မးသဲ ၁၈း၃, သုမ့ၢ်တဃၣ်က့ၤဘၣ်သုသး ဒီးကဲထီၣ်ဒ်ဖိသၣ် တဖၣ်အသိး ဘၣ်ဒီး သုတလဲၤဘၣ် လၢမူခိၣ် အဘီအမုၢ်အပူၤ လ့ၤတက့ၤဘၣ်.
အဲကလံးတူၢ်ဒိၣ်မုၣ်တဂၤ ထံၣ်ဘၣ်ပှၤခူၣ်သွဲၣ်လး ဖိတဖၣ် တန့ၢ်ဘၣ် တၢ်အခွဲးဂ့ၤလၢ တၢ်ဘူၣ်တၢ်ဘါယွၤ ဘၣ်အဃိ, အဝဲသးအိၣ် မၤစၢၤ ပှၤတဖၣ်ဒ်သိး အကဘါဘၣ် တၢ်ဂ့ၤဂ့ၤဒီးကနၢ်ဟူဘၣ် ယွၤအကလုၢ်ကထါ လၢဟါခီအဆၢကတီၢ် န့ၣ်လီၤ. အဝဲမၤမံးရှၢၣ် တၢ်မၤအံၤ လၢအကစၢ်ဒၣ်ဝဲဒီး, ကွဲသရၣ် ကွၢ်တၢ်အိၣ်ဖှိၣ်တဖၣ် လၢအကဟဲဟီတရါ လၢပှၤခူၣ်သွဲၣ်လးဖိ ဒီးအဒူၣ်ဖိထၢဖိ တဖၣ် လၢတၢ်ကွဲအီၤ လၢအကဟဲဘါတၢ်န့ၣ်လီၤ. ပှၤဟဲကနၣ်တၢ်အါမးလီၤ.
ပိာ်မုၣ်ဖိသၣ် အမံၤလၢ ရံၣ်ဘဲးခၣ်န့ၣ် နၢ်ဟူတၢ်အံၤဒီး ဃ့အခွဲးလၢ အကလဲၤပာ် ဖျါထီၣ်စ့ၢ်ကီး ယွၤအတၢ်အဲၣ် အဂ့ၢ်န့ၣ်လီၤ. အဝဲအမဲာ်တထံၣ် တၢ်ဘၣ်ဒီး ဟးတသ့ဘၣ်. စံးဝဲ သါတမၤဘၣ် တၢ်လၢ ယွၤအဂီၢ် နီတမံၤဒံးဘၣ်န့ၣ်လီၤ. ပှၤအါဂၤစံးဝဲလၢ အတၢ်တလၢတပှဲၤဘၣ်အဃိ တၢ်တြကၢးဟ့ၣ်အီၤ အခွဲး လၢအကဟဲမၤစၢၤ တၢ်ဘၣ်. ဘၣ်ဆၣ် တူၢ်ဒိၣ်မုၣ်တဂၤအံၤ တဲဝဲ, ယွၤဃုထၢ အတၢ်စုကဝဲၤဒၣ်ဝဲ လီၤ. ပြကၢးဟ့ၣ်အီၤ အခွဲးလီၤ. ပကကွၢ်ယွၤ အတၢ်စုကဝဲၤ လၢအဃုထၢဝဲန့ၣ် မ့ၢ်ကမၤ တၢ်ဒ်လဲၣ်. ကိးမုၢ်ဟါဒဲး န့ၣ် ပှၤစိာ်ပိာ်မုၣ်ဖိအံၤ ဒီးပာ်ထီၣ် အီၤလၢပျဲၢ်စီၢ်ခိၣ် လၢသရၣ်တဖၣ် အကျါလီၤ.
သရၣ်တဖၣ် ဟီတရါ တၢ်တဂၤဘၣ်တဂၤ, မ့မ့ၢ် ရံၣ်ဘဲးခၣ်တခီ န့ၢ်ဘၣ်အခွဲးလၢ အကသးဝံၣ် တၢ်ဒီး အကလုၢ်မုာ်မးလီၤ. ဖဲတၢ်သးခုကစီၣ် လၢသရၣ်တဖၣ် ဟ့ၣ်ထီၣ်ဝဲဒီး တတုၤဃီၤဆူ ပှၤကနၣ်တၢ်ဖိတဖၣ် အသးပူၤဘၣ်န့ၣ်, ရံၣ်ဘဲးခၣ် အတၢ်သးဝံၣ်တဖၣ်, လၢရံၣ်ဘဲးခၣ် ဃုထၢဝဲလၢ အကဖိးလိာ်ဝဲဒီး တၢ်ဂ့ၢ်မိၢ်ပှၢ် လၢသရၣ်တဖၣ် ဃုထၢဝဲန့ၣ်, လဲၤနုာ်တုၤဝဲလၢ ပှၤကနၣ်တၢ်ဖိတဖၣ် အသးကံၢ်ပူၤန့ၣ်လီၤ. ပှၤကနၣ်တၢ်ဖိလၢ အတူၢ်လိာ် ခရံာ်တဖၣ် အုၣ်အသးလၢ ပိာ်မုၣ်ဖိအံၤ အတၢ်သးဝံၣ် ထိးဘၣ် အဝဲသ့ၣ်အသးတုၤဃီၤဝဲထဲသိး သရၣ်တဖၣ် အတၢ်စံၣ်တဲၤတဲလီၤ န့ၣ်လီၤ. ဖဲတၢ်ဘါဒ်အံၤ အိၣ်ဝဲတပူၤလၢ်လၢ် ပိာ်မုၣ်ဖိအံၤ တၢ်လဲၤစိာ်ဆှၢအီၤလီၤ. ယွၤအတၢ်စုကဝဲၤ တမံၤလၢ်လၢ် အလုၢ်ဒိၣ်ပှ့ၤဒိၣ်ဝဲလီၤ. တၢ်ကတိၤလၢ အဘၣ်ဝဲ အလီၢ်တဘီဧိၤ, တၢ်မၤဂ့ၤတမံၤမံၤဂ့ၤ, တၢ်မၤစၢၤ ထံခုၣ်တလီခီဂ့ၤ, မ့ၢ်တၢ်စုကဝဲၤလီၤ. ပာ်ထီၣ်နတၤလၣ် လၢပျဲၢ်စီၢ်ခိၣ် တက့ၢ်.
