ဧ့ၤ ၁၂း၁, တၢ်ဃ့ၢ်သြတီၤအိၣ်လၢ ပမဲာ်ညါန့ၣ် မ်ပဃ့ၢ်လၢ တၢ်သးစူၤတက့ၢ်.
တူၢ်ဒိၣ်ကီၤဒိၣ်အဖိတဂၤစးထီၣ်မၤလိတီၤခီၣ်ထံး ကၠိကိးဝဲလၢ ဟါရိၣ် (Harrow) ဒီးပှၤတူၢ်ဒိၣ်ကီၤဒိၣ်တဖၣ်အဖိ မၤလိတၢ်ဖဲအံၤ ၁၃ ဂၤ, ဒီးအဝဲအတၢ်ဒိးစဲးဖျဲလၢအမ့ၢ် ပှၤလၢအခံဒးကတၢၢ်, ပှၤ ၁၃ ဂၤတဂၤ လီၤ. လီၢ်ခံဖျိတီၤထီကၠိဝံၤ, လဲၤဝဲဆူ ခီလ့ၣ်ဝံၤ ဒီးနုာ်လီၤသုးတၢ်မၤဒီး လီၢ်ခံကဒီး တစဲးလူၤထံဂ့ၢ်ကီၢ်ဂ့ၢ် ဒီးလၢအတၢ်ကျဲးစၢး ဒီးအတၤလၣ် လီၤဆီဒၣ်ဝဲအဃိ, ကဲထီၣ်ဘၣ်နဲၣ်ရွဲၣ်ခိၣ်ကျၢၢ် ၂ ဘျီဒီး ဖဲတၢ်ဒုးသုးဖးဒိၣ် န့ၣ်အဝဲမ့ၢ် ပှၤအခီၣ်ထံးကတၢၢ် တဂၤလၢ ကီၢ်ြဘံးတ့ၣ် အကမျၢၢ် ဒီးပှၤဒီသိၣ်ဒီမှံၤ လၢအဒုးဟံးတလၢၣ် တဖၣ်ကွၢ်ထီၣ် တၢ်ဂံၢ်တၢ်ဘါဒီး တၢ်ဟံးစုနဲၣ်ကျဲ လၢအအိၣ်န့ၣ်လီၤ. လၢအပၢဆှၢတၢ်ဒုးဖးဒိၣ် ခံဘျီတဘျီ နၢၤဝဲအဃိ, နီၢ်ပၤမုၣ် အဲလံစဘဲး ဟ့ၣ်အီၤတၢ်လၤကပီၤဖးဒိၣ် “စၢၣ်” န့ၣ်လီၤ. ဟီၣ်ခိၣ်ဒီဘ့ၣ် ပာ်အီၤလၢ ပှၤအဒိၣ်ကတၢၢ် နီၢ်ဂံၢ်တၢန့ၣ်လီၤ.
တချုးအသံဒံးဘၣ်န့ၣ်, ဟါရိၣ် အပှၤပၢၤကၠိ ကွဲအီၤလၢအကလဲၤကတိၤသဆၣ်ထီၣ် ကၠိဖိအခံဒီး ကၠိခိၣ်အံၤ တဲအပှၤကၠိဖိဒ်အံၤ, လၢစှၤသီအတီၢ်ပူၤ ပနဲၣ်ရွဲၣ်ခိၣ်ကျၢၢ် (Prime Minister) ကဟဲဖဲအံၤလီၤ. အဝဲမ့ၢ် ပှၤလၢအကတိၤတၢ်အမံၤဟူကတၢၢ် (Orator) လၢဟီၣ်ခိၣ်ဒီဘ့ၣ် အတၢ်စံၣ်စိၤတဲစိၤ အပူၤလီၤ. ကနၣ် အတၢ်ကတိၤအံၤ ဂ့ၤဂ့ၤဒီး ကွဲးနီၣ်အီၤတက့ၢ်.
တုၤအဂဲၤထၢၣ်ကတိၤတၢ်ဒီးစံးဝဲ, “တူၢ်ဒိၣ်ကီၤဒိၣ်သးစၢ်သ့ၣ်ဧၢ, ခီၣ်ဃၣ် သုသး နီတဘျီတဂ့ၤ. နီတဘျီ, နီတဘျီ, နီတဘျီတဂ့ၤ.” ဒီးဆ့ၣ်နီၤဝဲလီၤ. အတၢ်ကတိၤဖုၣ်မးဒီး အသဟီၣ်ယိာ်မးဒီး ကအိၣ်တ့ၢ်ဝဲလၢ တၢ်စံၣ်စိၤတဲစိၤ အတၢ်ကွဲးနီၣ်အပူၤလၢ စိၤလၢအကဟဲတဖၣ် ကမၤနီၣ်ဝဲအဂီၢ်လီၤ.
