ရိမ့ၤ ၁၂း၁၇, ဃုတၢ်အဂ့ၤ အဘၣ်လၢ ပှၤခဲလၢာ်အမဲာ်ညါ တက့ၢ်.
တနံၤအံၤ အတၢ်မၤလိစံးဝဲ, ဟ့ၣ်ထီၣ် တၢ်အတီအလိၤလၢ ပှၤခဲလၢာ် အမဲာ်ညါတက့ၢ်. လၢတၢ်ကတိၤ အဂၤ, လီတၢ်တဂ့ၤ, ဟုၣ်တၢ်တဂ့ၤ.
ပှၤမုၣ်ပှၢ်ခံဂၤ တဲလိာ်အသးဒ်အံၤ, တဂၤတဲဝဲ, ယလဲၤပှ့ၤ တၢ်လၢ ဆဲၣ်ပူၤ ယသံကွၢ်ထၢၣ်တၢ်ဖံး တဖျၢၣ်အံၤ အပှ့ၤဆံးအါလဲၣ် ဒီးပှၤဆါတၢ်ဖိ စရ့တဂၤ ကွၢ်ဝဲအပှ့ၤ လၢအကွဲးဝဲ လၢအဲကလံးကျိာ် ၅၀ ဘးန့ၣ်, တဲကမၣ်ဘၣ်ဝဲ ၃၀ ဘးလီၤ. အဝဲတဂၤတဲအီၤ, ဒၢး နတတဲဘၣ် က့ၤအီၤလၢ ၅၀ ဘးဘၣ်ဧါ. တဲဆၢဝဲ, ဟၢၣ်အၢ ယတတဲဘၣ်က့ၤအီၤဘၣ်. ယမ့ၢ်တဲဘၣ်နာ်သက့ တၢ်လီၤဆီ တအိၣ်ဘၣ်. ဆဲၣ်ဖးဒိၣ် ထဲထဲန့ၣ် တဖျၢၣ် အစ့အိၣ်အါန့ၢ်ယၤ စၢၢ်တလၢၢ် စ့ ၂၀ ဘးဖိ တမ့ၢ်တၢ်လီၤဆီလၢ အဂီၢ်ဘၣ်.
ပှၤခံဂၤတဂၤ တဲဝဲဖျါဖျါ လီၤဆီဝဲ လီၤတံၢ်လီၤဆဲးဝဲလီၤ. တခါမ့ၢ်ဝဲ တၢ်တီတၢ်လိၤလီၤ. အတၢ်လီၤဆီ ခံဆံဘး တခါမ့ၢ်ဝဲ တၢ်ဘျၣ် အတၢ်မၤလီၤ. ပှၤအခီၣ်ထံးတဂၤ အသကိး မ့ၢ်ကိးအီၤလၢ တၢ်ဘျၣ်န့ၣ် ကနာ်ဝဲ တမုာ်ဘၣ်. ဘၣ်ဆၣ် တၢ်လၢ အမၤဝဲန့ၣ် မ့ၢ်တၢ်ဘျၣ် အတၢ်မၤလီၤ.
ပမှံၤပပှၢ်တဲဖိတဲလံၤလၢ ပဘၣ်အဲၣ် တၢ်တီတၢ်လိၤလီၤ. ပမ့ၢ်ထံၣ် တိၢ်ဖိတကး ဂ့ၤ, ထးကမိာ်ခံတဘိဂ့ၤ, ပကဘၣ် လဲၤဟ့ၣ်သဝီခိၣ်လီၤ. အဝဲကသံကွၢ်ဝဲလၢ အမ့ၢ် မတၤအတၢ်လဲၣ်ဒီး တုၤအကစၢ်ဖျါထီၣ်ဒီး ကဟ့ၣ်က့ၤဝဲ အကစၢ်လီၤ. တၢ်တီတၢ်လိၤ လၢအထီကတၢၢ်လၢ ပမှံၤပပှၢ် ပာ်လုၢ်ဒိၣ်ပှ့ၤဒိၣ် ဝဲအဒိၣ်ကတၢၢ် မ့ၢ်တၢ်တီတၢ်လိၤ လၢတၢ်သကဲာ်ပဝး တကပၤန့ၣ်လီၤ. တၢ်သကဲာ်ပဝး ဒီး မီရၢၣ် လၢအထီ ဟ့ၣ်ထီၣ်ဝဲ တၢ်စိတၢ်ကမီၤဒီး တၢ်သဟီၣ်လီၤ.
