လူၤကၣ် ၂၂း၄၃, ကလူးတဂၤ လီၣ်ဖျါထီၣ်အသးလၢအီၤ, ဒီးဒုးဆူၣ်ထီၣ် အဂံၢ်အဘါလီၤ. ပဝဲတဂၤဒီးတဂၤ ပအိၣ်ဒီး ကလူးတဂၤဒီးတဂၤ လၢအကကဟုကယာ်ပှၤ လီၤ. ပကလူးတဂၤဒီး တဂၤ မၤစၢၤ ကဟုကယာ်ပှၤန့ၣ် ပတသ့ၣ်ညါဘၣ်. ပှၤလၢ အကလူးလီၣ်ဖျါထီၣ် အသးလၢအီၤ လၢတၢ်မၤစၢၤ အဂီၢ်အိၣ်ဝဲလီၤ. ကလူး လီၣ်ဖျါထီၣ်အသးထဲဒၣ် ပှၤလၢအြကၢးလီၣ်ဖျါဝဲ တဖၣ်န့ၣ်လီၤ.
အဒိအဂ့ၤကတၢၢ်ဖျါဝဲ လၢတနံၤအံၤ အတၢ်ကလုၢ်ထူ န့ၣ်လီၤ. ဖဲက့ၤသစ့ၤမနၤ န့ၣ်ခရံာ်အိၣ်လၢ တၢ်သးဖှီၣ်ဒီး တၢ်ကိၢ်တၢ်ဂီၤ ဒိၣ်ကတၢၢ်အပူၤ တုၤအကပၢၤ လီၤလူဝဲဒ် တၢ်သွံၣ်အသိးလီၤ. ယွၤထံၣ်တၢ်အံၤဒီး လၢတၢ်အဲၣ်အဖိ တဂၤအံၤအဃိ ပျဲလီၤ ဝဲအကလူး လၢအလီၢ်ထီကတၢၢ် တဂၤကဟဲ ဒုးဆူၣ်ထီၣ် အဂံၢ်အဘါလီၤ. ကလူးအံၤ တဟဲလၢ အကဒုးပူၤဖျဲးအီၤဒီး တၢ်ကိၢ်တၢ်ဂီၤအံၤဘၣ်. မ့မ့ၢ် တဲဘၣ်အီၤလၢ အတၢ်ဒိးဘၣ်တၢ်နးတၢ်ဖှီၣ်အဒိၣ်ကတၢၢ်အံၤ မ့ၢ်န့ၢ်ဒီး ကဒုးပူၤဖျဲးပှၤဂီၢ်မုၢ် တဖၣ်လၢ တၢ်သံလီၤထူလီၤယိာ်ဒီး ကန့ၢ်ဘၣ် တၢ်မူအထူအယိာ်လီၤ. ခရံာ်လၢ အကဘၣ်တူၢ်တၢ်အံၤ သ့ၣ်ညါဝဲလၢ အကန့ၢ်ဘၣ် အစိကမီၤလၢ အကဟ့ၣ်တၢ်အုၣ်က့ၤခီၣ်က့ၤ အဃိ, ယွၤဟ့ၣ်အီၤ တၢ်ဂံၢ်တၢ်ဘါလၢ အကတူၢ်တၢ်ခီဖျိ ကလူးအံၤလီၤ.
အဒိအဂၤတခါ, လၢကီၢ်အလးစခၣ်, ဘၣ်ဃးအမဲရကၤကလံၤစိး, ပှၤမုၣ်ကမဲတဂၤ, လၢအမံၤမ့ၢ် မံးစံးဒူဘ့ၣ် န့ၣ်, ဘၣ်န့ၢ်တၢ်သံတခီပၤ ကလံၤတၢ်ဆါ တကလုာ်ဒီးမ့ၢ်မၤလၢၤအခီၣ်လၢ ထံချီကိၢ်မး ဟးသ့ တဆံးတက့ၢ်လၢအဒၢးဖိပူၤလီၤ. ကီၢ်အလးစခၣ်အံၤ မ့ၢ်ကီၢ်လၢ တၢ်ဂိၢ်ဒိၣ်မး လီၤ. ဘၣ်တဂီၤန့ၣ် တၢ်ဂိၢ်ဒိၣ်န့ၢ်ဒံး အညီနုၢ်အသိးအဃိ, အဝဲလိၣ်ဘၣ် ထံချီလၢ အကမၤလၢၤထီၣ်အခီၣ်ဒီး အမိၢ်ပှၢ်လီၤ. ပိာ်မုၣ်တဂၤလၢ အဟဲစိာ်န့ၢ်အီၤ သ့ၣ်မုၣ်န့ၣ် တဟဲပၢၢ်ထီၣ်ဘၣ်. ဒီးအသ့ၣ်မုၣ် ကလၢာ်တ့ၢ်လီၤ. အဝဲဃ့ဘါထုကဖၣ်ယွၤ သပှၢ်ပှၢ်လၢ အကထိးဘၣ် ပှၤတဂၤဂၤအသး လၢအကဟဲစိာ်န့ၢ်အီၤ သ့ၣ်မုၣ်လီၤ. ပှၤတဟဲပၢၢ်ထီၣ်နီတဂၤဘၣ်. အသ့ၣ်မုၣ်လၢာ်လံ. အဟံၣ်စ့ၢ်ကီး မ့ၣ်အူ တအိၣ်လၢအကမၤ လၢၤထီၣ် အီၤအဃိ အဝဲကဘၣ်အိၣ်ခုၣ်သံဒၣ်အသး လီၤ. ဘါထုကဖၣ်တၢ်ဒီးစံးဝဲ, ကစၢ်ဧၢ, ယကလီၤတကၤသံလီၤ. မ့မ့ၢ် တၢ်ဘၣ်နသးလၢ ယကသံဒီး ယသးမုာ်ကီးလီၤ. လၢတၢ်တပာ်သူၣ်ပာ်သးအပူၤ ပှၤဖးထီ တဂၤဟဲစိာ်သ့ၣ်မုၣ်ဒီး မၤပှဲၤသံးတၣ် လၢအပာ်သ့ၣ်မုၣ်လၢ အပူၤဒီး မၤကဲၤထီၣ်မ့ၣ်အူ, ဒိထီၣ်ထံချီ, မၤလၢၤထီၣ်ဟံၣ်လီၤ. ပှၤအံၤ ကူတၢ်သိးတၢ်အသူဒီး အဆ့ကၤဖီခိၣ်မ့ၢ် တၢ်ကံးညာ်သူလီၤ. ဖဲပိာ်မုၣ်အံၤ သါကသံကွၢ်အီၤလၢ အမ့ၢ်ကလူးတဂၤဧါန့ၣ် အဝဲကွၢ်ဃီၤတၢ်ဆူအအိၣ်နံၤကမှံထီၣ် ဝဲ ဖျးလီၤအခိၣ်ဝံၤ ဟးထီၣ်ကွံာ်လီၤ.
ပိာ်မုၣ်အံၤ ကွၢ်လီၤတၢ်ဆူ တၢ်ချၢဖဲ ပှၤတမှံၤတဂၤအံၤ က့ၤလီၤအကျဲးဒီး ထံၣ်ဒၣ်ထဲ မူခိၣ်ဖီဖးတီၣ်လီၤ. မ့မ့ၢ်ပှၤအခီၣ်လီၢ်တထံၣ်ဝဲဘၣ်. ကွၢ်ကဒီးအသ့ၣ်မုၣ် ပူၣ်အလီၢ်ထံၣ်ဝဲလၢ အသ့ၣ်မုၣ် အိၣ်ဒၣ်ပှဲၤအလီၢ်ဒီး မူခိၣ်ဖီ အိၣ်ဝးတရံး သ့ၣ်မုၣ်န့ၣ်လီၤ. မုၣ်ကမဲအံၤ စံးဘျုးက့ၤယွၤလၢ အမၢလီၤ အကလူးတဂၤအံၤ လၢအကဟဲမၤလၢၤထီၣ်အီၤဒီး အဟံၣ်န့ၣ်လီၤ.
