ကတိၤ ၂၅း၂၁, ၂၂, နဒုၣ်နဒါန့ၣ် ... ဟ့ၣ်အီၣ်အီၤ ... ဒီး ဟ့ၣ်အီအီၤတက့ၢ်. နကပာ်ဖှိၣ် မ့ၣ်အူကဖးလၢ အခိၣ်ဖီခိၣ် ... လီၤ.
ပဟ့ၣ်ကၣ်က့ၤ တၢ်အအၢသ့ဝဲဒီး အဂ့ၤသ့ဝဲလီၤ.
ကးပလံၣ်မုၣ်ဖိတဂၤ ကဲထီၣ်က့ၤခရံာ်ဖိဒီး ဟ့ၣ်ကၣ်ဆၢက့ၤတၢ်အၢလၢ တၢ်အဂ့ၤဒ်လဲၣ်အဂ့ၢ်.
ကးပလံၣ်ပိာ်ခွါခံဂၤ အ့ၣ်လိာ်အသးဒီး သးဟ့လိာ်အသး အၢအၢကလဲာ်လီၤ. တနံၤတခီၣ် အကျါတဂၤ ထံၣ်ဝဲ အဒုၣ်အဒါတဂၤအံၤ အဖိမုၣ် အိၣ်ထဲတဂၤဧိၤ လၢပှၢ်ပူၤ, ဖီၣ်ဃာ်ဆူၣ်အီၤဒီး ကျီတဲာ်ကွံာ်ဝဲ အစုခံခီလၢာ် လၢအစုဒ့ထံး ဝံၤပျၢ်ကွံာ်အီၤဒီး တဲထွဲဝဲအခံ, “တဘျီအံၤ ယဟ့ၣ်ကၣ်ဆၢက့ၤဘၣ်တၢ်လံ.”
ပိာ်မုၣ်ဖိအံၤ အစုသွံၣ်ဝဲ ဒိၣ်ဒိၣ်ကလဲာ်, ဒီးက့ၤဃ့ၢ်ဝဲဆူ အဟံၣ်လီၤ. အစုတအိၣ်နီတခီအဃိ မၤတၢ်တညီ ဘၣ်. ပူၤကွံာ်ဝဲ တဘျုးနံၣ်လံ. အပၢ်အပှၤဟံၣ်ဖိ လဲၤဃ့ၢ်အိၣ်က့ၤလၢ တၢ်လီၢ်အဂၤလီၤ. ဘၣ်တနံၤ ပှၤဃ့ အီၣ်တၢ်တဂၤ ဟဲဃ့အီၣ်တၢ်လၢအီၤလီၤ. တမှံၤအံၤ တသ့ၣ်ညါအီၤဘၣ်. ဘၣ်ဆၣ် ပိာ်မုၣ်အံၤ သ့ၣ်ညါအီၤလီၤ. မၢဝဲ အပျဲၢ်မုၣ်တဂၤ ဒုးအီၣ်အီၤ ကိၣ်ဒီး တၢ်နုၢ်ထံ အါအါတုၤ အဘျဲးအီၣ်အီၤ န့ၣ်လီၤ. တုၤအအီၣ် တၢ်ဒီး စံးဘျုးအီၤဝံၤ, ပိာ်မုၣ်အံၤ ဘ့ၣ်လီၤ ကွံာ်တၢ်ကံးညာ်လၢ အပဲဘၢအစုခိၣ် ဆၢၣ်ဒီး ဒုးနဲၣ်တမှံၤအံၤဝံၤ, ကတိၤတၢ် ဒီးအီၤလၢ တၢ်မဲာ်မုာ်နါဆၢအပူၤ, ယဟ့ၣ်ဆၢဘၣ်က့ၤနၤ တၢ်ဟ့ၣ်ကၣ်လၢ အဂ့ၤခဲအံၤလီၤ.
တမှံၤတဂၤအံၤ ဖုးဘၣ်အသး, တထံၣ်ဘၣ် တၢ်ဟ့ၣ်ကၣ်ဆၢက့ၤ တၢ်အၢဒ်အံၤ တကလုာ်လၢညါ နီတဘျီဘၣ်. အသးပူၤပှဲၤဒီး တၢ်သးအုး ဒီးတၢ်ဆီၣ်လီၤသး လီၤ. ဘၣ်မနုၤပိာ်မုၣ်အံၤ မၤဝဲဒ်အံၤ သ့ဝဲဒီးကဲဝဲလဲၣ်. အဂ့ၢ်မ့ၢ် ဝဲအကဲထီၣ်လံ ခရံာ်ဖိ လၢအဂ့ၤတဂၤန့ၣ်လီၤ.
