မးသဲ ၆း၉, ဘါထုကဖၣ်တၢ်ဒ်အံၤ, အိၣ်လၢမူခိၣ်ပပၢ်ဧၢ, ...
တၢ်ဒုးနၢ်ပၢၢ်ပှၤလၢ ပှၤခရံာ်ဖိတဖၣ် မ့ၢ်ပှၤတဖု တကရၢဧိၤ လၢအကိးယွၤ ပပၢ်ဧၢ, န့ၣ်လီၤ. ပှၤကိးကလုာ်ဒဲး ဒိးန့ၢ်ဘၣ် တၢ်မူလၢ ယွၤအအိၣ်လီၤ. ဘၣ်ဆၣ် ခရံာ်ဖိ တဖၣ်ကိး ယွၤလၢ ပၢ်လၢ အအိၣ်လၢ မူခိၣ် သ့ဝဲလၢ ပတၢ်နာ် ခရံာ်န့ၣ်လီၤ. စီၤပီလူး တဲဝဲဒ်န့ၣ်လၢ ကလၤတံ ၃း၂၆ န့ၣ်လီၤ.
ရိမ့ၤအကဲစၤဖးဒိၣ် တဂၤ တဘျီ မၤတၢ်အိၣ်ဖှိၣ် တၢ်ကွၢ်ကီဖးဒိၣ်လၢ အသုးဖိ သံၣ်ဖိ ဒုးတၢ်နၢၤအဃိ ဒီးပှၤဘီဖိမုၢ်ဖိ ဟဲ၀ဲ အါအါဂီၢ်ဂီၢ် လၢအကကွၢ်ကီဒီး သူၣ်ခုသးခု သကိးလီၤ. သုးဖိတနီၤ ဘၣ်ဒုးနဲၣ် တၢ်ဒီး တနီၤဘၣ်ခိးတၢ် ဒ်သိးကမျၢၢ်တဖၣ် ကအိၣ်လၢ အဂ့ၢ်အဝီ အဂီၢ်လီၤ. ကဲစၤဖးဒိၣ် အဒူၣ်ဖိထၢဖိ တဖၣ် တၢ်ပာ်န့ၢ်အလီၢ်တတီၤလၢ ကကွၢ်ကီ တၢ်အဂီၢ်န့ၣ်လီၤ. တုၤကဲစၤဒီး အသုးခိၣ် သုးနၢ်တဖၣ် ဟဲဘူးဃီၤဆူ ပျဲၢ်စီၢ်ခိၣ်န့ၣ်, ကဲစၤအဖိခွါ သးစၢ်တဂၤ လဲၤဃ့ၣ် သဘျိၣ်ဃီၤဆူ အပၢ်အအိၣ်န့ၣ်လီၤ.
သုးဖိခိးတၢ်တဖၣ် ဖီၣ်ဃာ်ဖိသၣ်အံၤလၢအစု ဒီးတပျဲအီၤလၢ ကလဲၤဝဲဘၣ်ဒီး တဲဘၣ်အီၤ, မ့ၢ်နတသ့ၣ်ညါ လၢပှၤလၢ ကသ့ၣ်လ့ၣ်ကဟၣ်လီၤဆီ န့ၣ်အပူၤဘၣ်ဧါ. အဝဲမ့ၢ်ဝဲ ပကဲစၤဖးဒိၣ်လီၤ. ဖိသၣ်တဲဆၢဝဲ, အဝဲမ့ၢ် သုကဲစၤ လီၤ. အဝဲမ့ၢ် ဒၣ်ယပၢ်လီၤ. ဒီးယမ့ၢ်အဖိခွါလီၤ.
ယွၤဒီး ခရံာ်ဖိတဖၣ် အတၢ်ဘၣ်ဃးလိာ်အသးဒီး အတၢ်ရ့လိာ်အသးဘၣ် မ့ၢ်ဝဲဒ် ဖိသၣ်တဂၤအံၤ ဒီးကဲစၤ ဖးဒိၣ်တဂၤအံၤလီၤ. ပတၢ်ဟဲဆူ ယွၤအအိၣ် တဘၣ်အိၣ်ဝဲဒီး တၢ်သးသုၣ်ဒီး တၢ်သးဒ့ဒီဘၣ်. တၢ်နၢ်ပၢၢ်လိာ်သး, တၢ်အဲၣ်, တၢ်နာ်, တၢ်မုၢ်လၢ် အိၣ်ဝဲလၢ ခရံာ်ဖိတဖၣ်အပူၤဖဲအသုးဘူး ဃီၤအသးဆူ အအိၣ်လၢ တၢ်သန့ၤထီၣ် အသးလၢအီၤ န့ၣ်လီၤ. ပဟဲဆူအအိၣ်ဒီး ပစံးဒ်ခရံာ်မၤလိာ်ပှၤအသိး, အိၣ်လၢမူခိၣ်ပပၢ်ဧၢ, န့ၣ်လီၤ.
