ကလီး ၃း၈, ညိကွံာ်တၢ်အံၤ တဖၣ်ခဲလၢာ်, တၢ်သူၣ်ဒိၣ်သးဒိၣ်, တၢ်သူၣ်ထီၣ်သးထီၣ်, တၢ်ဆၢအၢ, တၢ်ဒုၣ်ဒွဲၣ်, တၢ်ကတိၤမဲာ်ဆှး လၢအဟဲထီၣ်လၢ သုထးခိၣ်န့ၣ် တက့ၢ်. ပအိၣ်ဖျဲၣ်ဘ့ၣ်ဆ့, သဘျ့ဝဲ တအိၣ်ဒီး တၢ်သံၣ်သူမီၢ်ကျာ်ဘၣ်, ဒီးကဘၣ် ဒိၣ်ထီၣ်ဝဲ လၢနီၢ်ခိဒီးနီၢ်သး ခံကပၤလၢာ်လီၤ. ယွၤပာ်လီၤ န့ၢ်ပှၤတၢ်အပီးအလီ, အသွဲၣ်, အစဲ, အပဒ့လၢ ပနီၢ်ခိအပူၤအချၢ လၢအဒိၣ်ထီၣ်ဝဲသ့ လၢခံကပၤလၢာ်အဂီၢ်လီၤ. လိၣ်က့ၤဒၣ်လၢ ပကဘၣ်ဒုးဒိၣ်ထီၣ်အီၤ, သံၣ်ခွဲၣ်ကတီၤဒီး ဂီၤကၢ် ထီၣ်အီၤလီၤ. ပမ့ၢ်ပျိၤထီၣ်ပတၢ်ဒိၣ်ထီၣ်လၢ အအၢတကပၤဒီး ပကအၢထီၣ်ဝဲထဲသိး မုၣ်ကီၤလံၢ် လီၤ. ပမ့ၢ်ပျိၤထီၣ် လၢအဂ့ၤ တကပၤဒီး ပကဂ့ၤပဝဲ တုၤလၢ အလီၤဂာ်ခရံာ်န့ၣ်လီၤ. ပကလၢထီၣ်ပှဲၤထီၣ်ဝဲ ဒ်ခရံာ်လီၤ. လိၣ်ဝဲ ပကပာ်လီၤ တၢ်အခီၣ်ထံး လၢအကျၢၤဒီး ပစိာ်ထီၣ်အီၤ တဆီဘၣ်တဆီ လီၤ. ပမ့ၢ်အိၣ် ကယီ, တမၤထီၣ်ဘှီထီၣ် တၢ်နီတမံၤဒီး မ့ၢ်တစိာ်ကဖီထီၣ် တၢ်နီတမံၤဘၣ်ဒီး တၢ်ဒိၣ်ထီၣ် တအိၣ်ဘၣ်ဒီး အက့ၢ်အဂီၤ အဖျါနီတမံၤဘၣ်.
လၢပတၢ်သူၣ်ထီၣ်ပနီၢ်သးအနီ န့ၣ်လိၣ်ဝဲ ပကဘၣ်စူးကွံာ်ညိကွံာ် အက့ၢ်အဂီၤ လၢအတဂ့ၤတဖၣ် တခါဘၣ်တခါလီၤ. ကီၢ်ြဖၣ်စ့ၣ် အပှၤစိးပျၤပှၤကညီအဂီၤ, အမံၤဒိၣ်ကတၢၢ်အကျါတဂၤ လၢအမံၤရီဒ့ၣ် န့ၣ်, ဖဲအစိးပျၤတၢ်ဂီၤလၢ အလီၤစံးပြတၢၤဒီး အလုၢ်ဒိၣ်ပှ့ၤဒိၣ်ကတၢၢ်အခါ, တူၢ်ဒိၣ်မုၣ်လၢ အပာ်ဒိၣ် အတၢ်မၤတဖၣ် တဂၤ ဟဲဆူအအိၣ် ဒီးသံကွၢ်အီၤ, တၢ်စိးပျၤအတၢ်မၤအံၤ ကီကစီဒီဧါ. တဲဆၢဝဲ တကီဘၣ်တူၢ်ဒိၣ်မုၣ်ဧၢ, အိၣ်ဒၣ် နကဘၣ်ပှ့ၤန့ၢ် လၢၢ်ဝါ ဒီးဒိကွံာ်, ပျၤကွံာ်, တရီၣ်ကွံာ်, ကွးကွံာ်အယူၤနၢၣ်, ဒိချိ, စိရိ တဖၣ်လၢ နတအဲၣ်ဒိးအီၤဘၣ်န့ၣ်လီၤ. တၢ်စံးဆၢ အံၤလီၤဂာ်ကညီမး လၢပကမၤအီၤလီၤ. ပမ့ၢ်မၤကွၢ်ဒီး ပကသ့ၣ်ညါလီၤ. တၢ်ဒိကွံာ်, ပျၤကွံာ် တၢ်အလာ်အၢ တဖၣ်မ့ၢ်ဝဲ တနံၤအံၤ အတၢ်မၤလိလၢ ပကဘၣ်ညိကွံာ်တၢ်တဂ့ၤတဖၣ် န့ၣ်လီၤ.
