ကလၤတံ ၅း၂၂, ၂၃ ၊ မ့မ့ၢ်သးအတၤသၣ်န့ၣ်, မ့ၢ်တၢ်အဲၣ်တၢ်ကွံ, တၢ်သူၣ်ခုသးခု, တၢ်ဃူတၢ်ဖိး, တၢ်ဝံသးစူၤ, တၢ်သူၣ်စူၤသးစူၤ, တၢ်မၤဂ့ၤတၢ်, တၢ်စူၢ်တၢ်နာ်, တၢ်ဆီၣ်လီၤသး, တၢ်ကီၤသူၣ်ကီၤသး သ့ၣ်တဖၣ်န့ၣ်လီၤ.
လၢကီၢ်အမဲရကၤ, ကီၣ်ဆၣ်အိၣ်ဟါယိၣ် (Ohio) အပူၤန့ၣ်, ပှၤမၤအီၣ်သ့ၣ်သၣ် ကျိးတၢ်လီၢ်တဂၤ သူၣ်သ့ၣ် တဖၣ်လီၤ. အဝဲဟံးန့ၢ်သ့ၣ်အဂၤ တကလုာ် အဒ့ဂ့ၤ အဘ့ၣ်ဂ့ၤ ဝံၤဒုးမဲထီၣ် ဝဲလၢ သ့ၣ်တထူၣ်ဂ့ၤ တထူၣ်ဂ့ၤအလိၤ န့ၣ်, သ့ၣ်န့ၣ် အသၣ်မ့ၢ်ဝဲ သ့ၣ်တကလုာ်ဃီလၢ အဟံးန့ၢ် ဝဲအဒ့ဂ့ၤ အဘ့ၣ်ဂ့ၤ န့ၣ်လီၤ. အဝဲပာ်ကဖၢလၢအသး အဒိၣ်ကတၢၢ် အလီၢ်အိၣ်ဝဲလၢ အသ့ၣ်အဲးပလၢၣ် တထူၣ် သၣ်ထီၣ်ဝဲ အဲးပလၢၣ် လၢအသၣ်လီၤဆီ, ဒီး ပှၤအီၣ်ဝဲဘဲ, ဒီးဖျါဘၣ်မဲာ်ဘၣ်နါ ပှၤဒိၣ်မးအိၣ်ဃိးကလုာ်, ဒီး အလွဲၢ်လီၤဆီဝဲဒၣ် သၢကလုာ် လၢအမ့ၢ်အဂီၤ, အဘီ, ဒီးအလါန့ၣ်လီၤ.
စံးထီၣ်ပြတၢၤ ၁း၃ ထိၣ်သြတီၤပှၤတီပှၤလိၤဒီး သ့ၣ်တဖၣ် လၢအသူၣ်လီၤအသးလၢ ထံကျိဖိအနံၤ လၢ အသၣ်ထီၣ်လၢ အဆၢကတီၢ်ဒၣ်ဝဲ ဒီးအလၣ်တလီၤ ညွံးဘၣ်အသိးန့ၣ်လီၤ. ခရံာ်စံးဝဲ, ကယဲၢ်သ့ၣ်အဂ့ၤ ကိးထံး သၣ်ထီၣ်တၤသၣ် အဂ့ၤလီၤ. မးသဲ ၇ း၁၇. ပှၤတဂၤဂ့ၤတဂၤဂ့ၤ မ့ၢ်မၤကွၢ်ဒုးနဲၣ်ဖျါထီၣ် သးအတၤသၣ် တဖၣ်လၢ စီၤပီလူး ကွဲးတဲပှၤကလၤတံဖိန့ၣ်, (တနံၤတၤသၣ် တမံၤဒ် တၢ်ရဲၣ်လီၤအိၣ်ဝဲအသိးန့ၣ်) အဝဲကအိၣ်ဝဲဒီး သးအတၤသၣ် တဖၣ်အံၤ ခဲလၢာ် လၢအတၢ်မၤကွၢ်ဝံၤဝဲအလီၢ် ခံန့ၣ်လီၤ. တၢ်မၤကွၢ်ဒ်အံၤ မ့ၢ်ကတၢၢ်ဝဲတဝီဒီး တၢ်မၤကွၢ်ြကၢးစးထီၣ်ကဒါက့ၤကဒီး အသီတဘျီ လၢအခီၣ်ထံး တုၤလၢ အကတၢၢ် န့ၣ်လီၤ. တၢ်မၤကွၢ် ဒ်အံၤ တဘျီဘၣ်တဘျီ ကဲထီၣ်က့ၤ ဝဲ တၢ်အလုၢ်အလၢ် လၢအတဟးဖးဘၣ် ဒီး ပှၤမၤကွၢ်တၢ်တဂၤ န့ၣ်ဘၣ်လီၤ. ခရံာ်ဖိမ့ၢ်မၤကွၢ် ဝဲဒ်အံၤ ကိးဂၤ ကဂ့ၤဆံးဒိၣ်လဲၣ်.
