အပူၤလၢ မုၢ်နၤန့ၣ်လီၤ. ဘၣ်ဆၣ် ထံၣ်စိမ့ၣ်အူ လုၢ်လၢ တၢ်မဲာ်ညါဒီး တဲလိာ်အသးလၢ အကလဲၤကဒီး တၢ်ဒီး မ့ၢ်ချုးန့ၢ် ပှၤလဲၤတၢ်လၢ တၢ်မဲာ်ညါဒီး ကအိၣ်ဘှံးဝဲ လၢပှၤအသကိးလီၤ.
ဖဲအလဲၤတုၤဝဲဒီး ထံၣ်ဝဲ ပှၤတဂၤ ဆုးလီၤအခိၣ်လၢ အစုညါသး အပူၤလီၤ. သံကွၢ်ဝဲ သုဘၣ် တၢ်ဒ်လဲၣ်. ပှၤန့ၣ်စံးဆၢအီၤ, ပဖိမုၣ်အဆံးဖိ တဂၤသံလံ, ဒီးယမါ စ့ၢ်ကီး ဘူးလၢအကသံလီၤ. ပှၤတမံှၤ အပိာ်မုၣ် တဂၤတဲအီၤ ယဝၤမ့ၢ် ကသံၣ်သရၣ် တဂၤလီၤ. ဘၣ်တဘၣ် ပမၤစၢၤ သုကသ့တမံၤမံၤလီၤ. ကသံၣ်သရၣ် ဟံးန့ၢ်ကသံၣ် တဖၣ်လၢ အဟဲစိာ်ဃုာ်ဝဲ ဒီးအလဲၤနုာ်ကွၢ် မိၢ်လၢ အဆါတဂၤ န့ၣ်လီၤ. ကသံၣ်သရၣ် အမါတခီ ကွၢ်ဝဲဖိမုၣ်ဆံး မံၣ်နၢဘၣ် လီၤ. ကွၢ်ဝဲဝံၤဒီး တဲ, ယဆိကမိၣ်လၢ နဖိမုၣ်အံၤ တသံဘၣ်. သံတယူာ်ဝဲဒီး တသ့ၣ်ညါ ထီၣ်တၢ်လၢ ခိဘၣ်. ယမၤစၢၤ ပိာ်မုၣ်ဖိအံၤ သ့ဝဲလီၤ. မ့ၢ်နကဟ့ၣ်ယၤအခွဲး လၢယကကွၢ် အီၤဧါ. အပၢ်ဟ့ၣ်အီၤအခွဲးလီၤ. ကသံၣ်သရၣ်မုၣ် ဃ့ထံချီ, မၤလၢၤထီၣ်ဖိသၣ်ဒီး တတီၤဒိၣ်ဒိၣ် ဟဲက့ၤစိာ်ထီၣ်ဖိသၣ် ဘိၣ်ဘံ အသးလၢ တၢ်ကံးညာ် ဒီးကသါဝဲလီၤ. တဲဝဲ နဖိမုၣ် အတၢ်ဆါမ့ၢ် ဝဲ တၢ်ဟၢဖၢလူ ခီလရၣ် လီၤ. ပှၤလၢ အသးပ့ၤနီၣ် အသးလၢ တၢ်ဆါအံၤ အဃိလီၤဂာ်ဒ် ပှၤသံအသိးလီၤ. ပဟဲတုၤ တချုးလၢ သုခူၣ်လီၤအီၤ ဒံးဘၣ်န့ၣ် မ့ၢ်တၢ်ဂ့ၤလီၤ. ကသံၣ်သရၣ် ဒီမိၤ၀ၤခံဂၤ အံၤကွၢ်ဖိသၣ်ဒီးအမိၢ်, ယါဘျါဝဲဒီး လၢစှၤနံၤ အတီၢ်ပူၤ အဝဲသ့ၣ် ခံဒူၣ်လၢာ် စးထီၣ်လဲၤကဒီး အတၢ်လဲၤလီၤ. စံးထီၣ်ပြတၢၤယွၤလၢ အဆိၣ်ဂ့ၤအဝဲသ့ၣ် ဒီးပှၤအခီၣ်ထံး တဒူၣ်ပာ်ဝဲလၢ အမ့ၢ်တၢ်လီၤလး လၢအဂီၢ်လီၤ.
