စံး ၃၃း၁၈, ၁၉ ယွၤအမဲာ်အိၣ်လၢ ပှၤလၢအပျံၤအီၤ အလိၤ … ဒ်သိးအကမၤပူၤဖျဲးအသးလၢ တၢ်သံ.
သရၣ်တဂၤ တဲဝဲတဘျီ သါလဲၤဟးကသုၣ်လၢ ကီၢ်အမဲရကၤ အပီၣ်လဲၣ်ကၢၢ်ခိၣ်တတီၤဒီး သါထံၣ်ပှၤအါမး လုၢ်ထံတနီၤ, ပီၢ်ထံတနီၤ, ဒိးလပီအထီၣ်အလီၤတနီၤလီၤ. ဒီးဖဲန့ၣ် ပဒိၣ်ပာ်လီၤစ့ၢ်ကီး ပှၤလၢအကခိးပှၤသ့ၣ်တဖၣ် အံၤအသးသမူန့ၣ်လီၤ. လၢအကျါ တဂၤန့ၣ် အိၣ်ဝဲဒၣ်လၢ တၢ်လီၢ်ကစီၤထီၣ် တခါဒီး ကွၢ်လီၤပှၤတဖၣ်အံၤလၢ အမဲာ်ထံကလၤလၢ အကွၢ်တၢ်ဖျါဂ့ၤမးန့ၣ်လီၤ. လၢအကပၤန့ၣ် အိၣ်ဃုာ်ဒီး လီဒၢကတိၤတၢ်, ဒီးကဘီလၢအိၣ်ခိးပာ်စၢၤ တၢ်ဒီး ကတီၤပာ်အသးလၢ တၢ်မၤစၢၤ အဂီၢ်န့ၣ်လီၤ. တယံၤတဘူးဒီး အီၤန့ၣ်, ပှၤအိၣ်စ့ၢ်ကီး အဂၤတဂၤ, လၢအဆ့ၣ်နီၤကွၢ်တၢ်လိၤလိၤဆူ ပိာ်ခွါဖိ တဂၤလၢအ၀ၢ်ချံ ဖိတဘ့ၣ် ဘူးဒီးပီၣ်လဲၣ်ကၢၢ်ခိၣ်န့ၣ်လီၤ. ပီၣ်လဲၣ်ထံအသီၣ်ဒီး ပှၤကညီ အကလုၢ်သီၣ်အါမးသနာ်က့, အဝဲအသးစၢၢ်ဆၢ ဒၣ်လၢ ပိာ်ခွါ ဖိတဂၤန့ၣ် မ့ၢ်လၢအမ့ၢ်အဖိခွါအဃိန့ၣ်လီၤ.
သရၣ်အံၤစံးဝဲ, သါမၤန့ၢ်တၢ်မၤလိအံၤလီၤ. ပှၤခံဂၤလၢာ် အတၢ်မၤန့ၣ် လီၤပလိာ် လိာ်အသးဒီး ယွၤဒီး ပဝဲအဖိတဖၣ်န့ၣ်လီၤ. အဝဲကွၢ်လီၤပှၤခဲလၢာ် လၢတၢ်လီၢ်ထီၣ်ထီ, ဒီးထံၣ်ပှၤဖျါတဘျီဃီ ခဲလၢာ်လီၤ. တၢ်လၢပလိၣ်ဘၣ်သ့ၣ်တဖၣ် အဝဲသ့ၣ်ညါ ခဲလၢာ်ဒ်ပှၤကွဲးထါဖိ ပာ်ဖျါထီၣ်လၢ ပတၢ်မၤလိတနံၤအံၤန့ၣ်လီၤ. ယွၤအမဲာ်အိၣ်ဝဲလၢပလိၤဒ်သိး အကမၤပူၤဖျဲးပှၤလၢ တၢ်သံန့ၣ်လီၤ.
ယွၤသ့ၣ်ညါဝဲလၢ ပလိၣ်အတၢ်အံးထီၣ်ကွၢ်လီၤကိးဆၢကတီၢ်ဒဲး အဂ့ၢ်မ့ၢ်ဝဲ ပအိၣ်လၢ ဟီၣ်ခိၣ်တဖျၢၣ် လၢအပှဲၤဒီး တၢ်ဘၣ်ယိၣ်ဘၣ်ဘီ, တၢ်ဘၣ်ဒိဘၣ်ထံးဒီး တၢ်တတၢးတနါလၢ ပတထံၣ်စိအီၤတဖၣ်န့ၣ်အဃိလီၤ.
