ယိၤဟၣ် ၄း၂၃, အဆၢကတီၢ်ဘၣ်ခဲကနံၣ်အံၤ, ဖဲပှၤဘါတၢ်နီၢ်နီၢ်တဖၣ် န့ၣ်ကဘူၣ်ထီၣ်ဘါထီၣ်ပၢ်လၢ သူၣ်လၢသး ဒီးတၢ်မ့ၢ်တၢ်တီလီၤ.
ပဘါယွၤတသ့ထဲ လၢတၢ်လုၢ်ဟံၣ် (သရိာ်) ပူၤဘၣ်. ထဲလၢ ဒဲစီဆှံအပူၤ ဘၣ်. သ့ဝဲလၢ တၢ်လီၢ်ကိးပူၤဒဲး ဘၣ်ဆၣ် ဒီးပဘါအီၤလၢ သူၣ်လၢသးဒီး လၢတၢ်မ့ၢ်တၢ်တီလီၤ.
ပူၤကွံာ်တဘျုးနံၣ်လံ, ပိာ်မုၣ်တဂၤ လၢအဖိအိၣ်အါဂၤဒီး ဘၣ်မၤတၢ်လၢာ် ဂံၢ်လၢာ်ဘါ လၢကလုၢ်အီၣ်အဖိတဖၣ် အဂီၢ်လၢ အဟံၣ်လၢ အဆံးဝဲ အပူၤ လီၤ. ဆှုၣ်အဖိတဖၣ် အတၢ်ကူတၢ်သိး အမဲာ်ညါ ဆှုၣ်န့ၢ်စ့ၢ်ကီး ပှၤလၢအအိၣ်ဘူးဒီးအီၤတဖၣ် အတၢ်ကူတၢ်သိး လၢကမၤန့ၢ် စ့ၢ်ကီးစ့ဖိ တဆံးတက့ၢ်လၢ ကလုၢ်အီၣ်အဖိတဖၣ် အဂီၢ်လီၤ. မ့ၢ်ပိာ်မုၣ်လၢအအဲၣ်ထူအဲၣ်ယွၤ, အဲၣ်တံၤအဲၣ်သကိး, ထီၣ်ဘူၣ်တၢ်ဘါတၢ်ဒီး ကဲထီၣ်ဝဲပှၤဂၤတဖၣ် အတၢ်ကွၢ်လိမၤဒိးဒီး တၢ်ဂံၢ်တၢ်ဘါလီၤ. တၢ်အိၣ်ဖှိၣ်သရၣ်ဒၣ်လဲာ် လဲၤဆူအအိၣ်တဘျီတဘျီ လၢကမၤန့ၢ် တၢ်မၤလိလၢအအိၣ်လီၤ. တဘျီသံကွၢ်အီၤ, ဒီပုၢ်ဝဲၢ်မုၣ်ဧၢ, နတၢ်မၤအါမး နဟံၣ် ကတံာ်ဝဲဘၣ်ဆၣ် နမ့ၢ်ပှၤလၢ အအဲၣ်ယွၤဒီး နဒၢးပူၤ အံၤတၢ်လီၢ်တလီၤဟိနီတကဝီၤ လၢနကဘါထုကဖၣ် တၢ်ဘၣ်. မ့ၢ်နမၤကီး ဒ်လဲၣ်. တဲဆၢဝဲ, တုၤယသးအိၣ်ရ့ဒီးယွၤဒီး ဘါထုကဖၣ်တၢ်ဒီး ယဆ့ၣ်နီၤပဲဘၢ ယမဲာ်လၢတၢ်ကံးညာ်လၢ ယညီနုၢ်စၢဃာ်အီၤလၢ ယမဲာ်ညါဖဲ ယဖံးတၢ်မၤတၢ်အခါဒ်သိး ယတၢ်ကူတၢ်ကၤ အသုတဘၣ် အၢတဂ့ၤ အဂီၢ်န့ၣ်ဒီး ယဘါထုကဖၣ် တၢ်, ဆိကမိၣ်ထီၣ်လံာ်စီဆှံ လၢအဘၣ်ထွဲဒီး တၢ်ဂ့ၢ်လၢ ယကဘါထုကဖၣ် တၢ်လၢအဂီၢ်န့ၣ်လီၤ. ဒီးယသးမံသးမုာ်လီၤ.
သရၣ်အံၤတုၤအက့ၤဒီး စံးဝဲ သါသ့ၣ်နီၣ်ထီၣ်တနံၤအံၤ အတၢ်ကလုၢ်ထူလၢ ခရံာ်ကတိၤတၢ် ဒီးပှၤရှၤမရံမုၣ် တဂၤလၢ စီၤယၤကိာ်အထံပူၤအဃၢၤ န့ၣ်လီၤ. ပသးထီၣ်ဘးဆူ ယွၤအအိၣ် သ့ဖဲ ပဘါအီၤလၢ သူၣ်လၢသးဒီှ လၢတၢ်မ့ၢ်တၢ်တီလီၤ. ပိာ်မုၣ်အံၤ အတၢ်ကံးညာ်မၤဘၢ အမဲာ်ညါအံၤ မ့ၢ်ဝဲ ဒဲစီဆှံလၢ အဂီၢ်လီၤ. ပဝဲစ့ၢ်ကီး ပဃုန့ၢ်တၢ်ကံးညာ် ဘျးတဒၢ တကလုာ်ဂ့ၤတကလုာ်ဂ့ၤ သ့ဝဲလၢ အကကဲထီၣ်ဒဲစီဆှံလၢပဂီၢ် န့ၣ်လီၤ.
