လၢလံာ်စီဆှံလီၢ်လံၤတကြတူၢ်အပူၤ ကစၢ်ယွၤစံးဝဲ, “သ့ၣ်နီၣ်ထီၣ်မုၢ်အိၣ်ဘှံးအနံၤ လၢနကပာ် စီဆှံအီၤ အဂ့ၢ်န့ၣ်တက့ၢ်. နကမၤဘၣ်တၢ်ဃုနံၤ, ဒီးမၤနတၢ်မၤခဲလၢာ် လီၤ. မ့မ့ၢ် မုၢ်နွံနံၤတနံၤ န့ၣ် မ့ၢ်ယွၤ နကစၢ်အတၢ် အိၣ်ဘှံးအနံၤလီၤ. နဲဒၣ်ဂ့ၤ, နဖိခွါဂ့ၤ, နဆၣ်ဖိကီၢ်ဖိအဒၢဂ့ၤ, ပှၤတခီဘီမုၢ်ဖိလၢ အအိၣ်လၢ နပဲြတီအပူၤဂ့ၤ, သုတမၤ တၢ်မၤနီတမံၤ တဂ့ၤ,” (၂ မိၤ ၂၀း၈ တုၤ ၁၀). ပှၤယူဒၤဖိတဖၣ် အိၣ်ဒီး ထူသနူ လၢကဘၣ်အိၣ်ဖှိၣ်တပူၤဃီလၢ မုၢ်အိၣ်ဘှံးနံၤ, လၢအမ့ၢ် မုၢ်နွံနံၤတနံၤ (Saturday), ကဘၣ်ပာ်တ့ၢ်တၢ်ဖံးတၢ်မၤ, ဒီး ဘူၣ်ထီၣ်ဘါထီၣ် ကစၢ်ယွၤ န့ၣ်လီၤ. ကစၢ်ခရံာ် လဲၤဆူ ဘူၣ်ဘျီၣ်ပူၤလၢ မုၢ်နွံနံၤ တနံၤ (Saturday) လၢကသိၣ်က့ၤသီက့ၤတၢ် အဂီၢ်, (မးသဲ ၁၂း၉, ယိၤဟၣ် ၁၈း၂၀), ဒီး စီၤပီလူးစ့ၢ်ကီး မၤဝဲဒ်န့ၣ်အသိး လီၤ (မၤတၢ် ၁၇း၂, ၁၈း၄). လံာ်စီဆှံအလီၢ်လံၤ တကြတူၢ် အပူၤစံးဘၣ်ပှၤလၢ ပကဘၣ်ပာ်ဒိၣ် မုၢ်နွံနံၤ တနံၤ, ဒီးလၢ လံာ်စီဆှံ အသီတကြတူၢ်အပူၤစ့ၢ်ကီး ပထံၣ်ဘၣ်လၢ ပှၤယူဒၤဖိတဖၣ်, ကစၢ်ခရံာ်အနီၢ်ကစၢ်ဒၣ်ဝဲ, ဒီး ပှၤတၢ်မၢဖိတဖၣ် မၤစ့ၢ်ကီးတၢ်တမံၤဃီအဃိ, တၢ်သံကွၢ်အိၣ်ထီၣ်ဝဲ, ဘၣ်မနုၤအဃိ ပဘၣ်ဘါယွၤလၢ မုၢ်ခီၣ်ထံးနံၤ (Sunday) လဲၣ်.
အဆိကတၢၢ်, တၢ်သိၣ်တၢ်သီအထံၣ် ၁၀ လၢ အအိၣ်လၢ လံာ် ၂ မိၤရှ့ ၂၀း၁ တုၤ ၁၇ အပူၤ, ထဲဒၣ်ခွံထံၣ် န့ၣ် ဘၣ်တၢ်က့ၤမၤသီထီၣ်က့ၤအီၤလၢ လံာ်စီဆှံအသီ တကြတူၢ်အပူၤ န့ၣ်လီၤ ( ဃုထံၣ်န့ၣ်လၢ မးသဲ ၁၉း၁၈ အပူၤ ဘၣ်ဃး, တၢ်မၤသံတၢ်, တၢ်မၤကမၣ်မုၣ်ကမၣ်ခွါ, တၢ်ဟုၣ်တၢ်, တၢ်အုၣ်သးကဘျံးကဘျၣ်, တၢ်ပာ်ကဲမိၢ်ပၢ်, ဒီး တၢ်ဘူၣ်ထီၣ်ဘါထီၣ်ယွၤထဲတဂၤ, ဒီး ရိမ့ၤ ၁၃း၉ တဲပှၤဘၣ်ဃး တၢ်သးကွံပှၤဂၤအတၢ်န့ၣ်လီၤ. တၢ်ဘူၣ်ထီၣ်ဘါထီၣ်ယွၤထဲတဂၤ ဆၢထၢၣ်လၢ တၢ်သိၣ်တၢ်သီအခီၣ်ထံး သၢထံၣ်အဂီၢ်လံ). တၢ်သိၣ်တၢ်သီထဲတထံၣ်လၢ တၢ်တမၤသီထီၣ်က့ၤ အီၤန့ၣ် မ့ၢ် မုၢ်အိၣ်ဘှံးနံၤ န့ၣ်လီၤ. ကစၢ်ခရံာ်အနီၢ်ကစၢ် စံးဝဲလၢ အမ့ၢ် မုၢ်အိၣ်ဘှံးအနံၤအကစၢ်လီၤ (မးသဲ ၁၂း၈).
ကစၢ်ယွၤတ့လီၤပာ်လီၤ တၢ်ဝံၤခဲလၢာ် ဝံၤ အိၣ်ဘှံးက့ၤလၢ မုၢ်နွံနံၤတနံၤ န့ၣ်လီၤ. ဘၣ်ဆၣ် ကစၢ်ယွၤအိၣ်ဒီး တၢ်စိတၢ်ကမီၤခဲလၢာ်အဃိ, အဝဲလီၤဘှံးတသ့ဘၣ်. တလိၣ်လၢ အဝဲကအိၣ်ဘှံးဘၣ်. အဃိ တၢ်သံကွၢ်အိၣ်ထီၣ်ဝဲ, ဘၣ်မနုၤအဃိ လံာ်စီဆှံစံးလၢ ကစၢ်ယွၤ အိၣ်ဘှံးလဲၣ်. တၢ်စံးဆၢန့ၣ် မ့ၢ်ဒၣ်တၢ်ယိယိဖိလီၤ. မၢ်ကူး ၂း၂၇ စံးဝဲ, “တၢ်လၢမုၢ်အိၣ်ဘှံးအနံၤန့ၣ်, ကဲထီၣ်ဝဲလၢ ပှၤကညီအဂီၢ်လီၤ. တမ့ၢ်ဘၣ် ပှၤကညီလၢ မုၢ်အိၣ်ဘှံးအနံၤ အဂီၢ်ဘၣ်.” အခီပညီန့ၣ်, ကစၢ်ယွၤတ့လီၤ မုၢ်အိၣ်ဘှံးနံၤလၢ အပှၤဂီၢ်မုၢ်ကအိၣ်ဘှံးအဂီၢ်, တမ့ၢ်လၢ ကစၢ်ယွၤလိၣ်ဘၣ် တၢ်အိၣ်ဘှံးအဃိဘၣ်, မ့ၢ်လၢ ပဝဲသ့ၣ်တဖၣ် ပမ့ၢ်ပှၤဟီၣ်ခိၣ်ဖိ ပလီၤဘှံးသ့, အဃိ ပလိၣ်ဘၣ်တၢ်ဆၢ ကတီၢ်လၢ ပကအိၣ်ဘှံးအဂီၢ်, တၢ်ဆၢကတီၢ်လၢ ပကကွၢ်တၢ်ဆူယွၤ အအိၣ်န့ၣ်လီၤ. လၢတၢ်အံၤအဃိ, ပသးဒီး ပနီၢ်ခိ ခံမံၤလၢာ် ဘၣ်တၢ်မၤသီထီၣ်က့ၤအီၤ န့ၣ်လီၤ.
လံာ်စီဆှံအလီၢ်လံၤတကြတူၢ်အတၢ်သိၣ်တၢ်သီ စံးဝဲလၢ တၢ်ပာ်ဒိၣ် မုၢ်အိၣ်ဘှံးနံၤ န့ၣ်မ့ၢ် တၢ်လုၣ်ထီၣ်ပာ်ထီၣ်တၢ် အကျါတခါ လၢကမၤလၢပှဲၤ ကစၢ်ယွၤ အတၢ်လိၣ်ဘၣ် လၢအမ့ၢ် တၢ်သကဲာ်ပဝး, တၢ်ပၢတၢ်ဆှၢ, ဒီး တၢ်ပျၢ်တၢ်ဒဲးဘး န့ၣ်လီၤ. ပမ့ၢ်ကွၢ်လၢ ကျဲအဝဲန့ၣ်န့ၣ်, တၢ်ပာ်ဒိၣ်မုၢ်အိၣ်ဘှံးနံၤန့ၣ် မ့ၢ်ဝဲဒၣ် တၢ်သိၣ်တၢ်သီအကျါတခါ န့ၣ်လီၤ. ဒ်သိးပကအိၣ်လၢ ကစၢ်ယွၤ အတၢ်ဘၣ်အသးအဖီလာ်န့ၣ်, ပကဘၣ်ပာ်ဒိၣ် မုၢ်အိၣ်ဘှံးနံၤန့ၣ်လီၤ. ပှၤတဂၤလၢ်လၢ် မ့ၢ်တပာ်ဒိၣ် မုၢ်အိၣ်ဘှံးနံၤဘၣ်န့ၣ်, ပှၤအဝဲန့ၣ် အိၣ်လၢတၢ်ဒဲးဘးအပူၤ ဒီးကဘၣ်တၢ်စံၣ်ညီၣ်အီၤ န့ၣ်လီၤ (ယဃ့းစက့လး ၁၈း၄, ရိမ့ၤ ၆း၂၃, ၅ မိၤ ၁၃း၁ တုၤ ၉, ၄ မိၤ ၃၅း၃၁, ၃ မိၤ ၂၀း၂).
ဘၣ်ဆၣ်မ့ၢ်လၢ ကစၢ်ခရံာ် အတၢ်သံဒီး အတၢ်ဂဲၤထၢၣ်သမူထီၣ်က့ၤအဃိ တလိၣ်လၢ ပကဘၣ် အိၣ်လၢ စီၤမိၤရှ့အတၢ်သိၣ်တၢ်သီတဖၣ် အဖီလာ် လၢၤဘၣ်. ပတအိၣ်လၢ တၢ်သိၣ်တၢ်သီ အဖီလာ်ဘၣ်, ပအိၣ်လၢ တၢ်ဘျုးတၢ်ဖှိၣ်အဖီလာ် လီၤ (ရိမ့ၤ ၆း၁၄, ၁၅). မုၢ်အိၣ်ဘှံးနံၤန့ၣ် ဘၣ်တၢ်မၤလၢပှဲၤအီၤလၢ ခရံာ်အပူၤန့ၣ်လီၤ. ကစၢ်ခရံာ်မ့ၢ်ပတၢ်အိၣ်ဘှံးအလီၢ် န့ၣ်လီၤ. အဝဲအံၤ တမ့ၢ်တၢ်မၢလီၤလၢ ပကဘၣ်ပာ်ဒိၣ် မုၢ်အိၣ်ဘှံးနံၤဘၣ်. ပမ့ၢ်ဘၣ်ပာ်ဒိၣ် မုၢ်အိၣ်ဘှံးနံၤတခီ ပကအိၣ်ဒံးဒၣ်လၢ တၢ်သိၣ်တၢ်သီအဖီလာ်န့ၣ်လီၤ. ဘၣ်ဆၣ် ပတအိၣ်လၢတၢ်သိၣ်တၢ်သီအဖီလာ်ဘၣ်.
တၢ်မၤအသးဘၣ်ဃးမုၢ်နံၤမုၢ်သီအတၢ်ဆီတလဲဒ်လံာ်စီဆှံ အသီတကြတူၢ်တဲဝဲအသိး
လံာ်စီဆှံအသီတကြတူၢ်အိၣ်ဒီး တၢ်မၤအသးလီၤတံၢ်လီၤဆဲး ဘၣ်ဃး တလိၣ် တၢ်လူၤပိာ်ထွဲ မုၢ်နွံနံၤ အတၢ်သိၣ်တၢ်သီဘၣ် န့ၣ်လီၤ.
- ရိမ့ၤ ၁၄း၅,၆ “ပှၤတဂၤစံၣ်ညီၣ်ဝဲလၢ မုၢ်တနံၤန့ၣ်, ဂ့ၤန့ၢ်မုၢ်နံၤ အဂၤတဖၣ် တက့ၢ်လီၤ. ဒီး ပှၤတဂၤ စံၣ်ညီၣ်ဝဲလၢ ကိးမုၢ်နံၤ ဂ့ၤဒ်သိးသိးလီၤ. မ်ပှၤနာ်ဝဲလၢလၢပှဲၤပှဲၤ လၢအသးဒၣ်ဝဲ ကိးအဂၤဒဲး တက့ၢ်. ပှၤလၢ အတိၢ် မုၢ်တနံၤန့ၣ်, တိၢ်ဝဲလၢ ယွၤအဃိ, ဒီး ပှၤလၢအတတိၢ်ဘၣ် မုၢ်တနံၤန့ၣ်, တတိၢ်ဘၣ်ဝဲ, မ့ၢ်လၢယွၤ အဃိလီၤ. ဒီးပှၤလၢ အအီၣ်တၢ်န့ၣ်, အီၣ်တၢ်လၢ ယွၤအဃိလီၤ. အဂ့ၢ်ဒ်အံၤ, မ့ၢ်အစံးထီၣ်ပြတၢၤ ယွၤအဘျုးအဖှိၣ် လီၤ. ဒီး ပှၤလၢအတအီၣ်ဘၣ် တၢ်န့ၣ်, တအီၣ်ဘၣ်ဝဲ, မ့ၢ်လၢယွၤအဃိ, ဒီးစံးထီၣ်ပြတၢၤ ယွၤအဘျုးအဖှိၣ်လီၤ.”
- ကလီးစဲ ၂း၁၆, ၁၇ “မၤသးဒ်န့ၣ်ဒီး လၢတၢ်အီၣ်မ့ၢ်ဂ့ၤ, တၢ်အီမ့ၢ်ဂ့ၤ, တၢ်မၤဘူၣ်အနံၤမ့ၢ်ဂ့ၤ, လါထီၣ်သီ အနံၤမ့ၢ်ဂ့ၤ, အိၣ်ဘှံးအနံၤ မ့ၢ်ဂ့ၤအဃိ, မ်ပှၤသု တစံၣ်ညီၣ် သုလၢ အဂ့ၢ်အကျိၤ နီတဂၤတဂ့ၤ. တၢ်န့ၣ်တဖၣ် မ့ၢ်တၢ်ဆူညါ တဖၣ်အကဒုလီၤ. မ့မ့ၢ် အမိၢ်ပှၢ် န့ၣ်မ့ၢ်ခရံာ်လီၤ.”
- မၤတၢ် ၂၀း၇ “ဒီးနွံနံၤအကျါ မုၢ်ခီၣ်ထံးန့ၣ်, ပအိၣ်ဖှိၣ် ဒ်သိး ကစိၢ်ဘျဲးကိၣ်, ဒီးစီၤပီလူး သါကဟးထီၣ် လၢမုၢ်ဆ့ၣ်ထီၣ် တနံၤသတးဒီး, စံၣ်တဲၤတဲလီၤတၢ်တုၤ ဖးဖီမုၢ်လီၤ.”
- ၁ ကရံၣ်သူး ၁၆း၁,၂ “ဒီးလၢ တၢ်ထၢဖှိၣ်လၢ ပှၤစီဆှံတဖၣ်အဂီၢ် အဂ့ၢ်န့ၣ်, ဒ်ယမၤလိာ် တၢ်အိၣ်ဖှိၣ် တဖၣ် အိၣ်ဝဲလၢ ကလၤတံ အသိးန့ၣ် ,မၤသုဝဲ ဒ်န့ၣ်သိး တက့ၢ်. ဒီးတုၤယဟဲ, ဒ်သိး တၢ်ထၢဖှိၣ် အလီၢ်သုတအိၣ် တဂ့ၤဒီး, နွံနံၤအကျါ, မုၢ်ခီၣ်ထံးအနံၤ, မ်ပှၤပာ်ဖှိၣ် ပာ်တၢ်, လၢတၢ်ပာ်ဖှိၣ်အလီၢ်, ဖဲအဒိးန့ၢ် ဘၣ်တၢ်ဘျုးတၢ်ဖှိၣ်အသိး, ကိးဂၤဒဲးတက့ၢ်.”
- တၢ်လီၣ်ဖျါ ၁း၁၀, ၁၁ “ယအိၣ်လၢ သးအပူၤလၢ ကစၢ်အမုၢ်တနံၤ, ဒီးယနၢ်ဟူတၢ်ကလုၢ် သီၣ်ဖးဒိၣ်လၢ ယချၢဃံဒ် ကွဲၤသီၣ်အသိး, ဒီးစံးဝဲဒၣ်, တၢ်လၢနထံၣ်, ကွဲးလၢလံာ်ပူၤ, ဒီးဟ့ၣ်ယုၢ်ဆူ တၢ်အိၣ်ဖှိၣ် နွံပူၤ, ဆူအ့းဖ့းစူး, ဒီးစမူရနၤ, ဒီး ပ့ၢ်ကမူး, ဒီးသူၤအတံရၤ, ဒီးစၢ်ဒံ, ဒီးဖံၤလဒ့းလဖံ, ဒီးလီၤဒံၤကံ တက့ၢ်.”
ယနာ်လၢ တၢ်မၤအသးတဖၣ်အံၤ ကလၢပှဲၤဝဲလၢနဂီၢ်, ဘၣ်ဃး လံာ်စီဆှံတတဲပှၤလၢ ပကဘၣ်ဘါယွၤလၢ မုၢ်နွံနံၤတနံၤ (Saturday) ဘၣ်န့ၣ်လီၤ. တမံၤဂ့ၤတမံၤဂ့ၤ, ပအိၣ်ဒီးတၢ်သဘျ့ (ရိမ့ၤ ၁၄း၁ တုၤ ၁၂) လၢပကဃုထၢ မုၢ်နံၤမုၢ်သီလၢ ပကဘါယွၤအဂီၢ်န့ၣ်လီၤ. ဒီး တလိၣ်လၢ ပှၤကဘၣ် စံၣ်ညီၣ်ပှၤ ဘၣ်ဃး မုၢ်နံၤမုၢ်သီလၢ ပပာ်ဒိၣ်အီၤအံၤန့ၣ်ဘၣ်. ပသဘျ့လၢခရံာ်အပူၤ, ဒီး ပတအိၣ်လၢတၢ်သိၣ်တၢ်သီအဖီလာ် ဘၣ် (ရိမ့ၤ ၆း၁၄).
