ကတိၤ ၁၉း၁၉ ပှၤလၢအသးထီၣ်ဆူၣ်န့ၣ် ကဘၣ်တၢ်နးတၢ်ဖှီၣ်လီၤ.
ပှၤလၢအသးထီၣ်ဆူၣ် သးကဲၤထီၣ်အိၣ်ဒီး တၢ်ပာ်သး ခူသူၣ်လၢ အကမၤကၣ်က့ၤ တၢ်န့ၣ် ကဒိးဘၣ် တၢ်စံၣ်ညီၣ်လီၤ. ပှၤမုၣ်ပှၢ်အိၣ်ဝဲတဂၤလၢ အလိၤသး, ြပုထီၣ်, ဒီးအဘ့ၣ်ကဖိကီၤကုၢ်ထီၣ်, အါထီၣ်, လဲၢ်ထီၣ် ဝဲတုၤလၢအကိာ်ဒီး အမဲာ်သၣ်လီၤ. ဟးလၢပှၤကျါ တဘူၣ်ဘၣ်. ဒီးအတၢ်သးအ့န့ ဒိၣ်ထီၣ်ဝဲလီၤ. ဖှူကွၢ်ဝဲ လၢကသံၣ်အကလုာ်ကလုာ်, အီကသံၣ်အကလုာ်ကလုာ် သနာ်က့ တလီၤမၢ်ဘၣ်အမဲာ်ညါ နးထီၣ်ဒါတခီ လီၤ. လဲၤဆူ ကသံၣ်သရၣ်တဂၤ အအိၣ်ဒီး ကသံၣ်သရၣ်မၤကွၢ်အီၤ, ဒီးတထံၣ် တသ့ၣ်ညါ တၢ်ဆါ အခီၣ်ထံးခီၣ်ဘိဘၣ်အဃိ, ယါဘျါ ဝဲတန့ၢ်ဘၣ်. ပှၤမုၣ်ပှၢ် န့ၣ် အသးဘၣ်ဖှီၣ်, အသးအ့န့ ဒိၣ်ထီၣ် တုၤဒၣ်လဲာ် အိၣ်ဝဲတသ့နီတတီၤ လၢၤဘၣ်ဒီး လဲၤကဒီးဆူ ကသံၣ်သရၣ် အအိၣ်လီၤ.
တဘျီအံၤ အသးတမုာ်ဒိၣ်ထီၣ်, အသးအ့န့ ဒိၣ်ထီၣ် ဒီးကတိၤတၢ်ဒီး ကသံၣ်သရၣ် န့ၣ်အတၢ်ကတိၤထီၣ်ဖျဲးဝဲ, တၢ်မိၣ်မၤသံ ယသးပှၤပိာ်မုၣ်လၢ အဟံၣ် အိၣ်ဘူးဒီး ယၤတဂၤန့ၣ်လီၤ. အဝဲမၤဆါယသးဒိၣ်မး လီၤ. ဖဲအကတိၤတၢ် အခါ, တၢၤပံၣ်ဃာ်အစုညါသး, အမဲာ်ထီၣ်ဂီၤ, ဒီးကနိးဝဲ ဒီဂၤညါလီၤ. ထဲန့ၣ်တဘျီ ကသံၣ်သရၣ် တဲအီၤ, ယဆိကမိၣ်လၢ ယသ့ၣ်ညါ နတၢ်ဆါအံၤ ကဲထီၣ်အသးအဂ့ၢ်လံ. မ့ၢ်လၢတၢ်သးထီၣ်, တၢ်သးအ့န့ အိၣ်ဝဲလၢ နပူၤအဃိလီၤ. က့ၤဒီးကျဲၤဘၣ်လိာ်က့ၤ နသးဒီးအီၤ ဒ်သိး နကန့ၢ်ဘၣ် တၢ်သးမံသးမုာ် အဂီၢ်တက့ၢ်. မုၣ်ပှၢ်န့ၣ် တအဲၣ်ဒိး မၤဝဲဒ် ကသံၣ်သရၣ် ဟ့ၣ်ကူၣ်အီၤအသိးသနာ်က့, အဝဲလဲၤဆူ အသကိးန့ၣ်အအိၣ်, ဒီးကျဲၤဃူကျဲၤဖိးလိာ်က့ၤ အသးဒီး အသးမံ သးမုာ်က့ၤဝဲ ခံဂၤလၢာ်န့ၣ်လီၤ. အန့ၣ်ဒီး အတၢ်ဆါ ကဆှီထီၣ်က့ၤ, ဒီးလဲၤတဲဘၣ်က့ၤကသံၣ်သရၣ် ဒီးအတၢ်ဆါလီၤမၢ်ကွံာ်ဝဲ ကဆှၣ်ဒၣ်လီၤ. တၢ်စံၣ်ညီၣ် လၢအဂီၢ်ကတၢၢ်ဝဲလီၤ.
