စံး ၄၀း၁၇, ဒီးယဲဒၣ်အံၤ ယမ့ၢ်ပှၤဘၣ်နးဘၣ်ဖှီၣ်, ဒီးပှၤဖှီၣ်ဖိယာ်ဖိ လီၤ. ယွၤဆိကမိၣ်တၢ်လၢ ယဂ့ၢ်လီၤ. နမ့ၢ်ယတၢ်မၤစၢၤ ဒီးယတၢ်မၤပူၤမၤဖျဲးတၢ်လီၤ.
ထဲးဒ့ၣ် မ့ၢ်ဖိသၣ်ပိာ်ခွါ ၁၂ နံၣ်တဂၤလၢ အဟးတသ့ဘၣ် လၢအအိၣ်ဖျဲၣ် ထီၣ်လံၤလံၤ န့ၣ်လီၤ. ဒီးအမိၢ် လၢအမ့ၢ် ပှၤအဲၣ်ယွၤ တဂၤ သံသဒၣ်ကွံာ်အီၤ တယံာ်ဒံးဘၣ် န့ၣ်လီၤ. အဝဲထံၣ်အပၢ်ဆ့ၣ်နီၤ လၢလီၢ်ဆ့ၣ်နီၤခိၣ်, အမဲာ်တမုာ်ဘၣ်ဒီး ဆိကမိၣ်တၢ်ယိာ်မး န့ၣ်လီၤ. သံကွၢ်အီၤ, ပၢ်ဧၢ, နသးအုး လၢမနုၤအဃိလဲၣ်. အပၢ်တဲအီၤလၢ အလဲၤမၤ တၢ်အလီၢ်န့ၣ် ပသံးလၢ အပှ့ၤဒိၣ် မးတဘိလီၤမၢ်ဝဲ, ဒီးတၢ်မၤလီၢ် အကစၢ်လၢအမ့ၢ် ပှၤသးစၢ်တဂၤ ဆိကမိၣ်ဝဲလၢ ယဟုၣ်ပသံး အံၤလီၤ. တၢ်မၤအကစၢ်သးစၢ်အံၤ မ့ၢ်ကစၢ်လၢအသံ တယံာ်ဒံးဘၣ် အဖိဒိၣ်လီၤ. တၢ်မၤကစၢ်လၢညါတဂၤ မ့ၢ်အိၣ်မူဒံးဒီး ကနာ် ယတၢ်ကတိၤလီၤ. ကစၢ်သးစၢ် အသီအံၤ တနာ်ယၤဘၣ်. အိၣ်ဒံးဒၣ်ထဲ ၁၂ နံၣ်လီၤ. တချုးလၢထဲးဒ့ၣ် အမိၢ်သံဒံးဘၣ်န့ၣ်, မၤလိာ် အဖိခွါဒ်အံၤ, “ကွဲနပၢ်လၢအကကဲထီၣ် ကစၢ်အပျဲၢ် တုၤအန့ၢ်တက့ၢ်.”
ထဲးဒ့ၣ် နၢ်ဟူ တၢ်အံၤဒီး မံဝဲတန့ၢ်ဘၣ်. မုၢ်ဆ့ၣ်ထီၣ် တဂီၤ အဝဲကတိၤတၢ်ဒီး ပိာ်မုၣ်ပှၢ်လၢ အဟဲမၤတၢ် လၢအဟံၣ်ပူၤ ကိးနံၤဒဲးတဂၤ ဘၣ်ဃး တၢ်ဂ့ၢ်အံၤဒီး မၢဝဲအဘါထုကဖၣ် စၢၤအီၤသပှၢ်ပှၢ် လၢတၢ်လီၤမၢ်အံၤ အဂ့ၢ်ဒီး မံးစံး ဘၢးဒ် (Mrs. Budd) တဲအီၤ, ထဲးဒ့ၣ်ဧၢ, နၤဒီးယၤ ပကမ့ၢ် ပှၤခံဂၤလၢ အဘါထုကဖၣ် လၢပှၤတဂၤဂၤ ကဟဲစိာ်က့ၤ ပသံးလၢအလီၤမၢ် ဝဲ လၢနပၢ်အဂီၢ်လီၤ. ထဲးဒ့ၣ် အသးမုာ်ထီၣ်တစဲးလီၤ.
လၢဟါအကတီၢ်န့ၣ် ထဲးဒ့ၣ် အပၢ်ဟဲက့ၤဆူ ဟံၣ်အမဲာ်ပှဲၤဒံးဒၣ်ဒီး တၢ်သးအုး လီၤ. ထဲးဒ့ၣ် ဆိကမိၣ်ထီၣ်, ယအဲၣ်ဒိး လၢယပၢ်သ့ၣ်ညါ ယွၤလၢအမ့ၢ် ပှၤမၤမုာ်ပှၤသးသ့ဝဲ န့ၣ်လီၤ. ဒီးတဘျီဃီ တဲအပၢ်, “ပၢ်ဧၢ, ကွၢ်စိး၀ၣ်ဃး လၢပကိးန့ၢ်အမံၤလၢ ကၠဲးခ် လၢအဟဲညီနုၢ်ဖဲအံၤ တဘ့ၣ် န့ၣ်ဟဲစိာ်တၢ်တမံၤလၢ အနိးလိၤလီၤ. ကမ့ၢ်ပသံးန့ၣ် သ့ၣ်သ့ၣ်လီၤ. အပၢ်ဟီယူၤကွံာ် ထိၣ်န့ၣ်ဒီး ထံၣ်ဘၣ်ဝဲပသံးန့ၣ် လၢထိၣ်တ့ၢ်လီၤကွံာ်န့ၣ်လီၤ. ယွၤဒိကနၣ် ပတၢ်ထုကဖၣ် ဒီးမၤစၢၤပှၤလံ. တူၢ်လိာ်ခရံာ်လၢ နသးပူၤတက့ၢ်. တယံာ်ဘၣ်ဒီး အပၢ်ဟ့ၣ်လီၤအ သးလၢ ခရံာ်အစုပူၤလီၤ.
