မးသဲ ၂၆း၂၅, ဖဲဒၣ်ပှၤလၢ တၢ်မိၣ်အုၣ်က့ၤခီၣ်က့ၤလီၤအသး တဂၤဂၤန့ၣ်, ကမၤဟါမၢ်ကွံာ်ဝဲလီၤ. ဒီးဖဲဒၣ် ပှၤလၢအဒုးဟါမၢ် အသးလၢယဃိ တဂၤဂၤန့ၣ် ကထံၣ်န့ၢ်က့ၤအီၤလီၤ.
ကီၢ်အဲကလံး အသုးမုၢ်တဖုဘၣ် ဒုးနဲၣ်သုးအတၢ်ရဲၣ်လီၤလၢ ဝ့ၢ်လိဒိၣ်အပူၤ လီၤ. စီၤပၤကၠီး ၅ ဂၤတဂၤ, ဒီးနီၢ်ပၤမုၣ် မ့ရ့ၣ် အိၣ်ဝဲလၢ ပျဲၢ်စီၢ်လီၤဆီ အဖီခိၣ် လၢ ကကွၢ်ကီတၢ် အဂီၢ်လီၤ. ပှၤဂီၢ်မုၢ်တဖၣ် ဟဲဝဲ လၢကကွၢ်ကီ တၢ်ဒုးနဲၣ် အံၤလီၤ. ပိာ်မုၣ်ဖိသၣ်တဂၤလၢ အမံၤ ကၠ့ၣ်နဲးလၢ အသးအိၣ် ၁၂ နံၣ်တဂၤန့ၣ်, ဒ်ပှၤအါဂၤ မၤဝဲအသိး လဲၤဆိဝဲဒ်သိး အကမၤန့ၢ်တၢ်လီၢ်ဂ့ၤလၢ အကကွၢ်ကီ ဘၣ်တၢ်အဂီၢ်န့ၣ်လီၤ. အသးမံ သးမုာ်ဝဲလၢ အမၤန့ၢ်တၢ်လီၢ် အဂ့ၤတခါအံၤ အဃိလီၤ.
ထံၣ်ဘၣ်ဝဲ သးပှၢ်မုၣ် လၢအကူတၢ်သိးတၢ် တဂ့ၤဘၣ်တဂၤ, လူၤဃုတၢ်လီၢ်လၢ အကကွၢ်ကီၢ်ဘၣ် တၢ်ဒုးနဲၣ် အံၤအဂီၢ်ဘၣ်ဆၣ် ဃုဝဲတဘၣ်ဘၣ်. ကၠ့ၣ်နဲး ထံၣ်တၢ်အံၤဒီး အသးဘၣ်ဒိဒီး သးကညီၤအီၤဒီး ဟ့ၣ်ပိာ်မုၣ်သးပှၢ်အံၤလၢ အလီၢ်န့ၣ်လီၤ. ကၠ့ၣ်နဲးလဲၤဆၢထၢၣ် လၢပှၤဂီၢ်မုၢ်အသကိး လၢကကွၢ်ကီတၢ် အဂီၢ်လီၤ. ဘၣ်ဆၣ် အနီၢ်ဖုၣ်အဃိ ကွၢ်တၢ်တဖျါဘၣ်. သတူၢ်ကလာ် ပလံးခိးကျဲလၢ အလီၤယူးယီၣ် ပာ်ကဲတဂၤ ဟဲဆူအကပၤဒီး စံးဘၣ်အီၤ, နီၢ်ပၤမုၣ် အဲၣ်ဒိး ထံၣ်နၤလီၤ. ပလံးဆှၢအီၤဆူ ပျဲၢ်စီၢ်ခိၣ် ဒီးနီၢ်ပၤမုၣ်တဲအီၤ, ယထံၣ် နဟ့ၣ်ကွံာ်နလီၢ်အဂ့ၤလၢ နကကွၢ်ကီတၢ်အဂီၢ် ဆူပိာ်မုၣ် သးပှၢ်တဂၤလီၤ. ဟဲဆ့ၣ်နီၤလၢ ယကပၤအံၤ တက့ၢ်.
ပိာ်မုၣ်ဖိတဘျီအံၤ မၤန့ၢ်တၢ်လီၢ်လၢအဂ့ၤဂ့ၤ ကလဲာ်ဒီး ဘူးဘူးကလဲာ်လၢ အကကွၢ်ကီဘၣ် တၢ်ဒုးနဲၣ် ဖးဒိၣ်အံၤလီၤ. မ့ၢ်လၢ အဟ့ၣ်လီၤကွံာ်အလီၢ်လၢ အကဆ့ၣ်နီၤဝဲဆူ ပိာ်မုၣ်သးပှၢ်န့ၣ်အဃိ, မ့ၢ်အဝဲ ဘၣ်ခီၣ်ဆါအသးဒီး မ့ၢ် တၢ်လီၤမၢ်လၢ အတၢ်ဘၣ်ဘျုးလၢ အဂီၢ်ဒၣ်ဝဲန့ၣ်လီၤ. ဘၣ်ဆၣ် အဝဲဒိးန့ၢ်ဘၣ်က့ၤ တၢ်ဘျုးလၢ အတၢ်မၤဂ့ၤအံၤ အဃိလီၤ. ယွၤအိၣ်ဒီး အမဲာ်ချံ လၢအကွၢ်တၢ်ဒီး ထံၣ်တၢ် ဂ့ၤန့ၢ် နီၢ်ပၤမုၣ် မ့ရ့ၣ် ထံၣ်ဝဲလီၤ. ကဆိၣ်ဂ့ၤ ပှၤဖဲ ပခီၣ်ဆါပသး တဘျီလၢ်လၢ် န့ၣ်လီၤ.
