လူၤကၣ် ၂း၄၉, ဘၣ်မနုၤလၢ သုဃုယၤလဲၣ်. သုတသ့ၣ်ညါဘၣ်လၢ ယဘၣ်အိၣ်လၢ ယပၢ်အဟံၣ်ပူၤ ဘၣ်ဧါ.
ဖဲခရံာ်အိၣ်ဖျဲၣ်ဝံၤ အသီ ၄ဝန့ၣ်, အမိၢ် အပၢ်လဲၤဆှၢထီၣ်အီၤဆူ တၢ်လုၢ်ဟံၣ်လၢ ယရူၤရှလ့ၣ် ဒီး ဘူၣ်တၢ်ဘါတၢ်လၢ အဂီၢ်လီၤ. ဖဲအံၤ ပှၤအတီအလိၤဒီး ယူးယီၣ်ယွၤ အိၣ်ဝဲတဂၤမ့ၢ်ဝဲ စီၤစူးမ့ၣ်အိၣ် လီၤ. အဝဲဟံးထီၣ်ဖိသၣ် ယ့ၣ်ရှူး လၢအစုလိၤဒီး စံးဝဲ, ကစၢ်ဧၢ, ခဲအံၤ ပျၢ်နခ့နပှၤယၤအံၤ မုာ်မုာ် တက့ၢ်. အဂ့ၢ်ဒ်အံၤ ယမဲာ်ထံၣ်နတၢ်အုၣ်က့ၤခီၣ်က့ၤ လၢနကတဲာ်ကတီၤလၢ ပှၤဂီၢ်မုၢ် တဖၣ်ခဲလၢာ် အမဲာ်ညါလီၤ. ပှၤလၢအထံၣ်ဘၣ်ဖိသၣ်ဒီး သ့ၣ်ညါဝဲလၢ အမ့ၢ်ခရံာ်အိၣ်ဒံးအဂၤတဂၤ, မ့ၢ်ဝဲ ဝံနီၣ်အၣ်နၤ လီၤ. အဝဲစံးဘၣ် တဲဘၣ် အဂ့ၢ်လၢ ပှၤလၢအကွၢ်လၢ်တၢ် အုၣ်က့ၤခီၣ်က့ၤ အကျဲတဖၣ် လၢယရူၤရှလ့ၣ် အပူၤလီၤ. တၢ်ကတိၤသ့ၣ်တဖၣ် အံၤ စီၤယိၤသး ဒီးနီၢ်မၤရံ တဲဘၣ်ခရံာ်ဖဲ အဒိၣ်ထီၣ်ဝဲန့ၣ်လီၤ.
မၤကဒီး ဖဲအအိၣ် ၁၂ နံၣ်န့ၣ်, အမိၢ်အပၢ် လဲၤဘါတၢ်လၢ ယရူၤရှလ့ၣ် ဒီး ခရံာ်လဲၤဃုာ်ဒီး အဝဲသ့ၣ်လီၤ. ဘူၣ်တၢ် ဘါတၢ်ဝံၤ က့ၤကဒါက့ၤဝဲန့ၣ်, ခရံာ်တပိာ်အခံဘၣ်. ဒီးတသ့ၣ်ညါဝဲဘၣ်. တုၤအတထံၣ်လၢၤ ခရံာ်လၢ အသကိးဒီး လူၤဃုအီၤ ဒီး ထံၣ်ဘၣ်အီၤလၢ တၢ်လုၢ်ဟံၣ် လၢယရူၤရှလ့ၣ် အပူၤ, ကတိၤတၢ်ဒီး သရၣ်တဖၣ် န့ၣ်လီၤ. အမိၢ်စံးအီၤ နမၤပှၤဒ်အံၤ ဘၣ်မနုၤလဲၣ်. ပလူၤဃုလံနၤဒီး ပသူၣ်အုးသးအုးလီၤ. ခရံာ်စံးဆၢအီၤ, တၢ်ကတိၤလၢအဖီခိၣ် တဖၣ်လီၤ. ပာ်ဖျါထီၣ် ဝဲလၢ ဖဲအအိၣ်ဒံးဒၣ်တဆံခံနံၣ်န့ၣ်, အဝဲသ့ၣ်ညါ အမူအဒါ လၢကဘၣ်မၤယွၤအတၢ်မၤလၢ ယွၤအတၢ်လုၢ်ဟံၣ် ပူၤဒၣ်လဲာ်လီၤ. တုၤအကစးထီၣ်အတၢ်မၤနီၢ်နီၢ် ဒီး အဝဲဘၣ်ကတဲာ်ကတီၤအသးလၢ ကမၤန့ၢ် တၢ်ဂံၢ်တၢ်ဘါဒီး တၢ်စိတၢ်ကမီၤလၢ ယွၤအအိၣ်ဒီး ဘၣ်မၤန့ၢ်ဝဲထဲတဂၤဧိၤလၢ တၢ်ဘှ့ၣ်တၢ်ဘှီၣ်အလီၢ်လီၤ.
အလီၢ်အိၣ်ဝဲလၢ ပှၤဖိသၣ်ကိးဂၤဒဲး တၢ်ဆၢကတီၢ် တုၤဃီၤဝဲလၢ အကဘၣ်ကွၢ်ဆိကမိၣ် လၢယွၤဘၣ် အသးလၢ အကမၤ တၢ်မနုၤလဲၣ်န့ၣ်လီၤ. အဝဲကဘၣ် ဟံးန့ၢ်တၢ်ဆၢကတီၢ်ဒီး ယွၤထဲတဂၤဧိၤ ဒီးဘါထုကဖၣ် တၢ်န့ၣ်လီၤ. ကဘၣ်မၤန့ၢ်ယွၤ အတၢ်စံးဆၢ လၢယွၤအကလုၢ်ကထါ အပူၤ ထဲတဂၤဧိၤန့ၣ်လီၤ. အဝဲန့ၣ်မ့ၢ် တၢ်အမူအဒါလၢ အလီၤဘၣ်အီၤန့ၣ်လီၤ.
