၅ မိၤ ၅း၁၆, ယူးယီၣ် နမိၢ်နပၢ်တက့ၢ်. မုၣ်ကမဲသးစၢ်တဂၤ အိၣ်ဒီးအဖိလွံၢ်ဂၤ, ပိာ်ခွါခံဂၤ, ပိာ်မုၣ်ခံဂၤလီၤ. အဲၣ်အဖိဒိၣ်မး ဒီးတိာ်သူၣ်ပာ်သး လၢအကဟ့ၣ်အဖိလၢ တၢ်ကူၣ်ဘၣ်ကူၣ်သ့လၢ အထီဝဲ ဒီးလၢ အကမၤန့ၢ် တၢ်မၤ လၢအဂ့ၤတဖၣ် လၢတၢ်လုၢ်အီၣ်အသးသမူ အဂီၢ်လီၤ. ဆှၢအဖိတဖၣ်လၢ ကၠိကိးဂၤဒဲးဒီး ဒ်သိး ဆှၢဝဲကန့ၢ်အဂီၢ်ဘၣ်မၤ တၢ်ဆူၣ်ဆူၣ်ကလဲာ်လီၤ. အဝဲဘၣ်သိၣ်လိတၢ်, ခၠဲၣ်တၢ်တ့တၢ်, ဒီးဆှုၣ်န့ၢ်စ့ၢ်ကီး ပှၤအိၣ်ဘူးဒီးအီၤတဖၣ် အတၢ်ကူတၢ်သိး ဒီးဒိးန့ၢ်စ့လၢ အမၤတၢ်အဃိ, အကျိၣ်ဖိစ့ဖိလၢ ဝဲလၢအဖိတဖၣ် ကမၤလိဘၣ်တၢ်န့ၣ်လီၤ. အဖိခွါ ဖျိခီလ့ၣ်ခံဂၤ လၢာ်, အဖိမုၣ် တဖၣ်ကဲထီၣ်ဘၣ်ကၠိသရၣ်မုၣ်လီၤ. တုၤအပူၤထီၣ်ကွံာ် အနံၣ် ၅၀ ဒီး မ့ၢ်လၢ အမၤတၢ် ဆူၣ်မးဒီး တအိၣ်ဒီး တၢ်အိၣ်ဘှံးဘၣ်အဃိ, ဖှံၣ်လီၤ ဃဲၤလီၤဝဲဒီး ဖျါလီၤဂာ် လၢပှၤအသးအိၣ် ၇၀, ၈၀ လီၤ. အဝဲလီၤဃံၤ သံတယူာ် ဘၣ်အသးဖဲ အမၤတၢ် အဖၢမုၢ်လီၤ. အဖိလွံၢ်ဂၤလၢာ် ဟဲက့ၤကွၢ်အီၤ, ဆၢထၢၣ်ဝးတရံးအီၤလီၤ. ဖိသ့ၣ်တဖၣ် တုၤအထံၣ်ဘၣ်အမိၢ် အက့ၢ်အဂီၤလၢ အဖျါပှၢ်, လီၤညွံးလီၤဘီဒီး သ့ၣ်ညါဝဲလၢ အမိၢ်အတၢ်မၤဘျုးအဝဲသ့ၣ်ဒီး အတၢ်တူၢ်ဆါခီၣ်ဆါအသး လၢအဂီၢ်အဃိ, မ့ၢ်တၢ်ဆိၣ်ဂ့ၤ အလုၢ်ဒိၣ်ပှ့ၤဒိၣ် လၢအဝဲသ့ၣ်အဂီၢ်လီၤ. အဖိခွါအဒိၣ်တဂၤ ဖဲအမိၢ်သ့ၣ်ညါလီၤက့ၤအသး တစိၢ်န့ၣ်, ဟၢထီၣ်အမိၢ်လၢ အစုတီၤလိၤဒီး စံးဝဲ, မိၢ်ဧၢ, နမ့ၢ်မး မိၢ်လၢ အလီၤလးဒီး အလုၢ်ဒိၣ်ပှ့ၤဒိၣ် ကတၢၢ်လၢ ပဝဲ နဖိတဖၣ်အဂီၢ်လီၤ. အမိၢ်တဲဆၢအီၤ, ကၠီန်ဧၢ, နတကတိၤလၢ တၢ်ကတိၤတဖၣ်အံၤ လၢညါနီတဘျီဘၣ်. အမိၢ်နံၤကမှံထီၣ်ဒီး ဖျါလၢ တၢ်ကတိၤလၢ အဖိတဲအီၤအံၤ မ့ၢ်တၢ် မၤမုာ်မၤဖှံအသးလီၤ. ဘၣ်ဆၣ်ဒီး တၢ်ကတိၤ စံးဘျုး အံၤဒုးဆူၣ်ထီၣ်အမိၢ်အဂံၢ်အဘါ နာ်သက့ တလၢပှဲၤဝဲလၢ ကမၤဘျါ က့ၤမိၢ်အတၢ်ဆါဘၣ်. တစိၢ်ဖိဒီး သးပ့ၤနီၣ်ကဒီး အသးဒီး လၢစှၤနၣ်ရံၣ်အတီၢ်ပူၤ အသးသမူ ဟးထီၣ်ကွံာ် ဝဲလီၤ.
ဖိလွံၢ်ဂၤလၢာ် မ့ၢ်ပာ်ဖျါထီၣ် အတၢ်စံးဘျုး စံးဖှိၣ်ဆၢက့ၤအမိၢ် အတၢ်မၤဘျုး လၢအခီၣ်ထံး လံၤလံၤ န့ၣ်ဒီး အမိၢ်ကအိၣ်မူအါထီၣ်ဒံး တဘျုးနံၣ်လီၤ.
