ကလီးစဲ ၁း၂၇, ခရံာ်အိၣ်လၢသုပူၤ, တၢ်မုၢ်လၢ် တၢ်လၤကပီၤန့ၣ်လီၤ.
တဘျီ ဖဲ ပှၤပိာ်ထး အမံၤဟီဝးဒ် (Howard) ပိာ်ထးအခါ, ပှၤလၢအတနာ်လၢ ယွၤအိၣ်ဝဲ တဂၤ ဟဲကတိၤသကိးတၢ်ဒီးအီၤလီၤ. သံကွၢ်ဝဲ နစံးနအိၣ်လၢခရံာ်အပူၤ တမ့ၢ်ဘၣ်ဧါ. ဟီးဝး စံးဆၢဝဲ ယစံးဒ်န့ၣ်လီၤ. ဒီးနတဲစ့ၢ်ကီးလၢ ခရံာ်အိၣ်လၢနပူၤ တမ့ၢ်ဘၣ်ဧါ. တဲဆၢဝဲ ယစံးဒ်န့ၣ် စ့ၢ်ကီးလီၤ. ထဲန့ၣ်ဒီး သံကွၢ် အါထီၣ်ဝဲ, နတဲတၢ်ခံခါအံၤ ထီဒုၣ်ဒါ လိာ်အသးမးလဲၣ်. နအိၣ်လၢခရံာ်အပူၤ ဒီးတဘျီဃီ ခရံာ်လဲၤအိၣ်လၢ နပူၤသ့ဝဲ ဒ်လဲၣ်.
ဟီဝး မၤဒၣ်အတၢ်မၤ, ပၢနုာ်ထးတကူာ်လာ် လၢမ့ၣ်အူပူၤ, ဒီးမၤကိၢ်ဒိၣ်ထီၣ် မ့ၣ်အူ ဒ်သိး ထးကဂီၤဝဲ န့ၣ်လီၤ. ဟီဝး တဲဆၢအီၤဒ်အံၤ, ခဲအံၤ နထံၣ်ထးတကူာ်လာ် လၢအကိၢ်ထီၣ်ဝဲန့ၣ်လီၤ. ယဘျုးနုာ်အီၤလၢ မ့ၣ်အူအပူၤလီၤ. ကိၢ်လံ, ယကထုးထီၣ်အီၤလီၤ. ထုးထီၣ်ဝဲဒီး သုးဘူးဃီၤထး လၢအကိၢ်ဒိၣ် တကပၤဒီး ဒုးနဲၣ်အီၤ ဒီး မၢဝဲအဖီၣ်ကွၢ်ထးလၢ အဂီၤ တကပၤဒီးတဲအီၤ, နမ့ၢ်သးဒ့ဒီ လၢမ့ၣ်အူ အိၣ်စ့ၢ်ကီး လၢထးအပူၤန့ၣ် ဖီၣ်ကွၢ်အီၤလၢ နကစၢ်တက့ၢ်. မ့ၣ်အူအိၣ်စ့ၢ်ကီးလၢ ထးအပူၤ, အဂ့ၢ်မ့ၢ်ဝဲ လၢထးအိၣ်တ့ၢ်လံလၢ မ့ၣ်အူအပူၤန့ၣ်လီၤ. ဒ်သိးမ့ၣ်အူ ကအိၣ်ထီဃာ်လၢ ထးအပူၤန့ၣ်, ထးကဘၣ်အိၣ်ထီဃာ် လၢမ့ၣ်အူပူၤလီၤ. ဒ်န့ၣ်အသိး စ့ၢ်ကီး, ယအိၣ်လၢ ခရံာ်အပူၤ ဒီးခရံာ်အိၣ်စဲဘူး လၢယပူၤန့ၣ် လီၤ. ယမ့ၢ်တအိၣ်လၢၤလၢ ခရံာ်အပူၤဘၣ်န့ၣ်, ခရံာ်ကအိၣ်စဲဘူး ထီဃာ်ဒီးယၤ တသ့စ့ၢ်ကီးဘၣ်.
ပှၤလၢ အတမ့ၢ်ပှၤခရံာ်ဖိ တဂၤဒီး တနာ်ဝဲလၢယွၤအိၣ်ဝဲ ဘၣ်တဂၤအံၤ, ကနၣ်ဟီဝး အတၢ်တဲအံၤ မ့ၢ်တၢ်လၢ အတီဝဲ ဘၣ်ဝဲဒီး ကတိၤဂ့ၢ်လိာ် အါထီၣ်တၢ် ဒီးအီၤ တသ့လၢၤဘၣ်ဒီး ဟးထီၣ်ကွံာ်ဝဲ လၢအအိၣ်လီၤ.
