ယၤကိာ် ၄း၁၁, သုတစံးအၢစံးသီလိာ်သုသးတဂ့ၤ.
ပှၤတနီၤနီၤ တၢ်မုာ်ဘၣ်အီၤလၢ အကတိၤပှၤဂၤ အဂ့ၢ်, သီၣ်ဝံသဲကလၤပှၤဂၤ အဂ့ၢ် ပၢၢ်တုၤလၢ တၢ်ခဲၣ်သူခဲၣ်ဂီၤ ဒၣ်လဲာ်လီၤ. ပှၤလၢအတဲပှၤဂၤအဂ့ၢ်မုာ် တဖၣ်စံးဝဲ တၢ်သီၣ်ဝံသဲကလၤ အိၣ်ဒီး အဘျုးလၢ အမၤမုာ်ပှၤ ကတိၤတၢ်တဖၣ် အသးလၢ အကသးပ့ၤနီၣ်ကွံာ် အတၢ်သူၣ်ကိၢ်သးဂီၤ, ဒီးအမူအဒါ အဃၢတဖၣ် လၢအကဘၣ်မၤဝဲန့ၣ်လီၤ.
ဘၣ်ဆၣ်ဒီး တၢ်သီၣ်ဝံသဲကလၤ အိၣ်ဒီး တၢ်သးတကဆှီဘၣ်ဒီး ထုးလီၤပှၤလၢ ပကတိၤအဂ့ၢ်တဖၣ်ဆူ တၢ်လီၢ်အဖုၣ်ဒီး အသူးအသ့ၣ်တအိၣ် တဖၣ်မ့ၢ်တၢ် မၤတၢ်ဒဲးဘးလီၤ. စီၤယၤကိာ် ြတီဘၣ်ပှၤလၢ ပသုတစံးအၢစံးသီလိာ်ပသး ကဒဲကဒဲ တဂ့ၤလီၤ. ခရံာ်တဲဘၣ်ပှၤလၢ ပကတဲတၢ်ထဲ တၢ်လၢအမ့ၢ်ဒီး တမ့ၢ် တၢ်လၢ အတမ့ၢ်ဘၣ်န့ၣ်လီၤ. တၢ်မၤလိာ်ပှၤလၢ, ဒ်ခရံာ်အပျဲၢ် တဖၣ်အသိး ပဘၣ်အဲၣ်လိာ်ပသးဒ် ဒီပုၢ်ဝဲၢ်အသိး ဒီးပမ့ၢ်အဲၣ်လိာ်ပသးနီၢ်နီၢ် ဒီး ပတဲအၢတဲသီလိာ်ပသး တသ့တကဲလ့ၤတက့ၤဘၣ်. ကအိၣ်ထဲတၢ်ဆၢဂ့ၤ ဆၢဝါလိာ်သး တခီလီၤ.
တဘျီဘျီ တၢ်ကစီၣ်လီၤဆီတုၤ ဝဲလၢပကျါဒီး မ့ၢ်တၢ်တမ့ၢ်တၢ်, တၢ်ဃုသ့ၣ်ညါလီၤတံၢ်တအိၣ်ဒံး ဘၣ်ဒီး ပှၤတနီၤနီၤ တဲထွဲဝဲ, ရၤလီၤဝဲ တၢ်ကစီၣ်လၢ အတလီၤတံၢ်လီၤဆဲး ဘၣ်န့ၣ်ဒီး လီၢ်ခံဖျါထီၣ်ဝဲလၢ အမ့ၢ် ဒၣ်တၢ်ကစီၣ်လၢ အတတီဘၣ်န့ၣ်လီၤ. အဝဲအံၤ မ့ၢ်တၢ်ကမၣ်ဖးဒိၣ်တမံၤလီၤ.
ပူၤကွံာ်လံ အနံၣ်ယဲၢ်ဆံဃၣ်ဃၣ်, တၢ်ကစီၣ် ဟူထီၣ်လၢ ပှၤတဂၤအမံၤ ပးနီ, မ့ၢ်ပှၤလၢ အဒီၣ်ပှၤကိာ်, ဖီၣ်န့ၢ်ဆူၣ် ပှၤပိာ်မုၣ်လီၤ. တၢ်ဟူတၢ်သါဒ်အံၤ ဒီးဖိဒံဖိသၣ် ပိာ်မုၣ်ပိာ်မၢၤ ဘၣ်ပျံၤဘၣ်ဖုးတၢ်, ဟးထီၣ်လၢ ဟံၣ်ချၢတဘူၣ်ဘၣ်. ပးနီ အကစၢ်နၢ်ဟူဝဲဒီး ဆိကမိၣ်ပျံၤလီၤအသးလီၤ. ပှၤသ့ၣ်ညါက့ၤ လၢအမ့ၢ်တၢ်ကစီၣ် တတီဘၣ်လၢခံလီၤ. တၢ်ဒ်အံၤ မၤဟးဂီၤတၢ်ဒိၣ်မးလီၤ.
