ဧ့ၤ ၁၃း၁၈, ဘါထုကဖၣ် တၢ်လၢပဂီၢ်တက့ၢ်. အဂ့ၢ်ဒ်အံၤ ပဆိကမိၣ် လၢပသးသ့ၣ်ညါဒၣ်တၢ်အဂ့ၤ, ဒီးတၢ်မိၣ်မၤပသးလၢ တၢ်အဂ့ၤလၢ တၢ်ခဲလၢာ်အပူၤလီၤ.
ပအိၣ်လၢတၢ်အၢတၢ်သီ အကလုာ်ကလုာ် အကျါလီၤ. ပမှံၤပပှၢ်စံးဝဲ ပအိၣ်လၢ ပှၤချုၣ်အကျါ ပချုၣ်, ပအိၣ်လၢ ပှၤနါအကျါပနါလီၤ. လံာ်စီဆှံတဲဘၣ်ပှၤလၢ ပဘၣ်ဟံးဃာ်တၢ်တီတၢ်လိၤ ဒီးတဘၣ်ကဒံကဒါဘၣ်န့ၣ်လီၤ.
ပှၤသးစၢ်တဂၤ တၢ်ငါအီၤလၢ အကခွဲသိၣ်ခွဲပျီ စ့တၢးဖးဒိၣ် တဖျၢၣ်လီၤ. လၢတၢးအသနၢၣ်စီၢ်နီၤခိၣ် (စပွဲ) တဖျၢၣ်အဖီလာ်န့ၣ် ထံၣ်ဝဲ စ့စးခိ တကဒိၣ်လီၤ. ပှၤတတဲလၢစ့စးခိလီၤမၢ် ဝဲနီတဘျီဘၣ်. ပှၤတထံၣ် နီတဂၤဘၣ်. စ့အါမးအဃိ, အသးမၢန့ၢ်ဆီၣ်ခံအီၤလၢ အကဟံးန့ၢ်စ့အံၤဒီး ကသူဝဲလၢအမိၢ် ကလဲၤကွၢ် ကီထံဂၤကီၢ်ဂၤအဂီၢ် လီၤ. က့ၤစိာ်ဝဲဆူအဟံၣ်လီၤ. ဘၣ်ဆၣ် မ့ၢ်ခရံာ်ဖိ တဂၤဒီး တၢ်သးမံ ဒီးအီၤတအိၣ်ဘၣ်. အသးသိၣ်ဃီၣ်အီၤဒီး က့ၤစိာ်ဝဲဆူ စ့တၢး ဒီးလဲၤပာ်ထီၣ်ဝဲလၢ စ့တၢးဖးဒိၣ် အံၤအခိၣ် အစီၢ်နီၤခိၣ်အဖီခိၣ် ဒီးတဲဘၣ်အီၤလၢ အထံၣ်န့ၢ်ဝဲ ဖဲလဲၣ်န့ၣ်လီၤ. စ့တၢးခိၣ်သံကွၢ်အီၤ, ဘၣ်မနုၤ လၢနဟဲက့ၤစိာ် အီၤဖဲအံၤလဲၣ်. တဲဆၢဝဲ, လံာ်စီဆှံ တဲလၢပဘၣ်အိၣ်ဒီး တၢ်တီတၢ်လိၤလၢ ပပူၤလီၤ. အမဲာ်ညါ ယအိၣ်ဃုာ် ဒီးတၢ်ဘျၣ်တဂၤ တမၤမုာ်မၤမံယသး ဘၣ်. စ့တၢးခိၣ်တဲကဒီးအီၤ တၢ်ဘျၣ်အိၣ်လၢ နသကိးတဂၤဧါ. စံးဆၢဝဲ, ယမ့ၢ်ဟံးဃာ် စ့အံၤဒီး ယမ့ၢ်တၢ်ဘျၣ် တဂၤဒီးယအိၣ်လၢ အသကိးတမုာ်တကဲဘၣ်. လၢအတၢ်တီတၢ်လိၤအဃိ, စ့တၢးခိၣ်ပာ်ကဲအီၤ, နာ်န့ၢ်အီၤ, ဟ့ၣ်အီၤတၢ်မၤလၢအဂ့ၤလီၤ. ပှၤကိးဂၤလၢ အရ့ဘၣ်အီၤ အဲၣ်အီၤဒီး နာ်န့ၢ်အီၤလီၤ. အတၢ်အိၣ်မူ မ့ၢ်တၢ်ဟီတရးဖးဒိၣ် တယုၢ်လီၤ. ခရံာ်ဖိကိးဂၤ ဒ်ပှၤအဝဲအံၤ ဟ့ၣ်ဝဲအဒိ အသိးတဘၣ်အိၣ်ဃုာ်ဒီးတၢ်ဘျၣ်တဂၤဘၣ်.
