ဖံ ၄း၁၉, ကယဲၢ်တၢ်လၢသုန့ၢ်ဘၣ်အီၤ အလီၢ်အိၣ်တဖၣ်ဒ် အလၤကပီၤဒီး အတၢ်ထူးတၢ်တီၤအသိး ယကစၢ်ကဟ့ၣ်လီၤသုလၢ ယ့ၣ်ရှူးခရံာ်အပူၤလီၤ.
ယွၤတအၢၣ်လီၤပှၤလၢ အကဟ့ၣ်ပှၤ တၢ်လၢ ပသးလီအီၤ တဖၣ်ခဲလၢာ် ဘၣ်. ဘၣ်ဆၣ် အၢၣ်လီၤဝဲလၢ အကဟ့ၣ်ပှၤတၢ်လၢ ပလိၣ်ဘၣ်အလီၢ်အိၣ် တဖၣ်ခဲလၢာ်လီၤ.
မုၣ်ကမဲလၢအမ့ၢ်ခရံာ်ဖိ တဂၤအ၀ၤသံ ပာ်လီၤတဲာ်အီၤ အဖိတဘျုးဂၤလၢ အကဘၣ်လုၢ်ဒိၣ်ထီၣ်ဝဲလီၤ. အတၢ်တအိၣ်တယၢၤဘၣ်. တံၤသကိး လၢအကကွၢ်ထီၣ်တၢ်မၤစၢၤလၢအီၤ တအိၣ်အါဂၤဘၣ်. တနံၤတခီၣ် လၢတၢ်ဂိၢ်ကတီၢ်အဖိခွါ အကျါတဂၤ ဟဲက့ၤတဲအီၤ, မိဧၢ, ဘၣ်မနုၤ လၢယခိၣ်ဖျီၣ် အလၢၤတအိၣ်ဒ် ယသကိး ဖိတဖၣ်အသိးန့ၣ်လဲၣ်. အမိၢ်အတိၢ် တအိၣ်လၢအကပှ့ၤ န့ၢ်အီၤဘၣ်. ဘၣ်ဆၣ် စံးဆၢက့ၤအဖိ သ့သ့ဘၣ်ဘၣ်ဒ်သိး အဖိအသးသု တဟးဂီၤတဂ့ၤန့ၣ်လီၤ. အဖိခွါဟးထီၣ်ဒီး လဲၤလိာ်ကွဲလီၤ. မိၢ်တခီ အိၣ်ဒီး မဲာ်ထံမဲာ်နိ, က့ၤနုာ်ဆူ အဒၢးဖိအပူၤဒီး တီၤလီၤဃ့တၢ်လၢ ယွၤလၢသးဒီဖျၢၣ်ညါ လၢယွၤကဟ့ၣ်အီၤ တၢ်လၢ အလိၣ်ဝဲန့ၣ်လီၤ. ထဲန့ၣ်ဒီး အဝဲဒိးန့ၢ်ဘၣ် တၢ်သးမုာ်သးမံ လၢတၢ်ဆိၣ်ဂ့ၤကအိၣ် လၢအဂီၢ် န့ၣ်လီၤ.
လၢမုၢ်ဃ့ၢ်လီၤ တစဲးန့ၣ် အသကိးမုၣ်တဂၤ ဟဲအိၣ်သကိးအီၤကတိၤတၢ်ဒီး အီၤတတီၤဝံၤတဲဝဲ, တံၤသကိးဧၢ, ယဖိခွါသံလၢ အပူၤကွံာ်တနံၣ် တဂၤ ယကွၢ်ကျဲၤက့ၤ တၢ်လၢအပာ်လီၤတဲာ်ဝဲအကျါ ယထံၣ်ဘၣ်အခိၣ်ဖျီၣ်လၢၤတဖျၢၣ် လၢယပာ်လီၤဆီလၢ အကမ့ၢ် ဝဲယတၢ်သ့ၣ်နီၣ်အီၤ န့ၣ်လီၤ. ယပှ့ၤန့ၢ်အီၤ တချုး ဖဲအသံဒံးဘၣ်ဒီး ဖျီၣ်ဘၣ်ဝဲထဲ ခံဘျီသၢဘျီ ဒံးလီၤ. ယွၤထိးဘၣ်ယသးလၢ ယကဟ့ၣ်နဖိခွါလီၤ. မ့ၢ်နသး ကအိၣ်တူၢ်လိာ်အီၤကီးဧါ. မုၣ်ကမဲအံၤ တဲဘၣ်အသကိးန့ၣ်လၢအဘါထုကဖၣ်တၢ်လၢ အဖိခွါကန့ၢ်ဘၣ် ခိၣ်ဖျီၣ်တဖျၢၣ် ဒီးနၢ်ပၢၢ်ဝဲလၢ အမ့ၢ်ယွၤစံးဆၢ အတၢ်ထုကဖၣ်န့ၣ်လီၤ. သံကွၢ်လိာ်အသးဒီး သ့ၣ်ညါဝဲလၢ တၢ်ထုကဖၣ် ဒီးတၢ်တၢ်ထိးဘၣ် ပိာ်မုၣ်တဂၤန့ၣ် အသးမ့ၢ် တၢ်ဆၢကတီၢ် တကတီၢ် ဃီလီၤ. ယွၤမ့ၢ်ဝဲ ပှၤထူးပှၤတီၤလၢ ကဟ့ၣ်ပှၤ တၢ်လၢပလိၣ်ဘၣ် နီၢ်နီၢ်န့ၣ်လီၤ.
