၁ ပ့း ၂း၂၁, ခရံာ်ဒိးတၢ်လၢပဃိ ဒီးပာ်လီၤတဲာ် အဒိအတဲာ် ဒ်သိးပကယီၢ်အခီၣ်လီၢ် န့ၣ်လီၤ.
ပှၤစိးပျၤ လၢၢ်လၢ အမံၤဟူသၣ်ဖျါ ဒိၣ်မးတဂၤ စိးပျၤခရံာ်အဂီၤလၢ လၢၢ်ဝါ တကလုာ်လီၤ. အဝဲမၤလၢာ် အတၢ်ဆိကမိၣ်, အတၢ်ကူၣ်တၢ်ဆးလၢ ယဲၢ်နံၣ် အတီၢ်ပူၤဝံၤ, ကိးန့ၢ်ဖိသၣ်တဂၤဒီး သံကွၢ်အီၤ, ကွၢ်တၢ်ဂီၤ လၢယစိးပျၤ အီၤအံၤ မ့ၢ်မတၤအဂီၤလဲၣ်. ဖိသၣ်အံၤ ကွၢ်ဝဲ တတီၤဒီး စံးဝဲ, ပှၤန့ၣ် မ့ၢ်မး ပှၤဖးဒိၣ် တဂၤဒီး အဂံၢ်ဆူၣ် ဘါဆူၣ်ဒိၣ်မး တဂၤလီၤ. ပှၤစိးပျၤတၢ်ဖိ အသးဟးဂီၤဒိၣ်မး ဒီးစိးပျၤကဒီး ဝဲ တၢ်အက့ၢ်အဂီၤ အသီတခါ အိၣ်ဒီး တၢ်တိာ်ပာ် အသးနီၢ်နီၢ် လၢအကမၤဝဲတုၤ ဖိသၣ်ဒၣ်လဲာ် မ့ၢ်ကွၢ်ထံအီၤဒီး ကသ့ၣ်ညါဝဲလၢ အမ့ၢ်ဝဲ ခရံာ်အဂီၤန့ၣ်လီၤ. အဝဲမၤတၢ်ဆူၣ်ဆူၣ်ကလဲာ် အိၣ်ဒီး တၢ်ထုကဖၣ် သပှၢ်ပှၢ် လၢကမၤတၢ်အံၤ ကသ့အဂီၢ်န့ၣ်လီၤ.
လီၢ်ခံသၢနံၣ်ဒီး ကိးန့ၢ် ကဒီးဖိသၣ် အဂၤတဂၤ ဒီးဒုးနဲၣ်အီၤလၢ တၢ်ဂီၤန့ၣ် လီၤ. သံကွၢ်ဝဲတၢ်ဂီၤအံၤ မ့ၢ်မတၤ အဂီၤလဲၣ်, နတဲယၤသ့စ့ၢ်ကီးဧါ. ဖိသၣ်အံၤ ကွၢ်ထံဝဲ ကစုဒု, ဒီးလၢတၢ်မဲာ်ထံမဲာ်နိ အပူၤစံးဆၢဝဲ, ပျဲဖိသၣ် န့ၣ် တက့ၢ်ဒီး သုတြတီအီၤ အဟဲဆူ ယအိၣ်တဂ့ၤ. မူခိၣ်အဘီဖိမုၢ်ဖိ မ့ၢ်ပှၤဒ်န့ၣ် အသိးလီၤ (မးသဲ ၁၉း၄). တၢ်ဂီၤအံၤ လီၣ်ဖျါနီၢ်နီၢ်ခရံာ်အက့ၢ်အဂီၤလီၤ. မ့ၢ်ပတၢ်အိၣ်မူ လီၣ်ဖျါထီၣ် စ့ၢ်ကီးခရံာ်အဂီၤဧါ.
ကဘီယၢ်လၣ်ဖးဒိၣ်တဘ့ၣ် ဖဲအလဲၤတၢ်လၢ ပီၣ်လဲၣ်ဖးဒိၣ် အဲးတလဲထံး အခၢၣ်သးအခါ, ကလံၤမုၢ်ဖးဒိၣ် လီၤဘၣ်အီၤဒီး အယၢ်လၣ် တအိၣ်ဘၣ်လီၢ်ဘၣ်စး လၢၤဘၣ်. အဃိ တၢ်ကဘၣ်မၤလိၤ မၤဘၣ်က့ၤအီၤ စးထီၣ်လၢ အခိၣ်စိးလီၤ. ကဘီခိၣ်ဃုထၢဖိသၣ် ၁၃ နံၣ်တဂၤလၢ ကထီၣ်ယၢ်လၣ် အတၢၣ်ဒီး ဝံာ်လီၤ က့ၤအီၤန့ၣ်လီၤ. ဖိသၣ်အံၤ ကွၢ်ထီၣ်တၢၣ်ခိၣ်စိး ဒီးကွၢ်လီၤ လပီလၢ အဒိနုာ်တၢ်ကဘီပူၤဒီး အဝဲပျံၤတၢ်လီၤ. ဘၣ်ဆၣ်စံးဝဲ, ယကက့ၤဆူယဒၢးဖိအပူၤဝံၤ, ယကဟဲထီၣ်ဘှီက့ၤအီၤလီၤ. စှၤမံးနံးအတီၢ်ပူၤ ဟဲထီၣ်တၢၣ်န့ၣ်ဒီး ဘိးလိၤက့ၤ ယၢ်လၣ် လီၤ. ကဘီဖိသံကွၢ်ကဘီခိၣ်, ဘၣ်မနုၤ အဝဲမၢ မုၣ်ကမဲအဖိခွါ တဂၤလၢ ကမၤတၢ်အံၤလဲၣ်. ကဘီခိၣ်သ့ၣ်ညါဝဲ ဖိသၣ်အံၤ အမိၢ်သိၣ်လိအီၤ လၢအကဘါထုကဖၣ် တၢ်လီၤ. ဖိသၣ်အံၤ က့ၤနုာ်ဆူ အဒၢးဖိပူၤဒီး ဘါထုကဖၣ် တၢ်ဝံၤ တၢ်ပျံၤလီၤမၢ်ကွံာ်ဝဲလီၤ.
