စံး ၁၄၃း၁, ယွၤဧၢ, ကနၣ်ယဘါထုကဖၣ်တၢ်, ဒိကနၣ်ယဃ့ကညးတၢ်တက့ၢ်. ဒ်နမၤတီနကလုၢ်အသိး, ဒ်နတီနလိၤအသိးန့ၣ်, စံးဆၢယၤ တက့ၢ်.
သရၣ်တဂၤစံၣ်တဲၤတဲလီၤတၢ်ဘၣ်ဃးတၢ်ပီၢ်ယၢ်လီၤက့ၤသးအဂ့ၢ်ဝံၤ, ဟ့ၣ်အခွဲးလၢပှၤလၢ အအဲၣ်ဒိး သ့ၣ်ညါအါထီၣ်ခရံာ် အဂီၢ် မ်အကပာ်ဖျါထီၣ်အသး လီၤ. ပိာ်ခွါသးစၢ်တဂၤ ဆၢထၢၣ် ဝဲတဘျီဃီ ဒီးစံးဝဲ, ဘါထုကဖၣ် တၢ်လၢယဂီၢ် တက့ၢ်. ယတၢ်ဒဲးဘး ဃၢဝဲ လၢယဂီၢ် တုၤယဝံ ယယိးအီၤ တန့ၢ်လၢၤ ဘၣ်န့ၣ်လီၤ. တၢ်ဘါဝံၤ ဒီးသရၣ် အိၣ်သကိးပှၤတဂၤအံၤ, ဃုသ့ၣ်ညါ ဝဲအဂ့ၢ်လၢ အကဘၣ်မၤစၢၤအီၤ ဒ်လဲၣ်န့ၣ်လီၤ. သ့ၣ်ညါ ဘၣ်ဝဲလၢ ပှၤအံၤ လူၤဖဲအသး မၤဖဲအသးလၢ ၈ နံၣ်အတီၢ်ပူၤလီၤ. အဝဲလဲၤဆူလဲၣ် ဆူလဲၣ်န့ၣ် တကွဲးတဲဘၣ် အမိၢ်အပၢ် နီတဘျီဘၣ်. အသးသိၣ်ဃီၣ်အီၤ တုၤအအိၣ်ဝဲတသ့လၢၤဘၣ် ဒီး ဘၣ်ဟဲပာ်ဖျါထီၣ်အသးလၢ သရၣ်တဂၤအံၤလီၤ.
သရၣ်ဘါထုကဖၣ်န့ၢ်အတၢ်, သိၣ်လိဒုးနၢ်ပၢၢ်အီၤလၢ အကပီၢ်ယၢ်လီၤက့ၤအသးနီၢ်နီၢ် ဒီးဟ့ၣ်ကူၣ်အီၤလၢ အကကွဲးတဲ ဘၣ်အမိၢ်အပၢ်လၢ အတၢ်ပီၢ်ယၢ်လီၤက့ၤအသးအဂ့ၢ်လီၤ. က့ၤကွဲးဝဲတနံၤဃီဒီး ဆှၢဝဲဆူအဟံၣ်, တဲဖျါဝဲလၢ အပီၢ်ယၢ်လီၤက့ၤအသးအဂ့ၢ် လၢအသးသိၣ်ဃီၣ်အီၤ တုၤအအိၣ်ဝဲတသ့လၢၤ ဘၣ်ဒီး ဃ့ကညးအမိၢ်အပၢ် လၢအကပျၢ် အတၢ်ကမၣ်လီၤ.
လီၢ်ခံစှၤသီ န့ၢ်ဘၣ် အမိၢ်အတၢ်ပရၢလၢ အကွဲးဝဲ, “ဖိခွါဧၢ, ယသးပူၤအံၤ ပှဲၤဝဲဒီးတၢ်သးခု လၢယန့ၢ်ဘၣ် တၢ်ပရၢအံၤဒီး တဘျီဃီ ပှဲၤဝဲဒီး တၢ်သးအုးလီၤ. နပၢ်လၢ အဘါထုကဖၣ် တၢ်လၢနဂီၢ်တဘိယူၢ်ဃီတဂၤ က့ၤဆူအဟံၣ်လၢမူခိၣ် လံ. ဒ်နကွဲးတဲဘၣ်ပှၤအသိး တၢ်ဆၢကတီၢ် လၢနပီၢ်ယၢ်လီၤနသးဒီး နပၢ်ပာ်တ့ၢ် ကွံာ်အဒဲဟီၣ်ခိၣ်န့ၣ် ကမ့ၢ်ဝဲ တကတီၢ်ဃီ န့ၣ်လီၤ. အတၢ်ထုကဖၣ် လၢနဂီၢ်မ့ၢ်ဝဲ, ကစၢ်ယွၤဧၢ, မၤပူၤဖျဲး က့ၤယဖိခွါ လၢအဟးဖျိး ကျဲတဂၤအံၤတက့ၢ်. သးကညီၤအီၤတက့ၢ်. အတၢ်ထုကဖၣ်အံၤ မ့ၢ်တၢ်တမံၤဃီ တုၤလၢအကလုၢ်တသီၣ် လၢၤဘၣ်ဒီး အသးကတၢၢ်ဝဲ န့ၣ်လီၤ. ယနၢ်ပၢၢ် လၢနသးလဲလိာ်က့ၤအသးအံၤ မ့ၢ်ဝဲ နပၢ်ဘါထုကဖၣ် တၢ်လၢနဂီၢ်သပှၢ်ပှၢ် ထီဘိအဃိန့ၣ်လီၤ.”
ဖိခွါအံၤ ဖးတၢ်ပရၢလၢ အမိၢ်ကွဲးဝဲအံၤ အိၣ်ဒီး မဲာ်ထံမဲာ်နိ ဒီးအသးပူၤပှဲၤဒီး တၢ်သးအုး, တၢ်သးခု, ဒီးတၢ်ပီၢ်ယၢ်လီၤသး နီၢ်နီၢ် န့ၣ်လီၤ.
