မၢ်ကူး ၅း၁၉, က့ၤက့ၤဆူနဟံၣ်, ဆူနတံၤနသကိးဒီး ဖဲဒၣ်ကစၢ်မၤနၤဒီး သးကညီၤနၤန့ၣ်, စံးဘၣ်တဲဘၣ် အဝဲသ့ၣ်တက့ၢ်.
ခရံာ်ခီဂာ် တၢ်ဆူပှၤကဒါရၤဖိအကီၢ်, ဒီးပှၤလၢ တၢ်နါအိၣ်လၢ အလိၤလၢအစံးဝဲ သါမံၤမ့ၢ် လ့းကူၣ်န့ၣ် ဃ့ၢ်ဆူအအိၣ်, ဒ်သိးအသု တမၤနးမၤဖှီၣ် အီၤတဂ့ၤလီၤ. ခရံာ်ဟီထီၣ်ကွံာ် တၢ်နါန့ၣ် ဒီးတုၤအထီၣ် လၢကဘီပူၤဒီး ပှၤလၢ ခရံာ်ဟီထီၣ်ကွံာ် တၢ်နါလၢ အလိၤတဂၤန့ၣ် ဃ့ကညးခရံာ်လၢ အကအိၣ်ဒီး အီၤလီၤ. ဘၣ်ဆၣ် ခရံာ်တပျဲအီၤလၢ အကအိၣ်ဒီးအီၤဘၣ်. မ့မ့ၢ်မၢအက့ၤဒီး တဲဘၣ်ပှၤဂၤတဖၣ်လၢ တၢ်လၢ ခရံာ်မၤဘၣ်အီၤ အဂ့ၢ်န့ၣ်လီၤ.
ပှၤတဂၤအံၤ တၢ်နါအါဒုအိၣ်တ့ၢ်လံလၢ အလိၤဒီး ပှၤသ့ၣ်ညါ ဝဲလီၤ. ပှၤစၢဃာ် အီၤလၢလိပူၤ, ဒီးပှၤပျံၤအီၤ လီၤ. အမဲာ်ညါ တမ့ၢ်ပှၤလၢ အမၤလိဘၣ် လံာ်တဂၤဘၣ်အဃိ, မ့ၢ်ကတိၤတၢ်လၢ ခရံာ်အဂ့ၢ်, ပှၤကကနၣ်အီၤ ဒီးကဆိကမိၣ်လၢအတဲတၢ်မ့ၢ်တၢ်တီ စ့ၢ်ကီးဧါ. ဘၣ်ဆၣ်လံာ်စီဆှံ စံးဝဲလၢ အဝဲတဲဘၣ်ပှၤလၢ ဒ့းကးပလံၣ်တဖၣ် လၢခရံာ်ယါဘျါအီၤအဂ့ၢ်ဒီး ပှၤခဲလၢာ် ကမၢကမၣ်ဝဲလီၤ.
လၢအပူၤကွံာ်အနံၣ်တကယၤအဘျဲၣ်, သရၣ်မံၤဟူသၣ်ဖျါလၢ အဟီတရါဒီး ပှၤကဲထီၣ်ခရံာ်အပျဲၢ်အါဂၤ အိၣ်ဝဲတဂၤ အမံၤမ့ၢ်ဝဲ အဲလံးစဲဒၢၣ် မဲးကလရံ (Alexander Maclaren) လီၤ. တဘျီဖဲ အဟီတရါ လၢတၢ်ဘါလီၢ်ဝံၤန့ၣ်, အသးခုလၢ အထံၣ်ဘၣ် ပှၤလၢ အတနာ်ခရံာ် တဂၤ ဟဲက့ၤလီၤလၢ တၢ်ဘါဝံၤန့ၣ်လီၤ. သရၣ်အံၤ တဲဘၣ်အီၤလၢ ဆူမဲာ်ညါမုၢ်နံၤဒိၣ် တၢ်ဟီတရါ ၄ ဘျီ, အဝဲကဟီတရါဘၣ်ဃး ခရံာ်ဖိ အတၢ်နာ်အဂ့ၢ်ဒီး ကွဲအီၤလၢ အကဟဲကနၣ် ဝဲလီၤ. ပှၤတနာ်တၢ်တဂၤအံၤ, ဟဲကနၣ်တၢ် ၄ နွံလၢာ်ဒီး လၢအကတၢၢ် တဘျီန့ၣ် စံးဝဲသါနာ်လံခရံာ် န့ၣ်လီၤ. သရၣ်သံကွၢ်အီၤ, ယတၢ်ဟီတရါလၢ အလဲလိာ်နသး အဒိၣ်ကတၢၢ် မ့ၢ်ဖဲလဲၣ် တခါလဲၣ်. တဲဆၢဝဲ တၢ်ဟီတရါ မၤစၢၤတၢ် ခဲလၢာ်လီၤ. ဘၣ်ဆၣ် တၢ်လၢ အလဲလိာ်သါသး မ့ၢ်ဝဲ, ပှၤမုၣ်ပှၢ်တဂၤ အတၢ်ကတိၤစှၤဘီန့ၣ်လီၤ. ပူၤကွံာ်လံစှၤနွံန့ၣ်, ဖဲယဟဲက့ၤလီၤလၢ တၢ်ဘါလီၢ်န့ၣ်, ယကျဲဘၣ်လိာ်သးဒီး ပှၤမုၣ်ပှၢ်တဂၤ ဒီးယထံၣ်လၢ အဟးဝဲကီကီခဲခဲ ဒီးယမၤစၢၤအီၤဒ်သိး ဟးဝဲကသ့န့ၣ်လီၤ. ဖဲပဟးဒ်န့ၣ်အခါ, အဝဲကွၢ်ထီၣ်ယမဲာ်ဒီး စံးဝဲ မ့ၢ်နသ့ၣ်ညါ ယပှၤအုၣ်က့ၤခီၣ်က့ၤ ယၤခရံာ် စ့ၢ်ကီးဧါ. လၢဟီၣ်ခိၣ်အံၤ, အဝဲမ့ၢ် တၢ်ကိးမံၤဒဲးလၢယဂီၢ်လီၤ. တၢ်ကတိၤစှၤဘီအံၤ ထိးဘၣ် ယသး, ယက့ၤဆူဟံၣ်ယတီၤလီၤ လ့ၢ်ခီၣ်ဒီး ယတူၢ်လိာ်ခရံာ်ဒီး ယဟ့ၣ်လီၤယသးလၢအီၤလီၤ.
သ့ၣ်ညါလၢ ပှၤပတီၢ်မုၣ်, မုၢ်ဆ့ၣ်မုၢ်ဂီၤ အတၢ်အုၣ်အသးလၢ ခရံာ်အဂ့ၢ်ယိယိစှၤဘီန့ၣ်အိၣ်ဒီး အသဟီၣ် ဖးဒိၣ်လၢ အဘိးဘၣ်ဃၣ်လိၤ ပှၤသးဆူ ခရံာ်အအိၣ်စ့ၢ်ကီး န့ၣ်တက့ၢ်.
