မးသဲ ၂၄း၁၃, ပှၤလၢအအိၣ်ဂၢၢ်ဆိးကျၢၤ တုၤအကတၢၢ်န့ၣ် ကတုၤလၢ တၢ်အုၣ်က့ၤခီၣ်က့ၤအီၤလီၤ.
လၢတၢ်ကတိၤအဂၤ ပှၤလၢအတပာ်ကွံာ် အတၢ်မၤဘၣ် တုၤလၢ အတၢ်မၤဝံၤဝဲန့ၣ်, န့ၢ်ဘၣ် တၢ်ပူၤဖျဲးလီၤ.
လၢကီၢ်ယူရပၤ, ကီၢ်ဖိ စွံးစလဲၣ် အပူၤန့ၣ်, ပှၤပၢကီၢ် တဂၤ, မၢဝဲ ပှၤစိးပျၤလၢၢ် ဝါသ့တဂၤ လၢကစိးပျၤ န့ၢ်အဂီၤ လၢလၢၢ်ဝါ န့ၣ်လီၤ. လၢအဝဲအဂီၤအခီၣ်ထံး န့ၣ်, အိၣ်ဒီး ထွံၣ်လၢ အတီဒီး အကစၢ်တဒု အဂီၤန့ၣ်လီၤ. အဂ့ၢ်ဟဲဝဲဒ် အဖီလာ် အံၤလီၤ.
လၢအပူၤကွံာ် တဘျုးနံၣ်န့ၣ်, ပှၤပၢကီၢ်အံၤ ဖဲအသးစၢ်ဒံးအခါ, အဝဲလဲၤဒိးကသ့ၣ်လၢ ကစၢၢ်ကဆူး အကျဲတတီၤ ကိးဝဲလၢ စ့ၣ်ကီသးကျဲ (St. Gothard Pass) ဃုာ်ဒီး အပှၤတဂၤဒီး အထွံၣ်တဒု လီၤ. မ့ၢ်တၢ်လီၢ်လၢ တၢ်ဂိၢ်ဒိၣ်မး ဒီးမူခိၣ်ဖီတီၣ်ဝဲ အကျါလီၤ. တဘျီဘျီကလံၤမုၢ်ဟဲ ဒီးမူခိၣ်ဖီလၢ ကစၢၢ်ဒီခိၣ် ဟဲလာ်လီၤ အသးလီၤ. ဖဲအဝဲသ့ၣ် လဲၤတၢ်အဖၢမုၢ်, ဘၣ်န့ၢ်လၢမူခိၣ်ဖီလီၤလာ် ဒီးကျၢၢ်ဘၢကွံာ် ပှၤပၢကီၢ်အံၤ အပှၤတဂၤန့ၣ်ဒီး အထွံၣ်လီၤ. ထဲထွံၣ်တဒုဧိၤ မၤထူၣ်ဖျဲး ထီၣ်အသးလၢ မူခိၣ်ဖီအဖီလာ် ဒီးကျဲးစၢး ဘါထုးထီၣ် အကစၢ်လၢ မူခိၣ်ဖီအဖီလာ်လီၤ. ဘၣ်ဆၣ် ဘါဝဲတန့ၢ်ဘၣ်. အဝဲက့ၤကဒါက့ၤဆူ ပှၤတမှံၤ လဲၤတၢ်ဖိ ညီနုၢ်မံအိၣ်ဘှံး ဝဲအလီၢ်ဖဲ အဟဲအိၣ်ဘှံးဘၣ်ဝဲန့ၣ်လီၤ. အဝဲကအံၣ်ကအု ဝဲဒီး အိၣ်ယူၤဝဲ ဒီး အ့ၣ်ထုး ပှၤပိာ်ခွါတဖၣ်အတၢ်ကူအခီၣ်ထံးဒီး ယူထုးအီၤဆူ တၢ်အိၣ်ဘှံးအဟံၣ်ချၢ န့ၣ်လီၤ.
ပှၤဟံၣ်ကစၢ်နၢ်ပၢၢ်ဝဲလၢ ထွံၣ်အံၤ ဃ့တၢ်မၤစၢၤ မ့ၢ်လၢ တၢ်ကီတၢ်ခဲဘၣ်လံ အကစၢ်အဃိလီၤ. အဝဲသ့ၣ် ကိးလိာ်အသးဒီး လဲၤပိာ်ထွံၣ် အံၤအခံလီၤ. လဲၤစိာ်ဃုာ်ဒီး တၢ်ပီးတၢ်လီ တဖၣ်လၢ ကခူၣ်တၢ်, ဒီး က၀ာ်ထီၣ်မူခိၣ်ဖီလၢ အလီၤပှီၢ်ဘၢ အကစၢ်န့ၣ်လီၤ. ပှၤကညီတဖၣ်စ့ၢ်ကီး ခူၣ်ထီၣ်ဘါထီၣ်မူခိၣ်ဖီလၢ ထွံၣ် အသကိးလီၤ. အဝဲသ့ၣ် အတၢ်မၤသကိး အံၤကဲထီၣ် တၢ်ဘျုးတၢ်ဖှိၣ် ဒီးထံၣ်န့ၢ်က့ၤ ထွံၣ်အကစၢ်ဒီး အပှၤတဂၤန့ၣ်လီၤ. အဝဲသ့ၣ် မူဒံးအဃိ ဆှၢဝဲဆူ တၢ်ဆါဟံၣ်လၢ တၢ်ကယါဘျါ အီၤအဂီၢ်န့ၣ်လီၤ. ထွံၣ်အကစၢ် အဲၣ်ဒိးဒုးသ့ၣ်ညါ ပှၤလၢစိၤလၢခံတဖၣ်လၢ အထွံၣ်အံၤ မၤပူၤဖျဲး အသးသမူ ဒ်လဲၣ်အဂ့ၢ်န့ၣ်လီၤ.
