ရှါ ၄၄း၂၂, ယြတူာ်ကွံာ်လံ နတၢ်ကမၣ်ဒ် တၢ်အၢၣ်သူအသိး … ဟဲက့ၤကဒါက့ၤဆူ ယအိၣ်တက့ၢ် … ယပှ့ၤက့ၤနၤလံ.
နီရံး မ့ၢ်ပိာ်ခွါတဂၤလၢ အဘၣ်တၢ်လုၢ်ဒိၣ်ထီၣ် အီၤလၢ မိၢ်လၢ အအဲၣ်ယွၤ တဂၤလီၤ. ဖဲအနီၢ်ဆံးဒံးအခါ အဝဲဘါတၢ်ဆူၣ်မးလီၤ. ဘၣ်ဆၣ် တုၤအဒိၣ်တုာ်ထီၣ်ဒီး ရ့လိာ်ဘၣ်အသးဒီး တံၤသကိး လၢအတနာ်ယွၤတဖၣ် ဒီးလီၢ်ခံ အဝဲစ့ၢ်ကီး တနာ်လၢၤဝဲ လၢယွၤအိၣ်ဝဲဘၣ်. အဝဲန့ၢ်အမါဒီး လုၢ်အီၣ်အသးသမူလၢ တၢ်မၤပနံၣ်တၢ်ကၤ, ဒီးထူးထီၣ်တီၤထီၣ်ဝဲဒီး တသ့ၣ်ညါလၢၤခရံာ် ဘၣ်ဒီး တဘါတၢ်လၢၤဘၣ်.
ဘၣ်ဆၣ် နီရံး အိၣ်ဒီးအဖိခွါလၢ အသးဆးမးတဂၤလီၤ. အဝဲကိးန့ၢ်အဖိခွါ အမံၤလၢ ထဲးဒ့ၣ် ဒီးအပၢ် အဲၣ်အီၤ လၢာ်သးလီၤ. ဖဲအသးအိၣ် ၇ နံၣ်အခါ ဘၣ်တဟါန့ၣ်, အပၢ်ဟဲက့ၤဆူဟံၣ် ဒီးထံၣ်ဘၣ် ထဲးဒ့ၣ် မံနီၤလၢ ကတဲၣ်ခိၣ် တကၤဆ့ ကၤဘၣ်. အမိၢ်တဲဘၣ်အပၢ် လၢထဲဒ့ၣ်မၤကမၣ် တၢ်တဘျုးမံၤအဃိ သါဘၣ်ဖျ့အီၤ န့ၣ်လီၤ. အပၢ်နၢ်ဟူ အဖိဟီၣ်သါတကုးဒီး အဖိတဲဝဲလၢ “ယတအဲၣ်ဒိးလၢ ကလူးကကွဲးလီၤတၢ်လၢ ယမၤကမၣ် ဘၣ်တနံၤအံၤတဖၣ် လၢအစရီအပူၤဘၣ်. ပၢ်ဧၢ, မ့ၢ်နထူးသံကွံာ်န့ၢ်ယၤတသ့ဘၣ်ဧါ.”
အပၢ်အဲၣ်အဖိဒီး သးကညီၤအီၤဒိၣ်မး ဒီးတဲဆၢအဖိခွါ, ဟီၣ်လၢၤတဂ့ၤ. တၢ်တဂ့ၤလၢစရီ ပာ်ဖျါဝဲတဖၣ် ကဘၣ်တၢ်ြတူၢ်ကွံာ်အီၤလီၤ. တီၤလီၤလၢနလီၢ်မံအကပၤဒီး ဃ့ဘါထုကဖၣ် လၢခရံာ်ကထွါကွံာ် နတၢ်ကမၣ် တဖၣ်တက့ၢ်. ဖဲအဝဲသ့ၣ်ညါလၢ နသးအုး လၢအဃိအခါ န့ၣ် ကထွါကွံာ်န့ၢ်နၤလီၤ. ထဲဒ့ၣ် စံၣ်လီၤလၢ ကတဲၣ်ခိၣ်, တီၤလီၤကဒွံကျိၤ လၢအကပၤဒီးကိးထီၣ်ဝဲ, ပါပၢ်ဧၢ, ဟဲသိၣ်လၢယၤ လၢ ယကဘၣ်တဲဒ်လဲၣ်တက့ၢ်. ဘၣ်ဆၣ် ဆိကမိၣ်ထီၣ်က့ၤတၢ်ထုကဖၣ် လၢအမိၢ်သိၣ်လိအီၤဒီး ဃ့ဘါထုကဖၣ်ယုၤအဖိလၢ အကဃ့ကညးခရံာ်လၢ အကဒုးလီၤမၢ်ကွံာ် အတၢ်ကမၣ်န့ၣ်လီၤ.
ထဲးဒ့ၣ်သံကွၢ်ဝဲ, ပါပၢ်ဧၢ, နတဲလီၤတံၢ် လၢယတၢ်ကမၣ်တဖၣ် လီၤမၢ်ကွံာ်လံ သ့ဧါ. လီၤမၢ်ဝဲဒ်လဲၣ်. အပၢ်သ့ၣ်နီၣ်ထီၣ်က့ၤ တၢ်ကတိၤလၢ အမိၢ်သိၣ်လိအီၤ တဖၣ်ဒီးတဲဆၢဝဲ, ယတဲလီၤတံၢ်သ့လၢ နတၢ်ကမၣ် ဘၣ်တၢ်ပျၢ်ကွံာ်အီၤလံ. ခရံာ်သ့စီကွံာ်အီၤ လၢအသွံၣ်လၢ ထူၣ်စုညါ လိၤန့ၣ်လီၤ. လၢကျဲဒ်အံၤ, ထဲးဒ့ၣ် နဲၣ်က့ၤ အပၢ်အကျဲ ဒ်သိးကက့ၤကဒါက့ၤဆူ ခရံာ်အအိၣ်လီၤ. အမိၢ်ဒီးအပၢ် ကဲထီၣ်က့ၤခရံာ်ဖိ လၢအဂ့ၤတဖၣ်လီၤ.
