ဒၤ ၁၂း၃, ပှၤလၢအကူၣ်တၢ်သ့န့ၣ် ကကပီၤထီၣ်ဒ် မူခိၣ်အတၢ်ကပီၤ အသိးဒီး ပှၤလၢအဒုးတီဒုးလိၤပှၤ အါဂၤန့ၣ်, ဒ်ဆၣ်ဧိၤဖီဧိၤ အသိး အစိၤစိၤအဃၣ်ဃၣ်လီၤ.
လ့နဲး, မ့ၢ်ပိာ်မုၣ်လၢအထူးတီၤ တဂၤလၢ အသးအိၣ် မၤစၢၤပှၤလၢအလီၤဘၣ် ဃိာ်တဖၣ် ခီဖျိ အလဲၤဘါယုၤ အတၢ်, တၢ်ကတိၤသဆၣ်ထီၣ်အခံ, ဒီးဟ့ၣ်အီၤလၢ ဖီတဖၣ်လီၤ. အဝဲလဲၤပှ့ၤ ဖီတၤဆှုၣ် တဖၣ်လၢ ပှၤဆါဖီအအိၣ်လီၤ. ဖဲပှၤဆါတၢ်ဖိ ဘိၣ်ထီၣ်ဖီလၢ အကဟ့ၣ်လီၤအီၤအခါ, လ့နဲးဒုးနဲၣ်ဃီၤဖီတၤဆှုၣ် ဝါတဖီးလၢ အကဟံးန့ၢ်ဝဲလီၤ. ဘၣ်ဆၣ် ပှၤဆါတၢ်ဖိ တဲအီၤလၢ သါကဟ့ၣ်အီၤ ခဲကိာ်တဘျီလီၤ. ဘၣ်ဆၣ် လ့နဲးတဲဝဲ, သါတိာ်ပာ်ဖီအံၤလီၤဆီဒၣ်တၢ် လၢပှၤတဂၤ အဂီၢ်လီၤ. ဟံးန့ၢ်ဝဲဒီး လဲၤစိာ်ဖီခဲလၢာ်ဆူ ပိာ်မုၣ် အဃိာ်ပူၤလီၤ. အဝဲသံကွၢ် ပှၤကွၢ်ပှၤဃိာ်ဖိ တဖၣ်လၢ ပိာ်မုၣ်ဃိာ်ဖိတဖၣ် အိၣ်ခဲလၢာ်ကစီဒီဧါ. ပှၤစံး ဆၢအီၤ လၢပိာ်မုၣ်အိၣ်ဒံးတဂၤလၢ အမံၤမ့ၢ် မ့ရ့ၣ်လီၤ. ပှၤတဒုးနဲၣ်အီၤဒံးဘၣ်, မ့ၢ်လၢ အဝဲဆိၣ်တၢ်ထုတၢ် အဃိလီၤ.
တုၤလ့နဲး လဲၤနုာ်ဆူအဒၢးပူၤဒီး မ့ရ့ၣ် ဆိၣ်အီၤထုအီၤ ဒီးကတိၤတၢ်ကတိၤတရီ တပါတဖၣ်လီၤ. ဘၣ်ဆၣ် လ့နဲး တတဲဆၢအီၤဘၣ်. မ့မ့ၢ်ဟ့ၣ်အီၤ ဖီတၤဆှုၣ် ဝါတဖီးအံၤလၢ အဂီၢ်လီၤဆီဒၣ်တၢ် န့ၣ်လီၤ. တုၤအဟဲကဒီးလီၢ်ခံတနံၤဒီး ပှၤပၢၤဃိာ်ဖိတဲ လ့နဲးလၢ မ့ရ့ၣ်သံကွၢ်အဂ့ၢ် ခဲအံၤခဲအံၤ လၢအန့ၢ်ဘၣ် ဖီဝါ အံၤဝံၤအလီၢ်ခံန့ၣ်လီၤ. လ့နဲးန့ၢ်အခွဲးလၢ အကလဲၤနုာ်ဆ့ၣ်နီၤကတိၤ တၢ်ဒီး မ့ရ့ၣ် လၢဃိာ်ဒၢး ဖိအံၤ အပူၤ န့ၣ်လီၤ. ဖဲမ့ရ့ၣ် အိးထီၣ်အသးလၢ အပုာ်ထီၣ်ယွၤလီၤဝဲ ဒီးတၢ်ပီၢ်ယၢ်လီၤသးဒီး တၢ်ဆီၣ်လီၤသးန့ၣ်, တဲဖျါထီၣ်ဝဲလၢ သါမိၢ်မ့ၢ်ပှၤလၢ အအဲၣ်ယွၤ, သါပၢ်မ့ၢ် ပှၤမၤသ့အီၣ်ဘၣ် တဂၤလီၤ. သါရ့လိာ်ဘၣ်သါသးဒီး တံၤသကိးလၢ အတဂ့ၤတဖၣ်ဒီး သါလီၤအုး လၢတၢ်ဒဲးဘးအပူၤ, တုၤအခံဒး, သါမၤသဘှံးသါမိၢ်သါပၢ် အသး, ဒီးသါဟးထီၣ်ကွံာ်လၢ ကီၢ်ယူရပၤအပူၤ ဒီးသါဟဲဆူ ကီၢ်အမဲရကၤ, သါမၤတၢ်ဒဲးဘး အကလုာ်ကလုာ် ဒီးသါမၤဂ့ၤ က့ၤသါသးတသ့လၢၤဘၣ်. တုၤသါထံၣ်ဃီၤဖီတၤဆှုၣ် ဝါတဖီးလၢ လ့နဲးဟ့ၣ် အီၤန့ၣ်, သါသ့ၣ်နီၣ်သါမိၢ်လီၤ. အဝဲမ့ၢ်ပှၤလၢ အအဲၣ်လီၤဆီ ဖီတၤဆှုၣ်ဝါလီၤ.
