ယိၤ ၅း၁၇, ယ့ၣ်ရှူးစံးဆၢအီၤ, ယပၢ်မၤတၢ်တုၤခဲကနံၣ်အံၤ ဒီးယမၤစ့ၢ်ကီးယဲဒၣ်လီၤ.
ပိာ်ခွါဖိ ကၠီး မ့ၢ်ဖိၣ်ဃဲတဂၤလၢ တၢ်ကွၢ်ဒိၣ်ထီၣ်အီၤလၢ ဖိၣ်ဃဲကၠိလီၤ. အဝဲမၤလိလံာ် တဘၣ်ဘၣ်. မ့ၢ်စ့ၢ်ကီး ပှၤလၢအကၢၣ်ဒိၣ်မးတဂၤလီၤ. အဝဲအသးအိၣ် ၁၉ နံၣ်လံ. ဘၣ်ဆၣ် ကဘၣ်အိၣ်မူ ဝဲဒ်လဲၣ်, ဘၣ်မၤ တၢ်မၤမနုၤလဲၣ် တသ့ၣ်ညါဝဲဘၣ်. အဝဲထံၣ် တၢ်ပရၢဖိအက့တက့လၢ တၢ်ကတိၤ လၢလာ်တဖၣ်အံၤ အိၣ်ကွဲးလီၤအသးလီၤ. “မၤနတၢ်မၤ ထီၣ်ထူၣ်ဘျၢဘျၢ, အဲၣ်လီၤနသးတဂ့ၤ, အိၣ်ဒီးတၢ်နၢ်ပၢၢ်တက့ၢ်. ဒီးမၤကမၣ် တၢ်တဂ့ၤ.” တၢ်ကတိၤလွံၢ်ထံၣ်အံၤ မ့ၢ်ဝဲ ပှၤပၢၤဖၠၣ်စိမိၤ ဖးဒိၣ်တဂၤ အတၢ်ကတိၤသဆၣ်ထီၣ် ပှၤခီလ့ၣ် ကၠိဖိအခံလီၤ. တၢ်ထိးဘၣ်အသးဒီး လဲၤဝဲဒၣ်ဆူသရၣ် ဖးဒိၣ်တဂၤအံၤ အအိၣ်န့ၣ်လီၤ. အဝဲတဲလီၤ အဂ့ၢ်ဒီး သရၣ်အံၤ ဒုးနၢ်ပၢၢ်အီၤလၢ တၢ်ကတိၤ တဖျၢၣ် ဘၣ်တဖျၢၣ် အခီပညီလီၤ. ကၠီးနၢ်ပၢၢ်အါထီၣ်ဝဲ ဒီးအသးဆူၣ် ဒိၣ်ထီၣ်ဝဲလီၤ. ဘၣ်ဆၣ် သရၣ်ဟ့ၣ်အီၤတၢ်မၤ တန့ၢ်ဘၣ်ဒီး အဝဲစ့ၢ်ကီး အစ့လၢာ် ဃၣ်ဃၣ်လီၤ.
အဝဲဟးဃုတၢ်မၤဒီး ပှၤတဂၤတဲဘၣ်အီၤလၢ တၢ်မၤအိၣ်တခါလီၤ. ဘၣ်ဆၣ် တၢ်မၤန့ၣ် ကီဒိၣ်မး လီၤ. တၢ်လီၢ်န့ၣ် အိၣ်လၢ တၢးဖးဒိၣ် တဖျၢၣ်အခံဒး, တၢ်ခံးယုၢ်ကလာ်, တၢ်ဘၣ်အၢဘၣ်သီ, တၢ်နၢတမုာ် ဘၣ်လီၤ. အဝဲလဲၤဒုးနဲၣ် ကၠီးတၢ်မၤအံၤ ဒီးစံးဝဲ, “နမၤတၢ်အံၤ မ့ၢ်ဝံၤခဲလၢာ်, ဒီးယကဟ့ၣ်နၤအလဲထဲ ၃ ဒီလၣ်လီၤ.” ကၠီးစံးဝဲ ယကဘၣ်မၤလီၤ. ယစ့တအိၣ်လၢၤဘၣ်. ယကဘၣ်သူ ဆးပၠၣ်လၢ ယတၢ်မၤ ဘၣ်အၢအံၤ အပူၤလီၤ. ဒၢးဖိ အိၣ်ကလီ တဒၢးလီၤ. အဝဲမၤပျီ မၤကဆှီအီၤလၢညါကတၢၢ်, ဒီးထံၣ်န့ၢ်ဝဲ ကသ့ၣ်အယၣ် လီၢ်လံၤတဘ့ၣ်ဒီး ဒုးကဲဝဲလၢ အလီၢ်မံ ဃုာ်ဒီး နီၣ်ဃ့သံလီၤ. မၤတၢ်လၢာ် သးတအိၣ်ဘှံးဘၣ်. သၢနံၤ ပူၤကွံာ်ဝံၤ လဲၤကိး တၢ်မၤအကစၢ် လၢအကဟဲကွၢ် ဝဲန့ၣ်လီၤ. တၢ်မၤကစၢ်ထံၣ်ဘၣ်ဝဲလၢ တလါအါအါဂီၢ်ဂီၢ် အကလုာ်ကလုာ်န့ၣ်, လၢအဂ့ၤဒံးတဖၣ်ပာ်ဝဲတပူၤ, သူတသ့တဖၣ် ဒုးကဲထီၣ်ဝဲလၢ သ့ၣ်မုၢ်လီၤ. ပလီအါအါဂီၢ်ဂီၢ်တဖၣ် ပာ်လီၤဆီဝဲ အဒိၣ်ဒီးအဆံးဝံၤ သ့ကဆှီဝဲခဲလၢာ် လီၤ. ခွဲပျီထူးကဆှီ ဖုဒါခိၣ်, ထူးကဆှီတၢ်ဒူၣ်, ခွဲကွံာ် ကပီၤလုၤ ခဲလၢာ် တုၤလၢ တၢ်ဘၣ် အၢဘၣ်သီ တအိၣ်လၢၤဘၣ် လီၤ. တၢ်မၤ ကစၢ်အသးမံ လၢအတၢ်မၤအဃိ, ဟ့ၣ်အီၤတၢ်မၤ အဂၤတခါ လၢအဘူးအလဲ ဒိၣ်ထီၣ် တစဲးလီၤ. အဝဲမၤတၢ်ဆူၣ်ဆူၣ် အမဲာ်ညါ, မၤလိဘၣ်လံာ်ဂ့ၤဂ့ၤအဃိ, မၤလိဖျိဝဲ တီၤထီကၠိ လၢခံနံၣ် အတီၢ်ပူၤဝံၤ မၤလိဖျိ ကဒီးခီလ့ၣ်လၢ လွံၢ်နံၣ်အတီၢ်ပူၤ, ဒီးမၤလိဖျိ စ့ၢ်ကီး လံာ်စီဆှံကၠိ စ့ၤမ့ၤနရံ လၢ ၃ နံၣ်အတီၢ်ပူၤလီၤ. ဒီးဖဲအသးအိၣ် ၂၈ နံၣ်န့ၣ် အဝဲကဲထီၣ်ဘၣ် ခရံာ်အတၢ်မၢဖိ တဂၤလၢ အမံၤဟူသၣ်ဖျါ ဝဲန့ၣ်လီၤ.
