၅ မိၤ ၃၂း၁၁, ဒ်လံာ်ြကီြကာ်ထိၣ်ဂဲၤအသွံ, ဟုအဖိ ယၤထီၣ်အဒံးဆ့, ဟံးန့ၢ်အီၤ, ဒီးစိာ်ထီၣ်အီၤလၢ အဒံးဆ့အဖီခိၣ် အသိး.
လံာ်ြကီြကာ် ဟုအဖိ, လုၢ်ဒိၣ်ထီၣ်အဖိ, သိၣ်လိအီၤလၢ တၢ်သးဒူ လၢအကယူၤဝဲဒ်လဲၣ် ဒ်လဲၣ် န့ၣ်မ့ၢ် တၢ်လီၤကမၢကမၣ်န့ၣ်လီၤ.
တုၤလံာ်ြကီြကာ် ဖိဒိၣ်ထီၣ်တစဲးလံန့ၣ်, အမိၢ်စးထီၣ် ယူလိအီၤလီၤ. လံာ်ြကီြကာ် မိၢ်တဘ့ၣ် ဟဲက့ၤစိာ်ဝဲ တၢ်အီၣ်လၢ အဖိအဂီၢ်ဒီး လွဲန့ၢ်အီၤ လၢအကလူၤ ထွဲအခံဖဲ အနၢဘၣ် တၢ်အီၣ်န့ၣ်လီၤ. ဘၣ်ဆၣ် အဖိယူၤဖျဲးထီၣ်လၢ အသွံပူၤ တဘူၣ်ဘၣ်. ကွၢ်လီၤတၢ်ဆူ အသွံဖီလာ် ယိာ်ယိာ်ကလဲာ်အပူၤ ဒီး ပျံၤဝဲလၢ အကလီၤတဲာ် ဒီးသဘှံးကွံာ်ဆူ အက့အခီန့ၣ်လီၤ. အမိၢ်အိၣ်လၢ အသွံဖီခိၣ် ဖးယံၤ, ယူၤလီၤချ့ချ့ ကလဲာ်ဒီး ဆီၣ်ဖျိးကွံာ် အဖိဆူ တၢ်ဖီလာ်လီၤ. အဖိဘၣ်ယူၤလိ အသးလၢ အဒံးလီၤ. ဘၣ်ဆၣ် ယူၤတသ့ ဒံးဘၣ်အဃိ လီၤတဲာ်ခိၣ်လီၤလာ်ဝဲဒီး ကတုၤလီၤဝဲလၢ လ့အခိၣ်ဒူ လီၤ. တဘျီဃီ အမိၢ်ဟဲနုာ်လီၤ လၢအဖီလာ် ဒီးအခိၣ်အိၣ်ဝဲလၢအမိၢ်အဖံဘၣ်ခိၣ်လီၤ. အဖိဝံၢ်လိၤက့ၤအသး အသးဒူထီၣ်က့ၤဝဲလီၤ. သတူၢ်ကလာ် အမိၢ်သုးကွံာ်အသးဒီး အဖိလီၤတဲာ်ဆှိခိၣ်ကဒီးလီၤ. တဘျီအံၤ အမိၢ်အိၣ်လၢ အဖီလာ် တဘျီဘျီ အကပၤတဘျီဘျီ ဒီးလၢ အဖီခိၣ် တဘျီဘျီ, သိၣ်လိအဖိလၢ အကသူအဒံးဆ့ န့ၣ်လီၤ. တယံာ်ဘၣ် ဒီးခံဘ့ၣ်လိာ် စီၢ်လီၤဝဲလၢ သ့ၣ်ဆှိဖးဒိၣ် တထူၣ်အစိးခံ ဒီးအမိၢ်ဒုးအီၣ်အဆၣ်လီၤ.
စီၤမိၤရှ့ကွဲးဖျါထီၣ်ဝဲ ယွၤအတၢ်အဲၣ်အဖိ အံၣ်စရ့လး, လုၢ်ဒိၣ်ထီၣ်ဝဲ, ကဟုကယာ်ဝဲ, သိၣ်လိဝဲလၢ အကမၤနၢၤ တၢ်အိၣ်မူ အတၢ်ကီတၢ်ခဲတဖၣ် ဒ်လံာ်ြကီြကာ် လုၢ်ဒိၣ်ထီၣ်အဖိအသိးလီၤ. စီၤမိၤရှ့ န့ၢ်လံာ်ြကီြကာ် အတၢ်လုၢ်အဖိအတၢ်သိၣ်လိအံၤ, ဖဲအကွၢ် အမံၤပှၢ် စီၤယံၤသရိာ် အသိလၢ မံးဒယၣ် အပှၢ်မုၢ်ကနၢ အနံၣ်လွံၢ်ဆံ အခါန့ၣ်လီၤ.
