ကလၤတံ ၆း၂, ဝံလိာ်သုတၢ်ဝံတၢ်ဃၢ သကိးသကိး ဒီးမၤလၢထီၣ်ပှဲၤထီၣ် ခရံာ်အတၢ်သိၣ်တၢ်သီဒ် န့ၣ်အသိး တက့ၢ်.
ပှၤပိာ်ခွါဖိ ၇ ဂၤ သ့ၣ်လိာ်အသးလၢ အကလဲၤဒိးလိာ်ကွဲ ခီၣ်ဖံးတကလုာ်ကိးဝဲလၢ စလဲး လၢတၢ်လူၢ်ခိၣ် တလူၢ်အကပၤန့ၣ်လီၤ. မူခိၣ်ဖီလီၤဂ့ၤမးလၢ ကလိာ်ကွဲ အဂီၢ်ဒီး လါကပီၤ ဂ့ၤမးစ့ၢ်ကီးလီၤ. ပှၤအခိၣ် ဖံထၢၣ်တဲအဝဲသ့ၣ် လၢသါအိၣ်ဒီး တၢ်ဆိကမိၣ် အဂ့ၤကတၢၢ် တခါလီၤ. သံကွၢ်ဝဲ မ့ၢ်အဝဲသ့ၣ် အလွး ဒီးအကွါအိၣ်ဧါ. အတံၤသကိးဖိတဖၣ် တဲဆၢဝဲလၢ အအိၣ်လီၤ. ဖံထၢၣ်မၢ အက့ၤဟံးန့ၢ် အလွးဒီး အကွါဝံၤ ဟဲကဒါက့ၤလၢ အမံးနံး ၁၀ အတီၢ်ပူၤ လီၤ. ဝံၤဒီး အဝဲကတဲအီၤလၢ အကဘၣ်မၤ မနုၤန့ၣ်လီၤ. အသကိး တဖၣ်တဲအီၤ လၢအဝဲသ့ၣ် အၢၣ်လီၤသကိးလၢ အကလဲၤဒိး စလဲးလီၤ. ဖံထၢၣ် စံးဝဲ မ့ၢ်ကစီဒီ, ဘၣ်ဆၣ် မုၣ်ကမဲတဂၤ အသ့ၣ်မုၢ်လၢအမၤလိာ်ဝဲန့ၣ် တုၤလံ. အကစၢ်မၤတချုးဒီး တသ့စ့ၢ်ကီးဘၣ်. အဝဲကဘၣ် လဲၤကွၢ်စၢၤဖိသၣ် လၢအဆါတဂၤ လီၤ. ပှၤမ့ၢ် တဖျးန့ၢ် အသ့ၣ်မုၢ်ဘၣ်ဒီး ခဲဂီၤ ကဖီအီၣ်တၢ်အဂီၢ် အသ့ၣ်မုၢ်တအိၣ်ဘၣ်. ပတတဲဘၣ်အီၤဘၣ်. ဖဲအဝဲ တအိၣ်လၢဟံၣ်အခါ ပကလဲၤမၤစၢၤခူသူၣ် အီၤလီၤ. ပမၤစၢၤ တၢ်အံၤ ကမၤမုာ်ပသးဒိၣ်န့ၢ် ပလိာ်ကွဲ တက့ၢ်လီၤ. မၤကွၢ်တက့ၢ်.
အဝဲသ့ၣ် ဘူးတဲာ်သ့ၣ်မုၢ်, ဖျးြပံလီၤအီၤ, ဒီးပာ်ဖှိၣ်က့ၤဝဲ တဂ့ၢ်တဂ့ၢ် တုၤအဝံၤတစုလီၤ. မုၢ်ဆ့ၣ်ထီၣ်တနံၤ မုၣ်ကမဲအံၤဟဲက့ၤလၢ အဟံၣ်ဒီး ထံၣ်သ့ၣ်မုၢ်အိၣ်ကတဲာ်ကတီၤ အသးလၢအဂီၢ်လီၤ. အဝဲဃုသ့ၣ်ညါဝဲ မ့ၢ်မတၤမၤ တၢ်အံၤ လဲၣ်. ဒီးတုၤအသ့ၣ်ညါဝဲဒီး စံးဘျုးအဝဲသ့ၣ် ကိးဂၤလၢ သူၣ်ဒီဖျၢၣ် သးဒီဖျၢၣ် ညါလီၤ. တဲစ့ၢ်ကီးဝဲလၢ အပူၤကွံာ် သၢလါန့ၣ် အဝဲအသးကိၢ်လၢ ကဘၣ်မၤန့ၢ် သ့ၣ်မုၢ်အံၤ ဒ်လဲၣ်န့ၣ်လီၤ. ပိာ်ခွါဖိ ၇ ဂၤအသးခု, အသးမုာ်ဒိၣ်မးလၢ အမၤစၢၤဘၣ် မုၣ်ကမဲတဂၤအံၤန့ၣ်လီၤ. တၢ်မၤမုာ် အဝဲသ့ၣ်အသး ဒိၣ်န့ၢ်ဒံး အလိာ်ကွဲတက့ၢ်လီၤ.
